«Ես և Իրինան ճանաչեցինք իրար ու հասկացանք, որ իրար համար չենք». Ռաֆֆ Հարությունյան

Երիտասարդ երգիչ և դերասան Ռաֆֆ Հարությունյանի մոտ այս փուլում մասնագիտական բուռն շրջան է, նա իր առաջին քայլերն է անում հեռուստատեսային ոլորտում և այժմ նկարահանվում է «Լքված ամրոցի պահապանները» հեռուստասերիալում: Tert.am Life-ի հետ զրույցում նա խոսել է դերասանական կարիերայի, երաժշտության ոլորտում հետագա ծրագրերի և անձնական կյանքի մասին:

«Այժմ սովորում եմ Երևանի թատրոնի և կինոյի պետական ինստիտուտի 2-րդ կուրսում՝ Դերասանական արվեստ ֆակուլտետում ու փորձում եմ համատեղել նկարահանումներն ու դասերս, քանի որ սովորում եմ գերազանց և անվճար համակարգում,- ասաց նա՝ հավելելով, որ նախկինում ևս հեռուստասերիալներում նկարահանվելու ցանկություն ունեցել է:

«Մասնակցության համար ստացել եմ հրավեր, որից հետո մասնակցել եմ քաստինգի ու ստացել այս դերը: Ունենք բավականին լավ դերասանական կազմ, ինչի արդյունքում, չնայած առաջին փորձս է, բայց կարողացել եմ բավականին արագ ինտեգրվել խաղահրապարակում»,-ասաց Ռաֆֆ Հարությունյանը:

Նա ընդգծեց, որ նկարահանումների սկզբնական շրջանում բախվել է դժվարությունների:

«Սկզբում ռեժիսորն այդքան էլ գոհ չէր իմ աշխատանքից: Կատակելով ասում էր՝ Ռաֆ այսօր երկուս ես ստանում, իսկ հիմա, երբ ավելի վարժ եմ դարձել ու հնարավորինս լավ մարմնավորում եմ կերպարը, ասում է՝ հինգ ես ստանում»,- ասաց Ռաֆֆը և հավելեց, որ տարբերվում է իր մարմնավորած կերպարից,- Մարմնավորում եմ շատ բարի կերպարի՝ Միքոյին, իրական կյանքում ևս բարի եմ, բայց ոչ այդ աստիճանի, սերիալում իմ կերպարը մերժվում է աղջկա կողմից, բայց իրականում ես չեմ սիրում մերժվել, իսկ մերժվելուց հետո վստահաբար 2-րդ քայլ չեմ անում ի տարբերություն Միքոյի»:

Ռաֆֆ Հարությունյանը լսարանին հայտնի է որպես երգիչ: Իր և Դավիդ Գրեգի համատեղ տեսահոլովակն այս պահի դրությամբ ունի 14 մլն դիտում:

«Ես արտիստ եմ ու դա իրենից ենթադրում է շատ բաներ ես երգում եմ, զբաղվում դերասանությամբ, նկարում տեսահոլովակներ՝ արտիստ ասելով պետք է դա հասկանալ: Շատ փոքր տարիքից երգում եմ, հիմա նույնպես աշխատում եմ ձայնիս ու երգերիս վրա՝ քրտնաջան զբաղվում եմ իմ երկու մասնագիտությունների ուղղությամբ»,- ասաց նա՝ նշելով, որ նախկինում ևս սովորել է դերասանական ստուդիայում:

«Սովորել եմ նաև Երևանի ինֆորմատիկայի պետական քոլեջում, մի օր կարող են ինձ նաև տեխնիկի կամ էլեկտրիկի մասնագիտությամբ էլ տեսնել, դա նորմալ է: Համատեղ սովորում էի նաև դրամատիկական ստուդիայում, բայց երբ գնացի բանակ ու վերադարձա, չէի ցանկանում վերականգնել գործերս ստուդիայում ու ընդունվեցի թատերական: Ուզում եմ նաև ուժերս փորձել ռեժիսուրայի ոլորտում ու ներկայացում բեմադրել»,- ասաց նա:

Խոսելով անձնական կյանքի մասին՝ դերասանը շեշտեց, որ նման բնույթի հարցեր սոցիալական ցանցերում ևս շատ են բարձրաձայնում, բայց չի պատասխանում:

«Հարաբերություններում կա փուլ, երբ մարդիկ պետք է փորձեն ճանաչել իրար ու մեզ մոտ դա կոչվում է ընկերություն անել, երբ Իրինան (դերասանուհի Իրինա Այվազյանը-խմբ․) հարցազրույցներից մեկի ժամանակ ասաց, որ ընկերություն ենք անում, դեռ նոր էր այդ ամենն ու ճանաչման փուլն էր մեզ մոտ, երբ ճանաչել ենք միմյանց, հասկացել ենք, որ երկուսս էլ լավն ենք, բայց ոչ իրար համար: Երբ եթեր գնաց մեր մասնակցությամբ համատեղ հաղորդումը, արդեն իսկ գրեթե բաժանված էինք,- ասաց Ռաֆֆը և հավալեց, որ չի սիրում, երբ իր անձնական կյանքի մասին խոսում են:

Թերեզա Հովհաննիսյան