«Իմ ուսերին մեծ պատասխանատվություն է, իսկ ես մենակ եմ, պրոդյուսեր չունեմ». «Նոր ալիք 2021»-ի Հայաստանի ներկայացուցիչ Սարոն՝ 20 մասնակցից առաջ անցնելու և ընտրվելու մասին

Tert.am Life-ն իր ընթերցողներին տեղեկացրել է, որ «Նոր ալիք» երաժշտական մրցույթում այս տարի Հայաստանը կներկայացնի 22-ամյա Սարո Գևորգյանը: Tert.am Life-ի հետ զրույցում Սարոն խոսել է մրցույթին մասնակցելու, Արթուր Գրիգորիչի և Նադեժդա Սարգսյանի սանը լինելու, ակումբներում երգելու և հայտնի դառնալու ցանկության մասին:

Երիտասարդ երգչի խոսքով՝ «Նոր ալիք» մրցույթին մասնակցելն իր երազանքներից մեկն է եղել: «Կորոնավիրուսով և պատերազմով պայմանավորված՝ մասնակցությունս նախորդ տարվանից հետաձգվել էր: Այս տարի ինձ հրավիրեցին նախընտրական փուլին մասնակցելու: Գնացի Ռուսաստան, բայց ոչ ոքի չասացի, որ մրցույթի համար եմ գնում, մտածում էի՝ կլինի, կասեմ: Հայաստանը ներկայացնելու համար 20 մասնակցից ես ընտրվեցի, բոլորն ասում էին, որ շատ լավն եմ, ինձ հաջողություն էին մաղթում: Ես շատ մրցույթների եմ մասնակցել, միշտ ինձ են նկատել: Երբ ընտրվեցի, իմ էջում հրապարակում արեցի և կրկին շատ լավ արձագանքներ ստացա: Ես հավատում էի, որ կանցնեմ, եթե չհավատայի, դիմացս նստած մարդիկ ևս ինձ չէին հավատա: Մրցույթը կլինի օգոստոսին, շատ լավ զգացողություններ ունեմ: Իմ ուսերին մեծ պատասխանատվություն է դրված, պետք է հասցնեմ ամեն ինչ անել, քանի որ ես մենակ եմ, պրոդյուսեր չունեմ: Իմ պրոդյուսինգով զբաղվելու առաջարկներ եղել են, բայց չեմ համաձայնել, փակագծեր բացել չեմ ուզում»,- ասաց նա: 

Ըստ Սարոյի՝ անհամբեր սպասում է, որ բեմ բարձրանա, լավ ներկայանա: «Ամեն ինչ պետք է կատարյալ անեմ, որովհետև Հայաստանը չպետք է պարտվի: Մեր հերոսների համար պետք է փորձեմ հաղթել: Եղբայրս էլ Արցախի երկրորդ պատերազմի մասնակից է, հիմա էլ Արցախում է անցկացնում ծառայությունը, պետք է ամեն ինչ լավ անեմ: Չեմ մտածում, որ մրցույթում կարևորը միայն մասնակցությունն է, ինձ համար ևս, իհարկե, կարևոր է լավ ելույթ ունենալը, բայց գնում եմ երազանքիս հետևից: Պետք է գրավեմ հանդիսատեսին, հիշվեմ նրանց կողմից, իմ ակնկալիքներն այլ են: Հայաստանը ներկայացնող մասնակիցները միշտ տպավորվել են, ինչ-որ մրցանակով են վերադարձել, տաղանդավոր են եղել, այս առումով էլ պատասխանատվության զգացում ունեմ»,- նշեց նա:

Սարոն պատմեց, որ երգում է 4 տարեկանից, բայց պրոֆեսիոնալ վոկալով զբաղվել է 13 տարեկանից: «Սովորել եմ Հայաստանի երգի պետական թատրոնում, հետո Նադեժդա Սարգսյանի մոտ: Շնորհակալ եմ Արթուր Գրիգորիչին և Նադյային, նրանք ինձ մեծ փորձ են տվել, մեծ դպրոց եմ անցել՝ հանձին նրանց: Հիմա երգում եմ Երևանի ակումբներից մեկում, ինչն ինձ համար ևս մեծ փորձ է՝ չնայած մարդիկ շատ էին ասում, որ ակումբում աշխատելով ձայնը փչացնում են: Ես համաձայն չեմ, ակումբում ամեն օր աշխատում ես բենդի, հանդիսատեսի հետ, աճում ես: Մեծ սիրով եմ աշխատում ակումբում, երգում եմ իմ սիրելի ստեղծագործությունները: Ինձ շատ են ասել, որ կարող եմ ռեստորանում ռաբիս երգեր կատարել, այլ մասնագիտություն ընտրել, բայց եթե ինքդ քեզ հավատում ես, վստահ եմ՝ կհասնես քո ցանկալի կետին»,- ասաց Սարոն:

Երգիչն ընդգծեց, որ իր ճանապարհին շատ հիասթափություններ են եղել, բայց չի կոտրվել, պայքարել է:

«Այդ պահերին դիտել եմ իմ սիրելի արտիստների մասին տեսանյութերը, վերհիշել, թե ինչ բարդ ճանապարհով են անցել, նրանց ևս փորձել են կոտրել, բայց հիմա նրանք բարձունքում են: Խոսքս Սիայի, Լեդի Գագայի մասին է, նրանց ասել են, որ ոչնչի չեն հասնի, բայց հասել են և դարձել համաշխարհային աստղեր,- ասաց նա և հավելեց՝ երգչի համար միայն ձայնը չէ, որ կարևոր է,- Շատ մարդիկ մեծ դիապազոն ունեն, բայց իրենց առջև նպատակներ չեն դնում, մտածում են գումար վաստակելու մասին: Իմ նպատակը գումարը չէ, ես ուզում եմ հասնել իմ նպատակներին, որից հետո կլինի նաև գումարը: Ուզում եմ ճանաչված, սիրված, լավ արտիստ դառնալ: Իհարկե, հասկանում եմ, որ ճանաչված լինելուց հետո մարդկանց կողմից կարող են նաև բացասական բնույթի մեկնաբանություններ լինել, բայց ուշադրություն չեմ դարձնի: Եթե ընտրել եմ այս ճանապարհը, պետք է ամեն ինչի պատրաստ լինեմ»: