«Ամենուր ելույթ եմ ունենում իմ պատմական հայրենիքի դրոշի ներքո». ավտոարշավորդ Արթուր Գորոյանն իր գլխավոր նպատակներից մեկը համարում է սպորտի հանրայնացումը

Հունվարի 21-ին Արաբական Միացյալ Էմիրությունների մայրաքաղաք Աբու Դաբիում կայացած վեցժամյա մրցավազքի TCR դասում հաղթել է «Sharky-Racing» թիմը, որի առաջատարը հայազգի արշավորդ Արթուր Գորոյանն է։ Նա իր թիմակից Ռոման Մավլանովի հետ մրցարշավում հանդես է եկել Audi RS3 դասի մեքենայով։ Հայաստանը ներկայացնող Գորոյանն ու Մավլանովը թեժ մրցապայքարում կարողացել են առավելության հասնել և մոտակա մրցակցից՝ «Wolf-Power Racing» թիմից 6 վայրկյան շուտ հասել եզրագծին ու հաղթանակ տոնել։ Ոչ մեկ անգամ ԶԼՄ-ների հետ զրույցներում Գորոյանն ասել էր, որ իր համար մեծ պատիվ է Հայաստանի դրոշի ներքո հանդես գալը։ «Իմ դրոշը հայկականն է»,-ասել էր նա:

Հաղթանակից հետո Արթուր Գորոյանը ժամանել է Հայաստան և հայ մարզասերների ու լրագրողների հետ կիսվում է ձեռքբերումների և ծրագրերի մասին՝ իհարկե, այդ ընթացքում նաև լրատվամիջոցների ներկայացուցիչներից շնորհավորանքներ ստանալով:

Արթուր Գորոյանը ծնունդով Ջավախքից է, բայց կարիերան սկսել և շարունակել է Ռուսաստանի Դաշնությունում և Գերմանիայում: Զրույց-հանդիպման մեկնարկին նախ ասում է` տանը մեր լեզուն հայերենն է եղել, բայց տեխնիկական տարբեր նրբությունների, ինչպես նաև իմ մարզաձևի մասին խոսելիս կնախընտրեի մանրամասնությունները փոխանցել ռուսերենով` սխալվելու հավանականությունը բացառելու համար: «Սպորտով զբաղվում եմ ավելի քան 10 տարի: Հիմնականում մասնակցում եմ մրցումների Գերմանիայում, դրանք կոչվում են դիմացկունության մրցումներ: Թերևս չեմ սխալվի, եթե ասեմ, որ Գերմանիայում ամենալավ, բայց միևնույն ժամանակ ամենավտանգավոր մրցուղին է»,-ասում է Գորոյանը:

Նրա խոսքով, որպես մարզիկ իր գլխավոր նպատակն այն է, որ հասարակության մեծ մասը զբաղվի սպորտով, իհարկե, հատկապես երիտասարդները: «Նրանք պետք է հեռու մնան ալկոհոլից, թմրանյութերից և ծխախոտից: Սպորտի հանրայնացումը յուրաքանչյուր մարզիկի գլխավոր նպատակն է, անկախ նրանից՝ նա զբաղվում է, ասենք, ըմբշամարտով, բռնցքամարտով, թե ավտոարշավորդ է, ինչպես ես: Կարևոր է նաև, որ Հայաստանի մասին իմանան ամբողջ աշխարհում` նախկին ԽՍՀՄ տարածքից դուրս: Գերմանիայում մինչև օրս ես միակ հայ ավտոարշավորդն եմ: Այնտեղ ցուցակի առաջին հորիզոնականում միշտ իմ անուն-ազգանունն է: Կցանկանայի, որ աշխարհի տարբեր անկյուններում բնակվող հայ մարզիկներն օրինակ վերցնեին իմ որոշումից, ստանային հայկական արտոնագիր: Սա մեծապես կնպաստեր Հայաստանն ավելի ճանաչելի դարձնելուն: Այս վերջին մրցավազքը, որը տեղի ունեցավ Աբու Դաբիում, նույնպես այդ նպատակն էր հետապնդում: Այս ասուլիս-հանդիպումը միտված է նրան, որ աշխարհի տարբեր երկրներում բնակվող մեր սպորտսմենները հայկական արտոնագիր ստանան և տարբեր մրցումների ժամանակ ներկայացնեն Հայաստանը»,-նշում է Գորոյանը:

Ավտոարշավորդն ընդգծում է` ընտանիքն ապրում է Ռուսաստանում, ինքը լինում է տարբեր երկրներում՝ Գերմանիա, Ֆրանսիա, Իտալիա: «Մրցարշավների մասնակցելու համար տարբեր երկրներ եմ մեկնում, ավելի հաճախ Գերմանիա, ավելի քիչ` Իտալիա, Ֆրանսիա, Աբու Դաբի: Եթե հիմա ինձ հարցնեն, թե որտեղ ես ապրում, այդ հարցին պատասխանել չեմ կարող: Որպես մարզիկ` բնակության վայր կարծես չունենամ, բայց ամենուր ելույթ եմ ունենում իմ պատմական հայրենիքի` Հայաստանի դրոշի ներքո, և այստեղ ես ինձ տանն եմ զգում»,-եզրափակում է նա:

Լուսինե Առաքելյան