«Մի խումբ մարդիկ, որոնք իրականացնում են իրենց խարդախ օպերացիան»․ կայացել է «Օպերացիա Մեծապատիվ Մուրացկաններ» ֆիլմի փակ դիտումն ու կարմիր գորգը հայ հայտնիների մասնակցությամբ (լուսանկարներ)

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ֆիլմ, որտեղ մի խումբ խարդախությամբ զբաղվող անձինք պատրաստվում են իրականացնել օպերացիա, որի շրջանակում  «թալանում են» մի հարուստ սփյուռքահայի։ Նոյեմբերի 30-ից մեծ էկրաններ կբարձրանա «Օպերացի Մեծապատիվ մուրացկաններ» ֆիլմը, որի փակ դիտումը և կարմիր գորգի արարողությունը կայացավ երեկ՝ սեպտեմբերի 26-ին, «Մոսկվա» կինոթատրոնում:

Tert.am Life-ը ներկա էր փակ դիտմանն ու կարմիր գորգի արարողությանը և ներկայացնում է մանրամասներն ու լուսանկարները։ 

Գեղարվեստական ֆիլմը արկածային ժանրում է, որը պրոդյուսերը Արման Միտոյանն է, իսկ ռեժիսորը՝ Արշալույս Հարությունյանը։ Ռեժիսորը մեզ հետ զրույցում նշեց, որ այս նախագծում ներգրավված են իր երազանքների դերասանները, մասնավորապես Ռաֆայել Երանոսյանը, Քեն Դավիդյանը, Լուիզա Ներսիսյանը, Վիկտորիա Սահակյանը, Սոս Ջանիբեկյանը,  Լևոն Հախվերդյանը, Սամվել Գրիգորյանը, Արսեն Սաղաթելյանը, Իշխան Ղարիբյանը, Գրիշա Աղախանյանը և մի շարք այլ դերասաններ։

Ռեժիսորը նշում է, որ սա իր կյանքի ամենասպասված նախագծերից է, որն ի սկզբանե պետք է բաղկացած լիներ 16 մասին։ 

«Սա իմ կյանքի, ամենաերկար, ձգված նախագիծն է եղել: Որքան ընթացքը ձգվեց, այնքան երկար կարողացա վայելել այն մարդկանց, ովքեր աշխատել են այս նախագծի շուրջ, քանի որ իմ երազանքի դերասանական անձնակազմն էր»,– նշեց Արշալույս Հարությունյանը։ 

Գլխավոր հերոսի դերում է դերասան Ռաֆայել Երանոսյանը, որը մարմնավորում է Մանուկ անունով չկայացած ռեժիսորի, որը ոչ մի թատրոն չընդունվելով, բեմադրում է իր ներկայացումը։ 

«Հերոսս իր շուրջը կարողանում է հավաքել արկածախնդիր մարդկանց, որոնց գումար է անհրաժեշտ և Մանուկի շուրջ հավաքվում է աճպարար, հակեր, նախկին ոստիկան և լրագրող աղջիկ, որն իր սիրելին է և հենց այս հերոսների ձեռամբ էլ իրականացվում է «Մեծապատիվ մուրացկաններ» օպերացիան։  Հետաքրքիր նախագիծ էր, քանի որ բազմաթիվ բարդ տեսարաններ եմ ունեցել, որոնք դրսում իրականացնում են դուբլյորները, բայց ես վստահում եմ Արշոյին, որի ամեն ասված առաջադրանք կատարում էի, իսկ՝ ինչ արկածների մասին է խոսքը շատ փակագծեր չեմ բացի, որ հանդիսատեսը գա, վայելի և գնահատի արված աշխատանքը»,– ասաց Ռաֆայել Երանոսյանը։ 

Ինչպես նշեցինք գլխավոր հերոսը՝ Մանուկն ունի սիրելի, որին մարմնավորում է թատրոնի և կինոյի դերասանուհի Վիկտորիա Սահակյանը, որը մեզ հետ զրույցում նշեց, որ նախագծի պատմությունը լսելով՝ վարակվել է նույն ոգևորությամբ և ընդունել այս առաջարկը։
«Ինչպես գիտեք ի սկզբանե պետք է լիներ սերիալ և այլ պատկերացումներ ունեի, թե՛ ընթացքի, թե՛ վերջնարդյունքի պարագայում, բայց սպասելիքներս առավել քան արդարացվել են»,– նշեց Վիկտորիա Սահակյանը։ 

Նախագծի պրոդյուսերը՝ Արման Միտոյանը նշում է, որ այս նախագծում ներգրավված են բազմաժանր դերասաններ։
«Երբ սկսեցինք աշխատանքները հասկացանք, որ սա պետք է ֆիլմ լինի, քանի որ հավաքված էին դերասաններ, որոնք կարող էին նոր որակ ու ընթացք տալ գաղափարին։ Մենք լսարանի դատին են հանձնում աշխատանք, որը նորություն է իր ժանրում»,– նշեց Արման Միտոյանը։ 

Ֆիլմի գլխավոր դերասանուհիներից է նաև թատրոնի և կինոյի դերասանուհի Լուիզա Ներսիսյանը։
«Ես մեծագույն սիրով եմ մարմնավորում ուժեղ կերպարների, որոնք հակասական միջավայր են ստեղծում, իսկ Թագուհի անունով հերոսուհիս շատ վառ կերպար է, որն ունի իր օպերացիան և խաղը։ Ուրախ էի, որ մարմնավորել եմ առանցքային կերպար, որն ուներ իր պատմությունը»,– հավելեց Լուիզա Ներսիսյանը։ 

Լուսանկարները՝ Վերոնիկա Բադալյանի