«Պայքարի՛ր, Երևան»․ Ժողովրդավարական համախմբում կուսակցությունը չշեղվեց քաղաքական օրակարգից

Երկու օրից կկայանա Երևանի ավագանու հերթական ընտրությունները։ 5-րդ անգամ մայրաքաղաքի բնակիչները իրենց քվեով կձևավորեն տեղական ինքնակառավարման բարձրագույն ներկայացուցչական մարմինը։ Ավագանու այս ընտրություններն աչքի են ընկնում մասնակցության հայտ ներկայացրած քաղաքական ուժերի մեծ թվով՝ 13 կուսակցություն, 1 դաշինք, բայց մեծ հաշվով չեն տարբերվում նախորդներից բովանդակությամբ՝ քաղաքային խնդիրներ, խոստումներ ու նախընտրական ծրագրեր։ Կարճ ասած՝ երևանցուն ծանոթ օրակարգեր ու խոստումներ։

Ավագանու այս ընտրությունները նախորդներից տարբերվում է հասարակության մոտ տիրող զգացմունքայնությամբ ու երկրի գլխին կախված անվտանգային խնդիրներով։ Եթե նախկինում հասարակության մտահոգությունները միայն քաղաքային խնդիրներով էին սահմանափակվում, ապա այսօր անվտանգային խնդիրներն են առաջնային։

  Քաղաքական 13 ուժերը երևանցիներին ներկայանում են հիմնականում քաղաքային խնդիրներին վերաբերող ծրագրերով, որոշ ուժեր նաև քաղաքական հարցեր են ներառել։ Միայն մեկ ուժ՝ «Ժողովրդավարական համախմբում» կուսակցությունն է, որ առաջին օրից առանձնացավ իր ծրագրով՝ չներառելով որևէ քաղաքային խնդիր ու ներկայանալով բացառապես քաղաքական օրակարգով, առաջարկելով ինքնության հեղափոխություն, պայքար՝ հանուն արժեքների ու արժեհամակարգի, վերաարժևորում ու վերաիմաստավորում սեփական կյանքի ու վարքի։

Քարոզարշավի մեծ մասն արդեն անցյալում է, ընդամենը 2 օրից երևանցին ընտրության կգնա։ Այս օրերի ընթացքում քաղաքական մյուս ուժերից ոմանք ևս խոսեցին իրենց ծրագրում քաղաքական բաղադրիչի առկայության մասին, կարևորեցին այն, բայց և արագ կրկին անցում կատարեցին քաղաքային խնդիրներին, պարզաբանելով, որ սա քաղաքային ընտրություն է։ Ասվածի ամենավառ ապացույցն էր երեկ՝ Հանրային հեռուստաընկերության եթերում տեղի ունեցած բանավեճը, որին մասնակցում էին ավագանու ընտրություններին մասնակցող քաղաքական ուժերի առաջին համարները։ Շուրջ 3 ժամ տևած բանավեճի ընթացքում որևէ մեկն այդպես էլ չխոսեց քաղաքական կարևոր խնդիրներից։ Սա արձանագրեց նաև Ժողովրդավարական համախմբում կուսակցության նախագահ Սուրեն Պետրոսյանը, ով ավելի վաղ նաև կոչ էր արել մյուս ուժերին միանալ և առաջ գնալ քաղաքական օրակարգով։

«Քաղաքային խնդիրների լուծումը ավագանու պարտքն ու ամենօրյա գործն է, որ պետք չէ մեզ մատուցել որպես մեծագույն նվեր։ Մենք այսօր ավելի կարևոր խնդիրներ ունենք՝ ուզում ենք, որ մարդիկ չհամակերպվեն նվաստացման ու ստորացման հետ, ուզում ենք, որ պայքարեն հանուն իրենց վաղվա օրվա՝ արժանապատիվ ու արժանավայել կյանքի համար, ուզում ենք, որ վերաարժևորեն իրենց դերակատարումը։ Պատմության մեջ չի եղել մի դեպք, երբ հնարավոր է եղել երկրում առկա ճգնաժամերը հաղթահարել առանց պայքարի օրակագի, առանց այն օրակարգի, որ մենք ենք այսօր առաջ տանում», - ասում է «Ժողովրդավարական համախմբում» կուսակցության ղեկավար Սուրեն Պետրոսյանը։

Կուսակցությունը քարոզարշավը սկսել ու շարունակում է բացառապես քաղաքական օրակարգով, առանց շեղվելու օրակարգից։ Ասում են, իրենց ո՛չ քաղաքապետի պաշտոնն է հետաքրքրում, ո՛չ էլ ավագանին, միայն ուզում են օրակարգը հասցնել մարդկանց՝ ինքնության հեղափոխություն (հեղափոխություն հանուն ինքնության) անելու համար։ Օրակարգին տված քվեները հիմք կդառնան արագ փոփոխությունների ու ընդհուպ իշխանափոխություն են խոստանում անգամ 10 տոկոս քվե ստանալու դեպքում։ Կուսակցությունը ընտրություններին մասնակցում է «Պայքարի՛ր, Երևան» կարգախոսով։