Ավարտին կհասցվի փախստականների փաստաթղթավորումը

Նարեկ Սարգսյանը Ֆեյսբուքյան իր էջում գրում է.

Ադրբեջանից բռնագաղթած փախստականների մեծ մասը չուներ աշխատանքային գրքույկ, անգամ անձնագիր կամ անձը հաստատող այլ փաստաթուղթ, ինչը խնդիրներ էր առաջացնում կենսաթոշակ նշանակելու ժամանակ նրանց աշխատանքային ստաժը սահմանելու հարցում:

Նշված խնդրին լուծում տվեց ՀՀ կառավարության 2009թ. հուլիսի 23- ի «1988- 1992թթ. Ադրբեջանի Հանրապետությունից բռնագաղթած անձանց աշխատանքային ստաժ սահմանող հանձնաժողով ստեղծելու և հանձնաժողովի աշխատակարգը հաստատելու մասին» որոշումը, որի գործողության ժամկետ էր սահմանվել մինչև 2011թ. դեկտեմբերի 31- ը: Հաջորդ տարիներին այդ ժամկետը երկարաձգվել է` հասցվելով մինչև 2015թ. դեկտեմբերի 31- ը: 2015թ. հունվարից մինչև հոկտեմբերի 25- ը ներառյալ ՀՀ տարածքային կառավարման և արտակարգ իրավիճակների նախարարության միգրացիոն պետական ծառայությունն ստացել է 75 դիմում, կայացել է աշխատանքային ստաժ սահմանող հանձնաժողովի 7 նիստ, բավարարվել է 62 դիմում, 13- ը մերժվել է տարբեր պատճառներով:

Հանձնաժողովի գործունեության սկզբից` 2009 թվականից առ այսօր ծառայությունն ստացել է 700 դիմում, կայացել է աշխատանքային ստաժ սահմանող հանձնաժողովի 68 նիստ, բավարարվել 451 դիմում, տարբեր պատճառներով մերժվել 225- ը, 24 դիմումատու չի ներկայացել հանձնաժողովի նիստին:
Յուրաքանչյուր դիմումի առնչությամբ օրենսդրությամբ սահմանված կարգով հարուցվում է վարչական վարույթ, ընդունվում որոշում և արդյունքի մասին տեղեկացվում դիմողին: Վերոբերյալ տվյալները փաստում են, որ հանձնաժողովն օգտակար գործունեություն է ծավալել հարյուրավոր փախստականների համար, որոնց դիմումների հոսքը շարունակվում է:

Նկատի առնելով այս վերջին հանգամանքը, կառավարությունն իր ս.թ. հունվարի 20- ի նիստում մինչև ս.թ. դեկտեմբերի 31- ը երկարաձգել է աշխատանքային ստաժ սահմանող հանձնաժողովի գործունեության ժամկետը, ինչի շնորհիվ դեռևս 2009- ին սկսված աշխատանքն ավարտին կհասցվի:
ԹՎԱՅԻՆ ՀԵՌԱՐՁԱԿՄԱՆ ՀԱՄԱԿԱՐԳԸ ՊԱՏՐԱՍՏ Է (իրավական)
ՀՀ կառավարությունն իր 2013 թ. հունիսի 20- ի նիստում հավանություն էր տվել վերգետնյա թվային հեռուստահեռարձակման համակարգի ներդրման գործընթացի իրականացման ծրագրին` երկրի վերգետնյա թվային ցանցը կառուցել «Հայաստանի հեռուստատեսային և ռադիոհաղորդիչ ցանց» ՓԲԸ կողմից շահագործվող անալոգային ցանցի բազայի վրա` առավելագույնս օգտագործելով վերջինիս ենթակառուցվածքները` հեռուստաաշտարակները, շենք- շինությունները, էլեկտրամատակարարման համակարգերը, տրանսպորտային հաղորդակցման միջոցները, ինչը զգալի չափով կնվազեցներ կապիտալ ներդրումները:

Այդպես էլ արվեց, և ՓԲԸ- ն 2015թ. հունիսի 30- ի դրությամբ ավարտեց ՀՀ տարածքում վերգետնյա թվային հեռուստատեսային հեռարձակման համակարգի ներդրման աշխատանքը: Ծրագրի իրականացման ընթացքում պարզվեց, սակայն, որ ՓԲ ընկերությանը պատկանող 206 մարզային կայանների զբաղեցրած տարածքներից 148- ը չունի իրավական ձևակերպում: Այդ համայնքների ղեկավարների հետ ձեռք է բերվել կայանների կառուցման ու շահագործման համար անհրաժեշտ հողատարածքներն ուղղակի վաճառքի ձևով օտարելու նախնական համաձայնություն:

ՀՀ օրենսդրության համաձայն պետության և համայնքների սեփականություն հանդիսացող հողամասերի ուղղակի վաճառքը կատարվում է` սոցիալական կամ բարեգործական կամ ՀՀ կառավարության հավանությանն արժանացած ներդրումային ծրագրեր իրականացնելու նպատակով պետության սեփականություն հանդիսացող հողամասերը` կառավարության որոշմամբ, իսկ համայնքի սեփականություն հանդիսացող հողամասերը` կառավարության համաձայնությամբ: 
Հենց այդպիսի որոշում էլ կայացրեց գործադիրը ս.թ. հուվարի 20- ի նիստում: