Մենք այսօր իսկապես ՍԴ ճգնաժամ ունենք. Նրանք դա ստեղծեցին. Ռուբեն Մելիքյան

Past.am

Որեւէ տեղ նշված չէ, որ երկրի վարչապետը, առավել եւս Արդարադատության նախարարը Սահմանադրությունը մեկնաբանելու իրավունք ունեն եւ որոշել, թե ինչը պետք է կիրառել, ինչը՝ ոչ: Այս մասին ՍԴ-ի մոտ լրագրողների հետ զրույցում նշեց «Իրավական ուղի» ՀԿ համահիմնադիր Ռուբեն Մելիքյանը:

Նա հայտարարեց, որ այսօր արդեն իսկապես ունենք սահմանադրական դատարանի ճգնաժամ. «Այն, ինչի մասին մեկ տարի խոսում էին, նրանք իրենց ձեռքով ստեղծեցին»:

Մելիքյանի խոսքով, մոտեցումներից մեկի համաձայն 2-3 դատավորներ այլեւս դատավոր չեն, մյուսի համաձայն՝ նրանք շարունակում են իրենց պաշտոնավարումը՝ այն պարզ պատճառով, որ ՍԴ-ի մասին սահմանադրական օրենքը փնթի գտնվելու պատճառով ժամանակին չեն փոխել. «Մոտեցում կա, որ այս փաստաթուղթն ընդհանրապես իրավական ուժ չունի, կա նաեւ մոտեցում, որ ունի, սակայն կիրառելի չէ: Սա արդեն ճգնաժամ է նշանակում: Մենք այսօր ունենք փշուր-փշուր եղած սահմանադրական կարգ եւ շատ դժվար է լինելու մեր հանրությանը վերականգնել այս խայտառակ վիճակը:

Եթե անգամ համարում ենք, որ սահմանադրական փոփոխությունները թղթի կտոր չեն, այստեղ մենք գործ ունենք դրա կիրառելիության հետ, որովհետեւ ունենք ՍԴ-ի մասին օրենք, որտեղ կա այն կանոնը, որը մեզ ծանոթ է»,-ասաց նա՝ հավելելով, որ սահմանադրական փոփոխությունների ուժի մեջ մտնելու վերաբերյալ արդարադատության նախարարի տեսակետը հավասար է ցանկացած ՀՀ քաղաքացու տեսակետին, ոչ մի առավելություն չունի:

Ռուբեն Մելիքյանը հայտարարեց, որ տեղի ունեցածը սահմանադրական կարգի տապալման գործընթաց է. «Այո, ես համարում եմ, որ սա սահմանադրական կարգի տապալման գործընթաց է, այո համարում եմ, որ այն, ինչ  տեղի է ունեցել սկսած 2019 թվականի հունիսի 20-ից մինչեւ այսօր, սահմանադրական կարգի տապալման գործընթաց է բազմաթիվ արարներով եւ այս վերջին արարը, որը ամենակոպիտն էր, ամենաերեւացողն եր: Մենք տեսանք, որ ՀՀ վարչապետը իրեն վերապահում է օրենքներ մեկնաբանելու իրավունք եւ ի լուր աշխարհի ֆեյսբուքի էջով հայտարարում է, որ այս պահին սա է գործում կամ նա:

ՍԴ-ն այն ինստիտուտը եղավ, որն իր սկզբունքայնության, իր աշխատանքի շնորհիվ հնարավորություն տվեց բոլորիս հասկանալ, թե մենք ում հետ գործ ունենք: Արդյոք գործ ունենք մարդկանց հետ, որոնք իրավական արժեքներ են կարեւորում, թե գործ ունենք մարդկանց հետ, որոնք պատրաստ են իրավական արժեքները ոտնատակ տալ քաղաքական նպատակահարմարության շահից ելնելով:

Հնարավորություն տվեց հասկանալ՝ մենք ունենք պետության գլուխ ՀՀ նախագահ, թե՞ մենք ունենք մարդ, որ գիշերվա կեսին պատրաստ է լինել Արտուշ պապիկ:

Արդյոք մենք ունենք խորհրդարանական երկո՞ւ ընդդիմադիր ուժ, թե՞ մեկ ընդդիմադիր ուժ, իսկ երկրորդը «Իմ քայլը» դաշինքի մի առանձին ֆրակցիա կարելի է համարել»,-ասաց Մելիքյանը: