Ադրբեջանում ձերբակալվել է կրոնական լրատվական կայքի խմբագրի փոխանորդը

Երեկ երեկոյան Բաքվում ձերբակալվել է azadxeber.net կրոնական լրատվական կայքի խմբագրի ժամանակավոր փոխանորդ Իռքին Մմաեդլին:

Վկայակոչելով ադրբեջանական ԶԼՄ-ները, լրագրողի գործընկերները հայտնել են, որ Մամեդլին ձերբակալվել է Բաքիխանով ավանում:  Երիտասարդը մտել է խանութ եւ չի վերադարձել: Ականատեսները պատմել են, որ քաղաքացիական հագուստով մարդիկ լրագրողին նստեցրել են ավտոմեքենա եւ տարել անհայտ ուղղությամբ:

Բաքվի Սաբունչիի շրջանի ոստիկանությունում նրա հորը հաստատել են Մամեդլիի ձերբակալությունը:

Ենթադրվում է, որ երիտասարդին տարել են ՆԳՆ կազմակերպված հանցագործության դեմ պայքարի գլխավոր վարչություն:

Azadxeber.org կայքի խմբագիր Նիջաթ Ալիեւը եւս գտնվում է կալանման մեջ: Նա ձերբակալվել է դեռեւս 2012 թվականի մայջսին այն բանից հետո, երբ քննադատել է Բաքվում «Եվրատեսիլ» մրցույթի անցկացումը: Ավելի ուշ նա մեղադրվել է միջկրոնական երկպառակություն բորբոքելու, ապօրինի զենք պահելու համար եւ դատապարտվել 10 տարի ազատազրկման:

Ադրբեջանի նախագահ Իլհամ Ալիեւի հրամանով եւ անձնական վերահսկողությամբ այդ երկրում բռնաճնշումներ են սկսվել իսլամի շիա ուղղության առաջնորդների եւ  հետեւորդների նկատմամբ` մեղադրելով նրանց ահաբեկչության մեջ: Ընդդիմությունն Ալիեւի այդ քայլը բացատրել է այն բանով, որ նման գործողություններով իշխանությունը ցանկանում է ժողովրդի ուշադրությունը շեղել երկրում ահագնացող տնտեսական ճգնաժամի հետեւանքներից, ազգային անվտանգության նախարարությունում կոռուպցիայի պատճառով կադրային ջարդից, գնալով մեծացող գործազրկությունից, մանաթի արժեզրկման հետ կապված թանկացումներից եւ այլն:

Դրա օրինակներից մեկը ադրբեջանցի շիաների կենտրոն համարվող Նարդարան ավանում դեկտեմբերի 1-ին ՆԳՆ կողմից շիա հավատացյալների դեմ իրագործված բռնաճնշումներն են, որոնց արդյունքում կալանավորվել են Ադրբեջանի շիաների առաջնորդ Թալե Բաղըրզդեին եւ եւս 22 հավատացյալներ: Ոստիկանների գործողությունները զայրացրել են Նարդարանի բնակիչներին: Նրանց եւ ոստիկանության միջեւ բախումներ են սկսվել: Փոխհրաձգությունների հետեւանքով երկու ոստիկան եւ 5 բնակիչներ սպանվել են: Հաջորդ օրերին իսլամիստների եւ ոստիկանության միջեւ բախումներ են սկսվել նաեւ Ադրբեջանի շր ջաններում` Գյանջայում, Լենքորանում եւ այլ քաղաքներում:

Ադրբեջանի ՆԳՆ-ը եւ գլխավոր դատախազությունը միջադեպի առնչությամբ հայտարարություն է տարածել, որում ասվում է, որ «ավանի շիա առաջնորդները ծրագրում են բռնությամբ փոխել սահմանադրական կարգը եւ երկրում շարիաթի նոր օրենքներ մտցնել, ինչի նպատակով նրանք ստեղծել են «Մուսուլմանական միասնություն» անվամբ շարժում, սկսել են իրենց կողմնակիցներ հավաքագրել Բաքվում եւ երկրի շրջաններում եւ մատակարարել նրանց զենքով եւ պայթուցիկ նյութերով, խումբը Նարդարան ավանում անօրինական հավաք է անցկացրել` քննարկելով իշխանությանն անհնազանդության ակցիայի կազմակերպում, թռուցիկներ է բաժանել բնակչությանը եւ որոշել է պետական չինովնիկների ցուցակը, որոնց դեմ ահաբեկչական գործողություներ էր նախապատրաստվում»:

Ադրբեջանում իրադրությունը բարդանում է նրանով, որ դեկտեմբերի 2-ին շիաները, որոնք կազմում են Ադրբեջանի բնակչության 60 տոկոսից ավելին, նշում են Իմամ Հուսեյնի սուգի 40-րդ օրը:

Նարդարանի Իմամ Հուսեյնի մզկիթը հանդիսանում է գլխավոր կենտրոնը, որտեղ Աբշերոնի բնակիչներն ավանդաբար նշում են այդ օրը: Ամեն տարի արարողությանը հավաքվում է 20-30 հազար մարդ: Այս տարի այդ սուգը համընկնում է Նարդարանում ոստիկանության հետ օրորդ տեղի ունեցած բախումներում զոհված քաղաքացիների հուղարկավորության հետ:

Ոստիականության հետ բախումները հատուկ իմաստ են ձեռք բերում այն առումով, որ տեղացիները պատմական զուգահեռներ են անցկացնում` համեմատելով 1400 տարի առաջ Իմամ Հուսեյնի ստոր սպանությունն այսօրվա իրադարձությունների հետ: