«Ներկայացնելու ենք սիրո մասին աշխատանք, որի երաժշտությունն ու բառերը զգում ենք». Մերի Քոչարյանը և Հրանտ Հովսեփյանը ներկայացնելու են զուգերգ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Վաղը՝ 20:00-ին դերասաններ Մերի Քոչարյանը և Հրանտ Հովսեփյանը լսարանի դատին են հանձնելու զուգերգ, որի վրա նրանք աշխատել են նախորդ ամիսների ընթացքում: Ստեղծագործական զույգն առաջին մանրամասները վստահել է Tert.am Life-ին: Մերի Քոչարյանը մեզ հետ զրույցում պատմեց, որ երգի իր հատվածը վաղուց է գրել և անգամ հատվածներից մեկը վաղ անցյալում տեղադրել իր սոցիալական էջում:

«Երգը շատ սպոնտան է գրվել. արթնացել եմ և վաղ առավոտյան, կիսաքնած երգի բառերն ու երաժշտությունը գրել ու հետո սկսել լսել՝ հասկանալով, որ շատ սիրուն աշխատանք է ստացվել, բայց կիսատ է: Տևական ժամանակ փորձում եմ շարունակություն գրել, բայց չի ստացվում: Արդեն սկսվել էին «Իրար դեմ» հեռուստասերիալի նկարահանումներն ու մի անգամ խմբի ներկայությամբ էլ տրտնջացի, որ չի ստացվում շարունակություն գտնել ու Հրանտը խնդրեց, որ լսի երգն ու ասեց, որ ինքը կգրի ռեփ, բայց լուրջ չէի մոտեցել հարցին՝ մտածելով, որ դե ասեց ու գնաց»,- ասաց Մերի Քոչարյանը:

Աշխատանքը գրել են երկուսով և երգի սկզբնական հատվածը կատարում է Մերին, իսկ երկրորդ հատվածը Հրանտը:
«Յուրաքանչյուրս մեր երգի հատվածն ենք գրել: Ես լսեցի Մերիի հատվածն ու ռեփը գրեցի, որը հենց հաջորդ օրն ուղարկել եմ, բայց երգի այդ հատվածի վրա երկար աշխատել ենք, փոփոխել ենք: Երգելու հետ կապված, քանի որ չունեմ կրթություն Մերին շատ է օգնել և աջակցել: Կարող եմ ասել, որ մի քանի անգամ տեքստը փոփոխության է ենթարկվել մինչև վերջնական տարբերակին հասնելը»,- ասաց Հրանտ Հովսեփյանը:

Մերի Քոչարյանը նշեց, որ Հրանտի ոգևորվածությունը վարակիչ էր և կարողացել են հեշտ համագործակցել: 

«Շատ թեթև է գնացել ամեն բան, իսկ նման համագործակցությունների պարագայում այդպես հազվադեպ է ստացվում: Մենք կարողանում էինք միմյանց լսել և հասկանալ, որն ամենակարևորն է ստանանք նման աշխատանք: Բնականաբար երգը սիրո մասին է և տողերը հենց մեր հոգու ներսից են և կարևոր է, որ մենք զգում ենք երգը, զգում ենք բառերը»,- նշեց Մերի Քոչարյանը: 

Ստեղծագործական փուլը տևել է մոտ 5 ամիս: Հետագայում տարբեր հատվածներում կայացել են տեսահոլովակի նկարահանումները, որի գլխավոր հերոսները հենց իրենք են: Մեզ հետ զրույցում ստեղծագործական զույգը պատմեց, որ հեռուստասերիալի արձակուրդի ժամանակատվածում նրանք զբաղվել են տեսահոլովակի նկարահանումներով և ձայնագրման գործընթացով: