Սարգիս Գրիգորյանը՝ «Երկրաշարժ» ֆիլմի և Կենտրոն հեռուստաընկերության նոր սերիալի մասին

Aysor.am-ը գրում է.

Բախտաբեր հեռուստասերիալի ստեղծագործական կազմը շուտով Կենտրոն հեռուստաընկերության եթերում կներկայանա նոր՝ «Անի» հեռուստասերիալով: Սերիալները, մեծամասամբ, առավել դիտարժան են դառնում հենց դերակատարների շնորհիվ: Aysor.am-ը զրուցել է սերիալներից արդեն իսկ մեծ ճանաչում ու սեր վայելող դերասան Սարգիս Գրիգորյանի հետ, ով վերջին շրջանում ամենապահանջարկ ունեցող դերասաններից է ու ակտիվ զբաղվածություն ունի նաև գեղարվեստական ֆիլմերում:

Ս. Գրիգորյանն այս անգամ և՞ս կստանձնի սերիալի գլխոր հերոսի պարտականությունները հարցին ի պատասխան՝ դերասանը նշեց, որ դեռևս ներգրավված չէ  «Անի» սերիալում. «Ինձ առաջարկեցին նկարահանվել ու այդ առաջարկը մինչև այսօր էլ արդի է, սակայն այս անգամ ինքս եմ հրաժարվել՝ որոշելով «time out» վերցնել: Սերիալային աշխատանքը ծավալուն է, իսկ ես մի փոքր գերհոգնել եմ, նաև հիմա ավելի շատ գեղարվեստական ֆիլմերում եմ նկարահանվում, հետաքրքրվում եմ ներկայացումներով, ինչն առավել կարևոր է ինձ համար: Ժամանակի խնդիր ունեմ… Այնպես որ, դեռևս առանց ինձ կսկսվի սերիալը, բայց չգիտեմ՝ հետո կնկարահանվե՞մ, թե՞ ոչ: Ժամանակը ցույց կտա»:

Արդյոք դա նշանակում է, որ նա որոշել է այլևս սերիալներում չնկարահանվել՝ հարցին մեր զրուցակիցը պատասխանեց. «Ես նման բարձրագոչ հայտարարություն չեմ անում: Հայաստանում մինչև նորմալ կինոարտադրություն չլինի, չեմ կարող նման որոշում կայացնել ու բարձրաձայնել: Բայց, փառք Աստծո, այսօր բավական լուրջ նախագծերի առաջարկներ ունեմ, որոնք ինձ համար, որպես դերասան, շատ կարևոր են: Սակայն չի բացառվում, որ կարող է հետագայում ներգրավվեմ սերիալում, այդ պատճառով էլ չեմ ցանկանա «հպարտ» հայտարարություններ անել»: 

Սերիալի կեսից դրանում հայտնվելու դեպքում, բնականաբար, կերպարը գլխավոր հերոս չի դառնա: «Շատ հետաքրքիր դիտարկում է, բայց նաև պետք չէ մոռանալ, որ այդ պահին է իմ կերպարը ստեղծվելու, ոչ-ոք չգիտի, թե ինչ ասելիք կունենա: Բայց ասեմ, որ ինձ համար գլխավոր, թե երկրարդական՝ նշանակություն չունի: Միայն հիմար դերասանը կարող է ասել՝ եթե գլխավոր չի, ես չեմ խաղում: Ինձ համար կարևորն այն է, որ դերը լավը լինի, ասելիք ունենա ու ինձ դուր գա: Եթե այս սերիալ մտնեմ թեկուզ կեսից, ապա կփորձեմ այնպես անել, որ կերպարս հավասարակշիռ լինի, հետաքրքիր»,-նշեց Սարգիս Գրիգորյանը:

Նա այսօր նկարահանվում է միայն «Շանթ» հեռուստաընկերության «Սահմանին» սերիալում, «Երկրաշարժ» գեղարվեստական ֆիլմում, բացի այդ՝ Կենտրոն հեռուստաընկերության «ձայնն» է: «Նոր ֆիլմերի առաջարկներ էլ ունեմ, ակայն դա ստեղծագործական գաղտնիք է, դեռևս չեմ կարող բարձրաձայնել: Իսկ «Երկրաշարժ» ֆիլմում գյումրեցի տղայի եմ մարմնավորում, ով հղի կնոջն այդ օրը հիվանդանոց է տանում՝ ծննդաբերելու: Սակայն երկրաշարժը սկսվում է: Բոլորը դուրս են գալիս, իմ կերպարն իր երեխային փրկում ու ինքը մահանում է… Տառապանքի մասին է, մեր գյումրեցու դժբախտության մասին: Ֆիլմում գլխավոր հերոսներին մարմնավորում են ռուսներ, բավական լուրջ դերասաններ են ներգրավված… Իսկ «Սահմանինը» գեղարվեստական ֆիլմի ֆորմատ է, լիամետրաժ գեղարվեստական ֆիլմ է: Կերպարանավորում եմ հատուկ հետախուզական ջոկատի հրամանատար մայոր Գրիգորյանին: Պաշտպանության նախարարության հետ համագործակցված բավականին հզոր սերիալ է: Թեև այստեղ շատ քիչ եմ ներգրավված, բայց շատ կարևոր, առանցքային դերերից  մեկն է»,-հավելեց նա:

Ի դեպ, մեր զրուցակցին անծանոթ չեն ռազմական նրբություններն ու հմտություննեը. «Իհարկե, ինքս էլ ծառայել եմ, եղել եմ 120 միլիմետրանոց «Миномёт»-ի ջոկատի հրամանատար: Եվ դիրքերում ենք եղել, և թշնամու հետ կրակահերթի ենք բռնվել»:

Քանի որ դերասանը որոշել է այսուհետ ընտրողի դերում լինել և անել այն, ինչ ինքը կցանկանա՝ առաջնահերթությունը տալով ոչ թե գումարին, այլ որակյալ նախագծերին, ապա հետաքրքիր է, որքանո՞վ նպաստավոր կլինի այդ որոշումը ֆինանսական առումով և չի՞ տուժի արդյոք դերասանը: ««Ջհանդամը» տուժեմ, միևնույն է, ինչ էլ անես՝ գումարը միշտ քիչ է լինում: Մայքլ Ջեքսոնը պարտքերի մեջ մահացավ, էլ ինչի՞ մասին է խոսքը»,-Aysor.am-ի հետ զրույցը եզրափակեց նա: