Հայաստանի երիտասարդական հիմնադրամը դրամական օգնություն և սնունդ է տրամադրել անապահով երեք ընտանիքի

Հայաստանի երիտասարդական հիմնադրամը (ՀԵՀ) սոցիալապես անապահով երեք ընտանիքի ամանորյա անակնկալ է մատուցել`տրամադրելով դրամական օգնություն և սնունդ: Ինչպես «Արմենպրես»-ին տեղեկացրին Հայաստանի երիտասարդական հիմնադրամի հասարակայնության հետ կապերի ծառայությունից, ՀԵՀ-ի աշխատակիցներն ու կամավորները նախ այցելել են Էջմիածնի Ակնաշեն գյուղի Հովհաննիսյանների ընտանիքին: Չունենալով սեփական տանիք` նրանք ապրում են գյուղի հին մանկապարտեզում` մի քանի այլ ընտանիքների հետ միասին: Տան մայրը` տիկին Անահիտը, ունի առողջական խնդիրներ:

Այնուհետև հերթը Երևանում բնակվող անապահով ընտանիքինն էր: Տիկին Գայանեն և նրա 3 զավակները բնակվում են Մալաթիա-Սեբաստիա համայնքում: Տան որդին` Մարտիկը, հիվանդ է էպիլեպսիայով: Այս ընտանիքին ևս դրամական օգնություն և սնունդ է տրամադրվել, ինչի շնորհիվ կկարողանան հոգալ առօրյա հոգսերը: 

Երրորդ ընտանիքը բնակվում է Նորքի զանգվածի հանրակացարանում: Ընտանիքի մայրը՝ տիկին Արմինեն, ունի երեք որդի. 2-ը դպրոցական են, իսկ երրորդը հաճախում է մանկապարտեզ: Ընտանիքն ունի երեխայի մանկապարտեզի վարձը վճարելու խնդիր, ինչը ևս հնարավոր կլինի հոգալ հիմնադրամի տրամադրած աջակցությամբ:

ՀԵՀ-ն անապահով այս ընտանիքներին աջակցում է սոցիալական ցանցերում ակտիվ օգտատետերի գրառումներին հետամուտ լինելով: Մասնավորապես, նրանք գրառումներ էին կատարել ՀԵՀ հոգաբարձուների խորհրդի համակարգող, ՀՀ ԱԺ պատգամավոր Կարեն Ավագյանի ֆեյսբուքյան էջին՝ տեղեկացնելով, որ նշված ընտանիքներն ունեն աջակցության կարիք: Այս առիթով Կարեն Ավագյանը շեշտել է. «Հիմնադրամը տարվա ընթացքում իրականացնում է տարբեր ծրագրեր սոցիալապես անապահով ընտանիքների համար, սակայն կային այնպիսինները, որոնք դուրս էին մնացել մեր տեսադաÕ �տից: Ուստի, այդ ընտանիքների մասին մենք տեղեկացանք սոցցանցերի միջոցով, և նրանց ևս ընդգրկեցինք մեր ծրագրերում: Ժամանակ առ ժամանակ հիմնադրամն իրականացնում է սոցիալական ծրագրեր, որոնց թիրախը երիտասարդներն են, սակայն սոցիալական խոցելի խմբերում գտնվող ընտանիքները ևս այդ ծրագրերի առանցքում են»: Հիմնադրամը տարվա ընթացքում աջակցություն է ցուցաբերել նաև սահմանամերձ համայնքներում գտնվող սոցիալապես անապահով ընտանիքներին: