«Տեխզնն­ման հարցն ամե­նա­խիստ ձև­ով պետք է կար­գա­վոր­վի, բայց անհ­րա­ժեշտ է հաշ­վի առ­նել մեր իրա­կա­նու­թյու­նը»

Կառավարությունը ներկայացրել է «Ճանապարհային երթևեկության անվտանգության ապահովման մասին» օրենքում և մի շարք այլ հարակից օրենքներում փոփոխություններ և լրացումներ կատարելու մասին նախագծեր: Մասնավորապես, հանվում են տրանսպորտային միջոցների տեխնիկական զննության կտրոնի տրամադրման, ինչպես նաև այն՝ տրանսպորտային միջոցի դիմապակուն փակցնելու պ ա հանջ ն ե րը: Բա ցի դա, այ սու հ ե տ տրանսպորտային միջոցների տեխնիկական վիճակի վերահսկողությունն իրականացվելու է լիցենզավորված անձի կողմից տրամադրված արատորոշման քարտի և տրանսպորտի բնագավառի լիազոր մարմնի կողմից վերահսկվող էլեկտրոնային շտեմարանի միջոցով:

Արատորոշման քարտը լրացվելու է էլեկտրոնային եղանակով և պահպանվելու է էլեկտրոնային շտեմարանում, ինչը հնարավորություն է տալու տրանսպորտային միջոցների տեխզննության վերահսկողություն իրականացնել նաև էլեկտրոնային եղանակով, առանց տրանսպորտային միջոցը կանգնեցնելու: Նախատեսվում են մի շարք փոփոխություններ ևս: Տեխզննման կտրոններին ոչ մեկ անգամ ենք անդրադարձել, խոսել ենք դրանց նպատակահարմարության և այն մտայնության մասին, երբ դրանք հաճախ տրամադրվում են՝ առանց մեքենայի համապատասխան տեխզննության: «Փաստի» հետ զրույցում «Վարորդի ընկեր» իրավապաշտպան ՀԿ-ի փոխնախագահ Դավիթ Պեդանյանը նշում է՝ ինքն էլ է ցանկանում, որ տեխզննման հարցն ամենախիստ ձևով դրված լինի: «Բայց եթե օրենք են ընդունելու ու չեն կարողանալու իրականություն դարձնել, դրան դեմ եմ»,ասում է նա:

Նշում է՝ այսօր Հայաստանում տեխզննման վճարն ընդամենը հավել յալ հարկ է՝ դրված քաղաքացիների վրա: «Այն ընդհանրապես իր նպատակին չի ծառայում: Այս պարագայում պետք է իրականության հետ հաշվի նստել և տեխզննումն ընդհանրապես վերացնել որպես այդպիսին: Մեկ այլ հարց է նաև, որ տեխզննման և բնապահպանական հարկի վճարներն անտրամաբանական ձևով են հաշվարկվում ու գանձվում: Օրինակ՝ բնապահպանական վճարը գանձվում է մեքենայի ձիաուժից կախված, այն դեպքում, երբ պետք է հաշվի առնել մեքենայի՝ շրջակա միջավայրն աղտոտելու ցուցանիշը: Եթե փոփոխություններ են արվում, ապա դրանք պետք է համապատասխանեն մեր իրավիճակին:

Օրինակ՝ կարելի է տեխզննումը ժամանակավորապես հանել՝ մինչև կկարգավորվեն մեքենաների մաշվածության հետ կապված հարցերը, մեքենաների վառելիքի օգտագործման լիցենզավորման հարցը և այլն, այսինքն՝ կունենանք հստակ պատկեր, թե որ մեքենաները ենթակա չեն շահագործման, ինչ եղանակով քաղաքացին կարող է այդ մեքենաներն ուտիլիզացնել, որ մեքենաները որքան են աղտոտում շրջակա միջավայրը և թե դրանցից յուրաքանչյուրը որքան է պիտանի երթևեկությանը, որովհետև եթե այսօր օբյեկտիվ տեխզննություն անցկացվի, մեր ավտոպարկի կեսից ավելին վստահաբար չի անցնի այն:

Եթե իրենք վստահ են, որ կարող են ուղղակի քաղաքացիներին ստիպել տեխզննում չանցած մեքենան չվարել և դա չի բերի տնտեսական ծանր հետևանքների մարդկանց և պետության համար, թող անեն»,-նշում է մեր զրուցակիցը: Պեդանյանն ընդգծում է՝ եթե այսօր հասարակ հաշվարկ ներկայացնենք, թե որքան տեխզննման կայան և մեքենա կա, որոնք պետք է տեխզննում անցնեն, ընդ որում, մեքենաներից մեծ մասի տեխզննման կտրոնի ժամկետը վերջանում է դեկտեմբերին, կստացվի, որ դա ֆիզիկապես անհնար կլինի անել, իսկ օրենքով մեքենան չի կարելի շահագործել մինչև այն տեխզննում չանցնի: «Ստացվում է, որ մեքենաների մեծ մասը պետք է կանգնեն, սպասեն իրենց հերթին՝ մինչև տեխզննման կայանում իրենց հերթը գա և այլն: Ֆիզիկապես դա վերահսկել և իրագործել հնարավոր չէ:

Հիմա եթե ուզում են տեխզննման կայաններ ստեղծել, որոնք այդ հարցը կլուծեն, առաջանում է երկրորդ խնդիրը՝ արդյո՞ք այդ մեքենաները տեխզննում անցնելու են, թե ոչ: Տեխզննում չանցնող մեքենաների մեջ կան այնպիսինները, որոնք վտանգավոր են երթևեկության համար, կան նաև այնպիսինները, որոնց վտանգավորությունը կարող է ավելի նվազ լինել: Փաստ է այն, որ մեքենայի անսարքության պատճառով վթարները շատ քիչ տոկոս են կազմում՝ ի տարբերություն մարդկային գործոնով պայմանավորված վթարների»,-հավելում է ՀԿ-ի փոխնախագահը: Նա ընդգծում է՝ պետությունը պետք է հաշվի առնի այն, որ մեր քաղաքացիներից շատերն իրենց ապրուստի միջոցը վաստակում են մեքենաների շնորհիվ:

«Պետք է սահմանել բուֆերային ժամանակաշրջան, ասենք մի քանի տարի, որի ընթացքում մարդիկ կպարտավորվեն թարմացնել իրենց ավտոպարկը, հետո նոր անցնեն ավելի խիստ միջոցների: Հակառակ դեպքում՝ օրենքը կընդունեն, հարյուր հոգու կտուգանեն, հաջորդ օրը կառավարության շենքի դիմաց հազար հոգանոց միտինգ կլինի»,-եզրափակում է Դավիթ Պեդանյանը: