Ռուսական ավիացիան Սիրիայում ոչ մի անգամ քաղաքացիական օբյեկտներ գրոհի չի ենթարկել. հրամանատար

Ռուսաստանցի օդաչուները Սիրիայում ոչ մի անգամ գրոհի չեն ենթարկել քաղաքացիական օբյեկտները։ Այս մասին «Ռոսիա 24» հեռութստաալիքի եթերում հայտարարել է ՌԴ օդատիեզերական ուժերի (ՕՏՈՒ) գլխավոր հրամանատար, գեներալ-գնդապետ Վիկտոր Բոնդարևը։  

«Ես ցանկանում եմ արժանապատվության զգացումով ասել, որ իմ օդաչուներն այնտեղ գտնվելու ընթացքում ոչ մի անգամ չեն վրիպել, ոչ մի ամգամ հարված չեն հասցրել «արգելված» օբյեկտներին, այսպես կոչված, «զգայուն տեղերին», ինչպիսիք են դպրոցները, հիվանդանոցները, մզկիթներն, այլ սրբավայրեր»,- նշել է նա։

Բոնդարևի խոսքով՝ Սիրայում գործողությունը մանրակրկիտ մտածված էր։ «Մենք նախապատրաստել ենք թռիչքակազմը, մշակել ենք փոխգործակցությունը և՛ սիրիական ղեկավարության և մեր հետախուզական մարմինների հետ։ Ճշտել ենք, թե որտեղ ինչ է գտնվում, որ շրջանների նկատմամբ կարող ենք աշխատել, որի նկատմամբ՝ շատ զգույշ»,- ընդգծել է նա։

«Դրա շնորհիվ, արդյունքներն ինքներդ եք տեսնում»,- հավելել է հրամանատարը։ Ինչպես հաղորդում է «Արմենպրես»-ը, վկայակոչելով ՏԱՍՍ-ը, Բոնդարևը նշել է, որ հենց սկզբից ՌԴ ՕՏՈՒ-ն հանրությանը բաց տեղեկացրել է Սիրիայում նպատակների և արդյուքների մասին։

Ավելի վաղ Human Rights Watch-ը Մոսկվային մեղադրել է կասետային զինամթերքի կիրառման մեջ, ինչից, իրավապաշտպանների տվյալներով, խաղաղ բնակիչներ են զոհվել։