«Դեդփուլից» մինչև «Լազուրե ափ». փետրվարի 7 կինոպրեմիերաները

Երևանյան կինոթատրոնները 2016-ի երկրորդ ամսվա ընթացքում հայ կինոսերներին կներկայացնեն բազմաժանր ու հետաքրքիր ֆիլմեր: «Արմենպրես» լրատվական գործակալությունը, շարունակելով ներկայացնել ամսվա սպասված կինոպրեմիերաների ցանկն, առաջարկ ում է այս անգամ կինոպրեմիերաներին ծանոթանալ այլ ձևաչափով: «Մոսկվա», «Սինեմա Սթար» և «ԿինոՊարկ» կինոթատրոնների տվյալների համաձայն` ներկայացնում ենք փետրվարի 7 ամենասպասված, հետաքրքիր, թեթև և զվարճալի ֆիլմերը, որոնք կարելի է այս ամիս դիտել երևանյան կինոթատրոններում:

1.«Դեդփուլ»

Էկրաններին`փետրվարի 11-ից

Ռեժիսոր Թիմ Միլերի ֆիլմի համար հիմք են ծառայել Marvel Comics-ի հերոս Դեդփուլի մասին կոմիքսները: Ֆիլմում գլխավոր դերում հանդես է գալիս Ռայան Ռեյնոլդսը:

Ֆիլմի հերոս Ուեյդ Ուիլսոնը դառնում է վարձկան այն բանից հետո, երբ իր վրա կատարում են ոչ ստանդարտ փորձ և արդյունքում նա ստանում է արագ ինքնաբժշկվելու հատկություն: Դրանցի հետո Ուեյդը վերցնում է Դեդփուլ անունը: Ունենալով նոր կարողություններ և սև հումորի զգացում, Դեդփուլը որս է սկսում՝ հետապնդելով այն մարդուն, ով համարյա ոչնչացրել էր իր կյանքը: 

2. «Հպարտություն և նախապաշարմունք և զոմբիներ»

Էկրաններին`փետրվարի 18-ից 

Ֆիլմն էքշն է, որի համար հիմք է հանդիսացել Սեթ Գրեմ Սմիթի` 2009 թվականին գրված ստեղծագործությունը: Այն Ջեյն Օսթինի «Հպարտություն և նախապաշարմունք» ֆիլմի ծաղերգությունն է: Ռեժիսոր Բյոր Սթիրսի ֆիլմում խաղում են Լիլի Ջեյմսը, Սեմ Ռայլին, Դուգլաս Բուտը և այլք: Կինոնկարի գլխավոր հերոսները Էլիզաբեթ Բեննեթն ու պարոն Դարսին են.բայց այս անգամ ամեն ինչ այլ է: 

3. «Լազուրե ափ» 

Էկրաններին`փետրվարի 11-ից

Ֆիլմն Անջելինա Ջոլի-Փիթի ռեժիսորական աշխատանքն է, և հատկանշական է, որ Ջոլի-Փիթ ամուսինները` «Տեր և տիկին Սմիթները» ֆիլմի աստղերը, կրկին միասին են էկրաններին:

Ֆիլմի հերոսներն ամուսիններ են, ովքեր փախել են նյույորքյան իրականությունից` Ֆրանսիայի Լազուրե ափ: Այնտեղ ամեն ինչ փոխվում է…

4. «Բրուքլին» 

Էկրաններին`փետրվարի 4-ից

Ջոն Քրաուլիի ֆիլմի հիմքը Քոլմ Թոյբինի համանուն ստեղծագործությունն է: Ֆիլմը առաջադրվել է «Օսկարի» երեք անվանակարգերում:

Ֆիլմի հերոսուհին` Էյլիշ Լեյսին, լքում է հարազատ իռլանդական գյուղը և ուղևորվում ԱՄՆ` աշխատանք փնտրելու: Արդյունքում նա հայտնվում է Բրուքլինում և սիրահարվում: Ֆիլմում խաղում են Սիրշա Ռոնանը, Դոնալ Գլիսոնը, Մայքլ Զեգենը:

5. «Ուշադրության կենտրոնում» 

Էկրաններին`փետրվարի 11-ից

Թոմաս Մաքքարթիի ֆիլմն ընդգրկված է «Օսկարի» վեց անվանակարգերում: Այն յուրահատուկ լրագրողական հետաքննության մասին պատմություն է, որի արդյունքում պարզվում է, որ որոշ բոսթոնյան քահանաներ սեռական բռնությունների էին ենթարկում երեխաների:

Ֆիլմում խաղում են Մարք Ռուֆալոն, Մայքլ Քիթոնը, Ռեյչել Մաքադամսը և այլք:

6. «Ակտիվ որոնման մեջ» 

Էկրաններին`փետրվարի 11-ից

Կան մարդիկ, ովքեր ակտիվ որոնման մեջ են, կան մարդիկ, ովքեր պասիվ որոնման մեջ են: Նյու Յորքը լի է միայնակ սրտերով, ովքեր փնտրում են իրենց երկրորդ կեսին: Քրիստիան Դիթերի ֆիլմում խաղում են «Մոխրագույնի 50 երանգներից» հայտնի Դակոտա Ջոնսոնը, Էլիսոն Բրին, Ռեբել Ուիլսոնը և այլք:

7. «Օրինակելի արու 2» 

Էկրաններին`փետրվարի 18-ից

Ուրախ և թեթև ֆիլմերի սիրահարները կհիշեն 2000-ականների հայտնի «Օրինակելի արու» կինոնկարը և նրա հերոս` Դերեք Զուլանդերին: Պատրաստվեք, աշխարհում թիվ մեկ տղամարդ մոդելը վերադառնում է: «Օրինակելի արու 2» կինոկատակերգության ռեժիսորն է Բեն Սթիլերը: Նա և Օուեն Ուիլսոնը ֆիլմում մարմնավորում են գլխավոր հերոսներին: Կինոնկարում խաղում է նաև Բենեդիկտ Քամբերբատչը.ֆիլմի թրեյլերը հուշում է, որ Շերլոքը երկրպագուներին հաստատ չի հիասթափեցնի:

Ֆիլմերն առանձնացրեց Ռոզա Գրիգորյանը