Life.panorama.am-ը գրում է.
Life.panorama.am-ին դերասան, հաղորդավար եւ երգիչ Գրիշա Աղախանյանը պատմել է, որ 2016-ը իր համար բուռն աշխատանքային տարի կլինի, քանի որ ծրագրերն արդեն իսկ պլանավորված են:
«Ծրագրերում կան եւ մեծ ներկայացում, եւ «Stand up» ժանրի ներկայացում, եւ գեղարվեստական ֆիլմ: Դեռ մանրամասներ հայտնել չեմ կարող, քանի որ սրանք դեռ խմորման փուլում են, բայց ներքին վստահություն ունեմ, որ կիրականանան: «Stand up»-ը նախատեսված է Կարեն Սահակյանի՝ Չարենցի հետ համատեղ, իսկ ներկայացման եւ ֆիլմի մասին առավել մանրամասնել չեմ կարող»,- նշեց նա:
Հաղորդավարի համար առաջիկա ծրագրերում է «Շանթ» հեռուստաընկերության «Պրեմիերա» նախագծի վերսկսկումը. «Գարնանը տաղանդավոր հեղինակների եւ կատարողների նախագիծը՝ «Պրեմիերան», կրկին հեռուստաէկրաններին կլինի, որի հաղորդավարությամբ ես եմ զբաղվում: Ես ինքս շատ եմ սիրում այս նախագիծը»,-նշեց նա:
Անդրադառնալով «Որոգայթ» գեղարվեստական ֆիլմին, որտեղ Գրիշա Աղախանյանը մարմնավորում էր Գարիկի կերպարը եւ հարցին, թե ի՞նչ արձագանքներ են իրեն հասել, Գրիշան պատասխանեց. «Արձագանքները շատ լավն էին, բայց ես գիտակցում եմ, որ մարդիկ չէին սպասում ինձ այս դերում, նրանց համար խորթ էր, որ Գրիշա Աղախանյանին կտեսնեին լուրջ դերում: Շատ ուրախ եմ, որ, ինձ առաջին անգամ նման կերպարում տեսնելով, մարդիկ ընդունեցին ու լավ կարծիք կազմեցին: Թեպետ շատ քչերը գիտեն, երբ դերասանի ուղին ընտրեցի, թատրոնում լուրջ դերեր շատ եմ խաղացել»:
Թե որպես դերասան, ո՞ր ժանրին է նախապատվություն տալիս, հարցին ի պատասխան, Գրիշա Աղախանյանը նշեց. «Այս հարցի մասին շատ եմ մտածել ու ինձ դժվար է պատասխան գտնելը: Երիտասարդ տարիքում գուցե հումորային կերպարներն ավելի հետաքրքիր են, իսկ հիմա՝ հասուն տարիքում, արդեն լուրջ դերերով եմ շատ հրապուրվում: Ամեն դեպքում, գտնում եմ, որ դերասանը պետք է բազմաժանր լինի: Մի բան էլ կա, մարդիկ ու ռեժիսորները արդեն սովոր են ինձ տեսնել հումորային կերպարում, այնպես որ, երեւի թե առաջիկայում եւս ավելի շատ այդ ժանրում կներկայանամ»:
Հայսկական ֆիլմարտադրության մեջ կատակերգական ժանրի ֆիլմերի հոսքը դերասանը կապում է դրա անհրաժեշտության հետ. «Մեր իրականության մեջ առանց այն էլ տխրելու դեպքերն ավելի շատ են եւ ճիշտ է, որ գոնե ֆիլմերը լինեն թեթեւ, հումորային, մարդկանց ուրախ պահեր պատճառելու համար: Կարծում եմ՝ մարդիկ էլ ավելի շատ նման ֆիլմերի կարիք են զգում, մարդիկ ուզում են ծիծաղել, այլ ոչ թե ավելորդ անգամ ծանր ապրումներ ունենալ: Ինձ համար կոնկրետ պետք է հավասարություն պահպանել, հումորային ֆիլմերը պետք են, բայց դրամատիկ ֆիլմերն էլ են անհրաժեշտ, որոնք դիտելուց հետո մարդիկ մի փոքր խորհելու տեղ կունենան»,- հավելեց նա:
Այս մասին խոսելիս՝ Գրիշան առանձնացրեց «Սկոտչ եւ վիսկի» ֆիլմը. «Ինձ համար շատ հաճելի էր աշխատել Արշո Հարությունյանի հետ, նրա հետ ամբողջովին հասկացանք «Սկոտչ եւ վիսկի»-ում իմ կերպարի տեսակը՝ իր միմիկաներով, տեսակով եւ բնավորությամբ, ու փորձեցինք մաքսիմալ ճիշտ ներկայացնել: Այստեղ նկարահանվելով՝ ես իսկապես մեծ հաճույք ստացա»,- նկատեց նա:
Շուտով Գրիշա Աղախանյանը կներկայանա ներկայացմամբ, մեզ հետ զրույցում դերասանը շեշտեց. «Ես միշտ ասել եմ՝ եթե թատրոնն ինձ տար ֆինասական հնարավորություններ, ես միայն ու միայն թատրոնով կզբաղվեի, բայց, ցավոք, այդպես չէ ու չի էլ կարող լինել, ուստի կփորձեմ լինել եւ թատրոնում, եւ կինոյում»:
