2016-ին ավելի ակտիվ տնտեսություն և ավելի լավ արդյունքներ ենք ունենալու. ՀՀ վարչապետ

ՀՀ վարչապետ Հովիկ Աբրահամյանը վստահեցնում է, որ կառավարությունը 2016 թվականի կանի ամեն ինչ՝ պետբյուջեով նախատեսված 2,2 տոկոս տնտեսական աճից ավելին ապահովելու համար: Այդ մասին ՀՀ վարչապետը նշեց ՀՀ պաշտպանության նախարարության N զորամասի մարտական հենակետում լրագրողների հետ զրույցում:

Խոսելով այս տարվա տնտեսական աճի մասին՝ վարչապետը նշեց, որ կառավարությունն արել է անհնարինը ու խորհուրդ տվեց տեսնել, թե աշխարհաքաղաքական իրողությունների հետևանքով մեր հարևան ու գործընկեր երկրների տնտեսություններն ինչ իրավիճակում են: «Մենք որևէ սոցիալական ծրագիր, ծախս չենք կրճատել, նախատեսված բոլոր ծրագրերն իրականացրել ենք, բոլորը ֆինանսավորվել են, և դա մեծ ձեռքբերում է: Այս իրավիճակում 3 տոկոս տնտեսական աճ ունենալն իրոք ձեռքբերում է, բայց բավարար չէ մեզ համար: Մենք շարունակելու ենք գնալ առաջ»,- «Արմենպրես»-ի փոխանցմամբ՝ ասաց վարչապետը:  

Նա տեղեկացրեց, որ արդեն հունվարի 4-ին մի քանի կարևոր հարցերի շուրջ կառավարությունում կազմակերպվելու է խորհրդակցություն: «Կտեսնեք, որ մենք 2016-ին ավելի ակտիվ ենք լինելու, ավելի ակտիվ տնտեսություն և ավելի լավ արդյունքներ ենք ունենալու»,- ասաց վարչապետը:

Միաժամանակ, ի պատասխան գործադիրում փոփոխությունների հնարավորության մասին հարցին՝ Հովիկ Աբրահամյանը նշեց, որ կառավարությունում փոփոխություններ միշտ կարող են լինել: