Life.panoarama.am-ը գրում է.
Երգիչ Նարեկ Բավեյանն, ով վերջին շրջանում ներկայանում է «Դոմինո» սիթքոմի Նորիկի կերպարում, Life.panoarama.am-ին պատմել է Վիեննայում կնոջ հետ անցկացրած հանգստի, որպես երգիչ եւ դերասան ապագա պլանների ու շուտով հայրիկ դառնալու զգացողությունների մասին:
Երգիչը կնոջ հետ բոլորովին վերջերս է վերադարձել Վիեննայից, ուր անցկացնում էին ձմեռային հանգիստը, Նարեկի խոսքերով՝ տպավորություններն աննկարագրելի են.
«Վիեննան Եվրոպայի ամենագեղեցիկ քաղաքներից մեկն է, եթե ոչ ամենագեղեցիկը, ինձ համար Վիեննայի հետ մրցում է միայն Պրահան, այդ իսկ պատճառով ես ու կինս որոշեցինք հանգստանալ հենց Վիեննայում: Այս քաղաքը շատ գեղեցիկ ճարտարապետություն ունի, շատ ազդեցիկ եկեղեցիներ ունի, որոնք կառուցված են հին գոթական ոճով, այս քաղաքը ունի նաեւ շատ հարուստ երաժշտական պատմություն, ինչը ինձ էլ ավելի գրավեց: Այստեղ կարելի է լինել վայրերում, դղյակներում, ուր օրինակ Մոցարտը կամ Բեթհովենն է նվագել. Վիեննան շատ հարուստ է իր տեսարժան վայրերով, որոնց նայելիս իսկապես մեծ հաճույք ես ստանում»,- պատմեց Նարեկ Բավեյանը:
Հետաքրքրվելով, թե գեղեցիկ ամուսնական զույգը հասցրե՞լ է այցելել նախապես մտածված բոլոր վայրերը, ապագա հայրիկը պատասխանեց. «Քանի որ կինս՝ Քրիստինան, հղի է, այդ առումով մի փոքր դժվարություններ կային, նա իր կարգավիճակում շուտ էր հոգնում ու արդյունքում մի քանի տեղ չկարողացանք լինել, որովհետեւ պետք է երկար ճանապարհ անցնեինք այդ վայրերը հասնելու համար, իսկ ընդհանուր առմամբ մեկ շաբաթվա ընթացքում ամենակարեւոր վայրերը այցելեցինք: Մենք դեռ շատ միասին կճամփորդենք, մեր ընտանիքի արդեն երրորդի անդամի հետ»:
Նարեկ Բավեյանի կինը հղիության հինգերորդ ամսում գտնվում և իրեն շատ լավ է զգում. Քրիստինան ամուսնուն պատրաստվում է որդի պարգեւել. «Երջանկության անբացատրելի զգացողություններ ունեցա, երբ իմացա, որ շուտով հայրիկ եմ դառնալու: Զգացողություններն անծանոթ են, բայց հասկանում ես, որ նման երջանկություն չես ունեցել երբեք: Անկեղծ ասած, դեռեւս չեմ գիտակցում, Աստված առաջ, երեւի, երբ ծնվի, այն ժամանակ էլ կհասկանամ, թե ինչ է կատարվուրմ»,- ծիծաղելով պատմեց Նարեկը:
Երգիչն ու կինը դեռեւս բալիկի անվան ընտրությունը չեն կայացրել, Նարեկ Բավեյանի խոսքերով՝ դրա համար դեռ շատ ժամանակ ունեն: Ի դեպ, երգիչը նկատեց, որ շատ հայ տղամարդկանց նման որդու մասին հիվանդագին կերպով չի երազել, ավելին՝ իրենց ընտանիքում այդ առումով հակառակ իրավիճակն է.
«Ինձ համար երեխայի սեռը կարեւոր չէ, նույնիսկ ես շատ էի ուզում, որ առաջնեկս աղջիկ լինի, իսկ կինս ուզում էր, որ որդի պարգեւի ինձ: Այնպես որ, մեր տանը այդ առումով հակառակ իրավիճակն էր: Ինչեւէ, մեզ համար կարեւորն այն է, որ մեր երեխան առողջ լինի»,- նշեց նա:
Ինչ վերաբերվում է աշխատանքներին՝ Նարեկն առաջինը մեզ վստահեց ու նշեց, որ շատ շուտով երկրպագուներին նոր տեսահոլովակ կներկայացնի. «Այս պահին իմ նոր տեսահոլովակի նախապատրաստական աշխատանքներով ենք զբաղված: Պլանավորում ենք փետրվարի առաջին տասնօրյակին նկարահանել սպասված տեսահոլովակս: Երգի թե խոսքերի, թե երաժշտության հեղինակը ես եմ, այն կոչվում է «Հասել եմ»: Ակտիվ, պարային երգ է, իսկ տեսահոլովակի ռեժիսորությամբ կզբաղվի «Դոմինո»-ի ռեժիսոր Հարություն Խալաֆյանը»,- նշեց նա:
«Դոմինո»-ի Նորիկի հավաստմամբ՝ սիթքոմը կրկին եթերում կլինի մարտ ամսից. ««Դոմինո»-ի նկարահանումները դեռեւս չենք սկսել, բայց շատ շուտով արդեն կսկսենք այդ ուղղությամբ աշխատանքները: Մենք էլ հեռուստադիտողի նման անհամբեր սպասում ենք»,- հավելեց դերասան երգիչը:
