ՀԵՐՔՈՒՄ

 

Ի պատասխան past.am լրատվական կայքում 22.02.2022թ. «Աստղադիտարանի բյուջեի հետ վարվում են ինչպես սեփական բյուջեի հետ. «Փաստ» վերտառությամբ հրապարակման հայտնում ենք, որ հեղինակը տարածում է իրականությանը չհամապատասխանող տեղեկատվություն, կատարում է իրականությանը չհամապատասխանող պնդումներ, որոնք արատավորում են Աստղադիտարանի համբավը և դրա ղեկավարության պատիվը և արժանապատվությունը:

Նշենք, որ ՀՀ ԳԱԱ «Վ. Համբարձումյանի անվան Բյուրականի աստղադիտարան» ՊՈԱԿ-ի (այսուհետ՝ Աստղադիտարան) բյուջեի կատարման նկատմամբ իրականացվում է օրենսդրությամբ սահմանված վերահսկողություն, որի արդյունքում բյուջեի միջոցները կամայական և ոչ նպատակային կերպով ծախսելու փաստեր երբեք չեն արձանագրվել:

Աստղադիտարանը հանդիսանում է Հայաստանի Հանրապետության առաջատար գիտական հիմնարկներից մեկը, որի հեղինակությունը միջազգային ասպարեզում տարեց տարի միայն ամրապնդվում է: Աստղադիտարանում իրականացվում են բազմաթիվ գիտական նպատակային և բովանդակային աշխատանքներ, մասնավորապես, ՀՀ ԳԿ առաջատար հետազտությունների 2 և թեմատիկ 1 նախագիծ։ Աստղադիտարանի 35 գիտաշխատողներից 12-ն ընդգրկված են ԳԿ առաջատար հետազոտությունների նախագծերում, ՀՀ միջինից մոտ 4 անգամ ավելի։ Մեկ այլ ցուցանիշ․ 2000-2021թթ․ տրվել է մոտ 550 ANSEF դրամաշնորհ, որից 45-ը՝ Աստղադիտարանին, այսինքն միջինից 8 անգամ ավելի բարձր։ Ամեն տարի գիտական արդյունավետությամբ Աստղադիտարանը մտնում է ՀՀ ինստիտուտների առաջին եռյակի մեջ։ Մեկ գիտաշխատողին բաժին ընկնող գիտական հրապարակումներով Աստղադիտարանը նույնպես ՀՀ գիտական ինստիտուտների մեջ առաջիններից մեկն է։

Աստղադիտարանի բազմածավալ գործունեության ծանոթանալ ցանկացող ընթերցողների համար բերում ենք մի քանի հղումներ․

• Աստղադիտարանի պաշտոնական կարգավիճակները (ՀՀ Ազգային արժեք, ՄԱՄ տարածաշրջանային կենտրոն, ՅՈՒՆԵՍԿՕ-ի փաստագրական արժեք և այլն)՝ https://www.bao.am/about/about/about.php
• վերջին տարիների և ընթացիկ նախագծեր՝ https://www.bao.am/activities/projects.php
• միջազգային համագործակցություն՝ https://www.bao.am/activities/collaborations.php
• գիտական հրապարակումներ՝ https://www.bao.am/publications/publications.php
• սեմինարներ https://www.bao.am/seminars/past.php
• գիտաժողովներ և երիտասարդական դպրոցներ՝ https://www.bao.am/meetings/meetings.php
• 2021թ․ տարեկան հաշվետվություն՝ https://www.bao.am/reports/2021.pdf
• լրատվամիջոցների (նաև արտասահմանյան լրատվամիջոցների) անդրադարձը Աստղադիտարանին՝ https://www.bao.am/massmedia/massmedia.php

Հրապարակման մեջ խոսք է գնում այն մասին, որ Աստղադիտարանում իբր տեղի են ունենում խախտումներ, որոնք բացահայտվել են ՀՀ ֆինանսների նախարարության կողմից իրականացված ստուգումների ընթացքում: Հակիրճ անդրադառնանք յուրաքանչյուր «մեղադրանքին»:

Նախ, այն փաստը, որ Աստղադիտարանը կատարել է պայմանագրային իր պարտականությունները, սակայն պայմանագրի մյուս կողմը ուշացրել է վճարումները, որևէ կերպ չեն կարող գնահատվել որպես Աստղադիտարանի չարաշահում: Պետք է նաև նշել, որ Աստղադիտարանի գործընկեր «Ռոսկոսմոսը» հեղինակի կողմից նշված պայմանագրով բոլոր վճարումներն արդեն կատարել է:

Ինչ վերաբերում է Աստղադիտարանի տարածքում գործող հյուրատան աշխատանքներին, ապա նշենք, որ դրա գործունեությունը կանոնակարգվում է Աստղադիտարանի ներքին իրավական ակտերով, որոնց խախտման փաստ առկա չէ: Նշենք նաև, որ այն ժամանակահատվածում, երբ Աստղադիտարանը պետք է ունենար հսկիչ դրամարկղային մեքենա, դրա առկայությունն ապահովվել է և Աստղադիտարանը պատշաճ կատարել է բոլոր հարկային պարտավորությունները:

Նշենք, որ ստուգում իրականացնող ՀՀ ֆինանսների նախարարությանը մանրամասն ներկայացվել են բացատրություններ և դրանք հիմնավորող ապացույցներ, որոնցից բխում է, որ Աստղադիտարանը աշխատում է օրենսդրությամբ սահմանված պահանջների պահպանմամբ: Հետևաբար՝ պետք չէ կասկածի տակ դնել պետական մարմինների գործունեությունը և առավել ևս պետք չէ ենթադրությունների մակարդակով սխալ հետևություններ անել: 

Աստղադիտարանի ղեկավարությունը միշտ բաց է եղել լրագրողների և հանրության հետ շփումների մեջ և պատրաստակամ է հանրային հետաքրքրություն ներկայացնող ցանկացած հարցի վերաբերյալ տալ պարզաբանումներ:

Վերջում հորդորում ենք past.am կայքի խմբագրությանը և նյութի հեղինակին հետայսու ձեռնպահ մնալ Աստղադիտարանի և դրա ղեկավարության հասցեին իրականությանը չհամապատասխանող և ենթադրությունների վրա հիմնված ու չստուգված տեղեկություններ տարածելուց: Հրապարակման հեղինակը զրպարտում է թե՛ Աստղադիտարանը, թե՛ դրա ղեկավարությանը և թե՛ այն գիտնականներին, որոնք մեծ նվիրումով աշխատում են ի նպաստ հայ գիտությանը։

ՀՀ ԳԱԱ «Վ. Համբարձումյանի անվան 

Բյուրականի աստղադիտարան» ՊՈԱԿ-ի

տնօրեն՝ Արեգ Միքայելյան