«Բոլոր էմոցիաներս ներդրել եմ այդ երգում, դրա համար ստացվեց հիպնոսացնող երաժշտություն»․ Վաչե Ամարյանի կտրուկ հաջողությունն ու անցած ճանապարհը

Ժամանակին Հայաստանում ամեն անկյունից հնչում էր «Բալա» երգը․ հենց այսպես լսարանին հայտնի դարձավ ռուսաստանաբնակ հայ երգիչ Վաչե Ամարյանի անունը։ Հետագայում նա իր ուղին շարունակեց ոչ միայն որպես երգիչ, այլև դերասան։ Վաչե Ամարյանը հազվադեպ է հարցազրույցներ տալիս, սակայն Tert.am Life–ի համար բացառություն է արել և զրուցել իր ստեղծագործական կյանքի, անցած ճանապարհի մասին:

Առաջին հաջողությունը

40-ամյա երգչին հաջողությունը ժպտաց 2013–ին։ Ասում է՝ առաջին հիթի մեջ ներդրել էր բոլոր հույզերը, դրա համար էլ հաջողեց։

«Ինքս էլ չէի պատկերացնում, որ այդպիսի հաջողություն կունենամ։ Ռուսաստանում մեծ պահանջարկ ունեի, քանի որ տարբեր ոճերի երգեր էի կատարում, ու դա հետաքրքրում էր ժողովրդին։ Մտածում էի` մի տեսահոլովակ թողարկեմ, բայց որ այսպիսի հաջողություն կունենայի, չէի էլ պատկերացնում։ «Բալա»–ի մեջ շատ մեծ կյանք կա։ Այդ երգը ես եմ․ իմ բոլոր էմոցիաները ներդրել եմ երգում, դրա համար ստացվեց երաժշտություն, որը մարդուն հիպնոսացնում է։ Այդ ամենից հետո ես միանգամից 12 երգ թողարկեցի, որն ինձ ավելի մեծ հաջողություն բերեց»,– ասաց նա։

Մի պահ աստղայինս տարավ

Երգիչը խոստովանում է, որ անսպասելի հաջողությունն իր հետ բերեց նաև աստղային հիվանդություն․ «Այն կարողացա հաղթահարել, քանի որ այդ շրջանում կողքիս էին Կարենն ու Սևակը (Կարեն Սևակ փրոդաքշընի հիմնադիրները 4 տարի եղել են Վաչեի պրոդյուսերները, հեղ․)։ Հիմա ավելի հասարակ եմ դարձել։ Հասկացա, որ դա մեր հայերի համար չէ։ Մեր հասարակությունը պարզություն է սիրում։ Հասարակ օրինակ, պրոֆեսիոնալ լուսանկարդ կարող է այնքան հավանումներ չունենա, որքան առանց ֆիլտր և մշակման սելֆին, որովհետև այդտեղ դու այնպիսին ես, ինչպիսին կաս»։

Ինչպես համագործակցեց Լիլիթ Հովհաննիսյանի հետ

Երբ թողարկվեց Վաչե Ամարյանի և Լիլիթ Հովհաննիսյանի զուգերգը, շատերն անակնկալի եկան։ Վերջին տարիներին Լիլիթը, գրեթե, զուգերգով չի ներկայանում։ Վաչեն պատմեց, որ զուգերգ կատարելու որոշումը շատ արագ են կայացրել երգչուհու ամուսնու և պրոդյուսերի՝ Վահրամ Պետրոսյանի և Կարեն-Սևակ երաժշտական դուետի հետ առցանց հեռախոսազրույցի ժամանակ։

«Վահրամն իմ լավ ընկերն է, խոսակցության ժամանակ որոշեցինք զուգերգ անել, որը շատ մեծ հաջողություն կունենա։ Զրույցն ավարտեցինք, ես 15 րոպեում գրեցի երաժշտությունը՝ պատկերացնելով ինձ ու Լիլիթին։ Հենց «Ու էլի» արտահայտությամբ էլ ծնվեց երաժշտությունը, խոսքերը գրելիս Վահրամը պահպանեց այդ արտահայտությունը։ Երգը շատ մեծ հաջողություն ունեցավ, ինչպես կանխատեսել էինք։ Շատ հաճելի էր աշխատել Լիլիթի հետ»,– պատմեց նա։

Ոճային փոփոխությունս ընդունվեց

Երգիչը գարնանը թողարկեց «Настроение Кайф» երգի տեսահոլովակը։ Ասում է՝ հատուկ նպատակ ուներ դրական տրամադրություն փոխանցել մարդկանց․ «Հետպատերազմական շրջանում շատ էի ցանկանում, որպեսզի մարդկանց տրամադրությունը փոխվի։ Կարծում եմ՝ պետք է նաև երաժշտությամբ դուրս գանք այդ վիճակից։ Երգս շատ սիրվեց։ Տարբեր ազգերի ներկայացուցիչներ են երգում այն, անգամ, ռուսերեն չիմացողները, իսկ դա շատ լավ գնահատական է։ Նախորդ ամիս էլ թողարկեցի «Տանում ա» երգի տեսահոլովակը, որը նույն տրամադրությամբ է։ Այս երգից էլ շատ լավ արձագանքներ ստացա։ Այս երգերով ոճային փոփոխություն արեցի, որը հանդիսատեսը սիրով ընդունեց։ Դրանից շատ եմ ոգևորվել»։

«Մեղրամսում» ինքս ինձ էի խաղում

«Ես կինոյի խելագար եմ։ Ինձ համար կարևոր գնահատական էր, որ ոլորտի պրոֆեսիոնալներն իմ մեջ դերասանական տաղանդ նկատեցին ու հրավիրեցին նկարահանվելու «Մեղրամիս» հեռուստասերիալում։ Ես այդ հեռուստասերիալում ինքս ինձ եմ խաղում։ Կարծում եմ՝ հենց այդ անկեղծությունն էր, որ սիրվեց մարդկանց կողմից։ 2 տարի նկարահանվելու արդյունքում հմտացա այդ ոլորտում։ Ինձ հետ խաղում էին պրոֆեսիոնալ դերասաններ՝ Արմեն Մարությանը, Անի Քոչարյանը։ Այնպես էի ոգևորվում, երբ ինձ գովում էին ու ասում, որ տաղանդ ունեմ»,– հիշեց Վաչեն։

Վաչեն դեռևս խաղացել է միայն «Մեղրամսում», բայց վստահեցնում է՝ հեռուստադիտողներն իրեն էլի կտեսնեն որպես դերասան․ «Ես ժողովրդին տալիս եմ այն, ինչ ինձնից ուզում են, իսկ մարդիկ ուզում են ինձ նորից տեսնել սերիալում»։

Ի դեպ, «Մեղրամիս» հեռուստասերիալում Վաչեն հանդես է եկել ոչ միայն որպես դերասան:  Սերիալի սաունդթրեքը՝ «Գտել եմ» երգը, կատարում է նա։ Այն ևս դարձավ հիթ, տեսահոլովակը միայն Վաչեի պաշտոնական յութուբյան ալիքում ունի ավելի քան 16 միլիոն դիտում։

Ընտանիք ունենալու երազանքը

«Ես միշտ երազում էի ընտանիք ունենալու մասին, բայց ուշ եմ ամուսնացել։ Երբ Ալեքսս ծնվեց, 34 տարեկան էի։ Սկսեցի խելագարվել իր համար, դարձա գժական պապա։) Ինձ հետ նույնիսկ նկարահանվել է որոշ տեսարաններում։ Հանուն երեխայիս ու կնոջս ամեն շաբաթ տոմս էի գնում, մեկնում Մոսկվա, որ տեսնեմ նրանց։ Երբ ծնվեց երկրորդ տղաս՝ Սերյոժան, այլ զգացողություն էր։ Ալեքսը կնոջս է նման, Սերյոժան իմ կրկնօրինակն է։ Նույնիսկ ծուռ խոսելն է իմը։ Նորից խելագարվեցի:) Աղջկիս 5 ամսական է։ Գիտեմ, որ ինքն էլ է խելքս տանելու։ Առաջ Աստված, ուզում ենք էլի երեխաներ ունենալ։ Սիրում եմ մեծ ընտանիք»,– անկեղծացավ Վաչեն։