Թող առաջնահերթ առողջ լինեն, ապա նաև՝ տնտեսապես ու ֆինանսապես բարեկեցիկ. Ալեքսանդր Բաբասյան

Aysor.am-ը գրում է.

Արդեն 2016 թվականն է, նոր հույսեր, սպասումներ ու երազանքներ: Aysor.am-ը տոնական օրերին հյուրընկալել է երիտասարդ դերասան Ալեքսանդր Բաբասյանին, ով վերջին տարիներին ապրում է Ռուսաստանի Դաշնությունում՝ ուժերը փորձելով նաև ռեստորանային բիզնեսում:

-Ալեքսանդր, մեկ-երկու ամիս առաջ, երբ Ձեր ընտանիքի հետ Հայաստանում էիք գտնվում հանգստանալու նպատակով, ասացիք, որ ֆիլմերում նկարահանվելու մի քանի առաջարկներ եք ստացել:
-Այո, իսկապես, երկու գեղարվեստական ֆիլմերից առաջարկներ ունեմ, որոնցից մեկը պատմական է, մյուսը՝ մելոդրամա: Ֆիլմերի ռեժիսորների և պրոդյուսերների հետ անընդհատ կապի մեջ եմ և գիտեմ, որ երկուսն էլ դեռևս չեն սկսել նկարահանումները, քանի որ բյուջեները հաստատված չեն: Ինքս էլ սպասում եմ, որ նկարահանումները սկսվեն: Անկախ նրանից, թե այդ ընթացքում աշխարհի որ ծայրում կլինեմ, անպայման կվերադառման ու կմասնակցեմ նկարահանումներին, քանի որ այն ինձ համար առավել կարևոր է: Թեև ասեմ, որ հիմա խորացած չեմ զբաղվում դերասանական արվեստով: Եթե կլինեն այլ հետաքրքիր առաջարկներ իմ ընկերների, ծանոթների կողմից՝ սիրով կհամաձայնեմ: Եթե ոչ՝ չեմ նեղվի, քանի որ իմ բիզնեսն այս պահին ինձ համար առավել կարևոր է:

-Իսկ սերիալային առաջարկներ չունե՞ք:
-Երբ Հայաստանում էի, առաջարկ ստացա նկարահանվել ​«Երանի» սերիալում: Բայց դե գիտեք, սերիալը ժամանակատար է, նկարահանվելու համար պետք է մեկ տարի անընդմեջ այդտեղ լինել, իսկ ես անգամ 7-8 ամիս չեմ կարող Հայաստանում գտնվել: Այնպես չի, որ ես ստորադասում եմ նկարահանումները, պարզապես այս պահին ինձ համար ընտանիքիս բարօրությունն ավելի կարևոր է:

-Այժմ այդտեղ ինչ զբաղվածություն ունե՞ք:
-Զբաղվածությունս հիմնականում ռեստորանային բիզնեսի ոլորտում է, աշխատում եմ առավոտից երեկո: Ցանկանում եմ իմ ռեստորանի աշխատանքներն ընդլայնել: Չեմ ուզում նույն տեղում մնալ անընդհատ, դա ինձ համար հետընթաց կկոչվի: Իհարկե, այստեղ ավելի շատ եմ աշխատում, քանի որ օտար երկիր է և այն շրջապատը, որը Հայաստանում ունեմ, այստեղ չունեմ: Սակայն շնորհակալ եմ իմ բոլոր մտերիմներին, ովքեր օգնում են, այդ թվում և կնոջս՝ Լիլիթի հայրիկին, ով այստեղ մեծ շրջապատ ունի և անհրաժեշտության դեպքում ինձ օգտակար է լինում:

-Չշրջանցենք տոնական տրամադրությունը. ինչպե՞ս, ի՞նչ միջավարում եք անցկացրել Նոր տարին:
-Նոր տարին ինձ համար ընտանեկան տոն է ու ես, միանշանակ, գերադասում եմ այդ օրը գտնվել ընտանեկան մթնոլորտում: Իհարկե, շատ ավելի ուշ կարելի է որևէ ժամանցային վայրում միանալ ընկերներին ու մտերիմներին: Ես և Լիլիթն այդպես էլ արել ենք: Այնպես է ստացվել, որ Ամանորի գիշերը որոշ չափով նաև աշխատավայրում՝ ռեստորանում եմ անցկացնում:

-Վստահ եմ, որ անակնկալներ պատրաստելու մեծ սիրահար եք:
-(ժպտում է) Ես նվերները սիրով տեղադրել էի տոնածառի տակ: Գիտեք, նվեր ընտրելիս մեկ մտածում եմ անակնկալի, մեկ էլ՝ անհրաժեշտ իրի գնման մասին: Արդյունքում, և՛ անակնկալ ես մատուցում, և՛ հաճելի նվեր անում: Իսկ, այ տղայիս շա՜տ-շա՜տ նվերներ ենք գնում, չէ՞ որ սա իր տոնն է, իր հրաշքը:

-Իսկ ինքնե՞րդ ինչ նախասիրություն ունեք, ի՞նչ եք սիրում, որ Ձեզ նվիրեն:
-Ամենացանկալի նվերն ինձ համար չսպասված նվերն է: Փառք Աստծո, այս պահին չունեմ այնպիսի պակաս մի բան, որը շատ կցանկանայի նվեր ստանալ: Այնպես որ, ինձ դուր է գալիս ձմեռ պապի խորհուրդն ու նրա մատուցած անակնկալը:

-Սիրո՞ւմ եք Ամանորին խոհանոցում լինել:
-Եթե անկեղծ՝ ես պատրաստելուց բավականին հեռու եմ: Կարծում եմ, եթե սեր ունենայի խոհանոցի հետ, ապա բավականին լավ կպատրաստեի, քանի որ ​«գուրման» եմ. ոչ թե սիրում եմ ուտել, այլ պաշտում եմ համով ուտեստները: Ինձ համարում եմ համեղ կերակրատեսակների մեծ երկրպագու:

-Եվ ի՞նչ եք առավել շատ սիրում Նոր տարվա սեղանից:
-Ամանորյա ճաշացանկից շատ-շատ եմ սիրում պասուց տոլման, բլինչիկը: Ճիշտ է, տարվա ընթացքում էլ են պատրաստվում այս ճաշատեսակները, բայց քանի որ դրանք մեր ամանորյա սեղանի զարդերն են, այդ օրերին առավել պահանջարկ ունեն ու առավել համեղ են: Հա, չմոռանամ, նաև խոզի բուդն եմ շատ սիրում: Այնքան շատ, որ տարվա ընթացքում մեկ-երկու անգամ պատրաստել եմ տալիս (ծիծաղում է):

-Ալեքսանդր, բոլորն այս օրերին ամփոփում են նախորդ տարին: Ինչպիսի՞ն էր Ձեզ համար 2015-ը:
-2015 թվականը բավականին հաջող ճանապարհեցի: Չեմ սխալվի, եթե ասեմ, որ իմ՝ դեռևս ապրած կյանքի լավագույն տարիներից մեկն էր: Չեմ դժգոհում և՛ գործնական, և՛ անձնական ու ընտանեկան տեսանկյունից:

-Իսկ ի՞նչ սպասելիքներ ունեք 2016-ից:
-Սպասելիքներս գործնական տիրույթում են: Իմ առջև նպատակ եմ դրել, որ այն պետք է լինի առաջընթացի, բիզնեսի մեջ ձեռքբերումների տարի:

-Շնորհավոր Ամանոր և Սուրբ Ծնունդ:
-Ես ևս շնորհավորում եմ Ամանորն ու Սուրբ Ծնունդը: Սնոտիապաշտ չեմ ու աստղագուշակներին չեմ հավատում, բայց երբեմն կարդում եմ այդ աստղագուշակներն ու տեղեկացված եմ, որ մարդկանց 60 տոկոսի համար 2016 թվականը շատ լավ տարի է լինելու: Ցանկանում եմ, որ բոլորի համար հաջողակ տարի լինի: Ամբողջ աշխարհում տնտեսական վիճակն օր-օրի վատանում է, թող առաջնահերթ առողջ լինեն, ապա նաև՝ տնտեսապես ու ֆինանսապես բարեկեցիկ: Թող ընտանիքներում հանգստություն ու խաղաղություն տիրի, սեր ու ջերմություն: Կյանքի բոլոր դժվարություններն ու անախորժությունները թող մնան նախորդ տարում: Սկսենք մեր օրը նորովի՝ չմոռանալով, իհարկե, մեր անցյալը, մեր ծնողներին ու պապերին: