ՀՀ առողջապահության նախարարությունը Հռոմի «Ջեմելի» հիվանդանոցի հետ նախանշել է համագործակցության ուղիները

 ՀՀ առողջապահության նախարար Արմեն Մուրադյանի և  Հռոմի «Ջեմելի» հիվանդանոցի միջազգային կապերի խորհրդատու Պաուլո Դիոնիզի հետ հանդիպման ժամանակ քննարկվել են առողջապահության ոլորտում հայ-իտալական համագործակցությանը վերաբերող հարցեր:

Ինչպես «Արմենպրես»-ին տեղեկացրին ՀՀ առողջապահության նախարարությունից, հյուրը նախարարին է ներկայացրել  ոչ միայն Իտալիայի, այլև Եվրոպայի ամենամեծ բժշկական կազմակերպություններից մեկի պատմությունը: Իր հիմնադրի անունը կրող «Ջեմելի» հիվանդանոցն ունի 50 տարվա պատմություն: Հիվանդանոցի անունը սերտորեն կապված է  Երկրորդ համաշխարհային պատերազմի տարիներին  Հռոմում հիմնադրված կաթոլիկ համալսարանի  հետ, որի շրջանավարտները հնարավորություն ունեն հմտանալ  և մասնագիտանալ նաև հիվանդանոցային մենեջմենթի ոլորտում:

««Ջեմելի հիվանդանոցի  տնօրենը բժիշկ չէ, այլ առողջապահության կազմակերիչ է, մենեջեր: Հիվանդանոցն ունի 3300 մահճակալ, շուրջ 6000 աշխատակից: Տարեկան  այն բժշկական օգնություն և սպասարկում է մատուցում ավելի քան 200  000  այցելուի: Այստեղ տարեկան կատարվում է շուրջ 250 000 վիրահատական միջամտություն»,- տեղեկացրել է  հիվանդանոցի ներկայացուցիչը` հավելելով, որ հանդիսանալով Հռոմի պապի կողմից մեծ ուշադրություն վայելող բժշկական հաստատություն, իրենք մեծապես  հետաքրքրված են Հայաստանի հետ առողջապահության ոլորտում համագործակցելու հնար ավորությամբ:

ՀՀ առողջապահության նախարար Արմեն Մուրադյանը շնորհակալություն է հայտնել  կառույցի գործունեությունը, կառուցվածքն ու պատմությունը  հանգամանալից ներկայացնելու համար:

«Մենք մշտապես կարևորում ենք նոր համագործակցությունների հնարավորությունները: Սա լավ և հեռանկարային սկիզբ  կարող է լինել»,-  ընդգծել է նախարարը:

 Բուժաշխատողների մասնագիտական կարողությունների բարձրացման,  բժշկական կազկակերպությունների միջև համագործակցության ընդլայնման և մասնավորապես հիվանդանոցային կառավարման գործում փորձի փոխանակման տեսանկյունից նա մեծապես կարևորել է նման համագործակցությունների խորացումը:

Նշենք, որ «Ջեմելի» հիվանդանոցը համագործակցության փորձ ունի առավել քան 40 երկրի բժշկական հաստատությունների հետ:  Հայաստանի հետ համագործակցության մանրամասները քննարկելու և առավել առարկայական դարձնելու   նպատակով 2016թ. սկզբին նախատեսվում է «Ջեմելի»  հիվանդանոցի ղեկավարության այցը Հայաստան: