Սահ­ման­վում է խա­ղաս­րահ մուտք գոր­ծել ցան­կա­ցո­ղի անձ­նա­գի­րը ստու­գե­լու կար­գը

Ֆինանսների նախարարությունը հանրային քննարկման է ներկայացրել «Խաղասրահ մուտք գործել և ինտերնետային կայքում գրանցվել ցանկացող ֆիզիկական անձի անձնագիրը կամ անձը հաստատող այլ փաստաթուղթը ստուգելու կարգը հաստատելու մասին» ՀՀ ֆինանսների նախարարի հրամանի նախագիծը: Այս նախագծի ընդունումը պայմանավորված է «Վիճակախաղերի մասին» օրենքում լրացումներ և փոփոխություն կատարելու մասին ՀՕ-186-Ն օրենքի ընդունմամբ: 

Համաձայն «Վիճակախաղերի մասին» օրենքի՝ կազմակերպիչը պարտավոր է լիազոր մարմնի սահմանած կարգով ստուգել խաղասրահ մուտք գործել ցանկացող ֆիզիկական անձի անձնագիրը կամ անձը հաստատող այլ փաստաթուղթ, որը պարունակում է տվյալներ նրա տարիքի վերաբերյալ: Միաժամանակ, համաձայն օրենքի 5.1-րդ հոդվածի 5-րդ կետի՝ արգելվում է մոլեխաղերով հրապուրվելու հետևանքով իր ընտանիքը նյութական ծանր դրության մեջ դնելու հիմքով սահմանափակ գործունակ ճանաչված քաղաքացու մասնակցությունը տոտալիզատորին (այդ թվում՝ ինտերնետ տոտալիզատորին), որոնց վերաբերյալ տվյալների բազայի վարման կարգը սահմանում է լիազոր մարմինը:

 

Մինչև այս օրենքի ընդունումը՝ սահմանված չէր կազմակերպիչների կողմից խաղասրահ մուտք գործել և ինտերնետային կայքում գրանցվել ցանկացող ֆիզիկական անձի անձնագիրը կամ անձը հաստատող այլ փաստաթուղթը ստուգելու պահանջ, ինչպես նաև մոլեխաղերով հրապուրվելու հետևանքով իր ընտանիքը նյութական ծանր դրության մեջ դնելու հիմքով սահմանափակ գործունակ ճանաչված քաղաքացու մասնակցությունը տոտալիզատորին (այդ թվում՝ ինտերնետ տոտալիզատորին) կազմակերպիչների կողմից արգելելու պահանջ:

Ըստ նախագծի հիմնավորման՝ այս կարգավորման նպատակն է ՀՀ-ում խաղային գործի բնագավառի կարգավորումը, վերահսկողության արդյունավետության բարձրացումը, այսպիսով` սահմանվում է անձի անձնագիրը կամ անձը հաստատող այլ փաստաթուղթն ստուգելու հստակ մեխանիզմ՝ բացառելով վիճակախաղի դեպքում 18 տարին, իսկ տոտալիզատորի (այդ թվում՝ ինտերնետ տոտալիզատորի)՝ 21 տարին չլրացած անձանց մուտքը խաղասրահներ, ինչպես նաև նոր մեխանիզմի ներդրմամբ պայմանավորված՝ մոլեխաղերով հրապուրվելու հետևանքով իր ընտանիքը նյութական ծանր դրության մեջ դրած քաղաքացուն սահմանափակ գործունակ ճանաչելու հիմքով տոտալիզատորին (այդ թվում՝ ինտերնետ տոտալիզատորին) մասնակցության իրավունք չունեցող անձանց վերաբերյալ տվյալների բազայի վարման պահանջ: Հրամանն ուժի մեջ է մտնելու 2020 թվականի նոյեմբերի 1-ից:

Ի՞նչ է մասնավորապես սահմանում այս նախագիծը: Անձնագրի կամ անձը հաստատող փաստաթղթի ստուգումն իրականացվում է խաղասրահ մուտք գործել ցանկացող ֆիզիկական անձի ներկայությամբ: 

Փաստաթղթերի ստուգումից հետո, երբ կազմակերպիչը հավաստիանում է նաև, որ տվյալ անձի անունը չկա լիազոր մարմնի կողմից տրամադրված համապատասխան ցուցակում, ֆիզիկական անձին թույլատրվում է մուտք գործել խաղասրահներ (բուքմեյքերական գրասենյակ): 

Մինչև ֆիզիկական անձանց ինտերնետային կայքում գրանցելը՝ կազմակերպիչն իրականացնում է ինտերնետ տոտալիզատորին մասնակցել ցանկացող ֆիզիկական անձանց ինքնության ստուգում (նույնականացում)՝ բացառելով քսանմեկ տարին չլրացած ֆիզիկական անձանց մասնակցությունը ինտերնետ տոտալիզատորին: Գրանցվել ցանկացող ֆիզիկական անձը լրացնում է ինտերնետային կայքում գրանցման համար նախատեսված դաշտերը և ստորագրում (վավերացնում) է էլեկտրոնային ստորագրությամբ:

ԼՈՒՍԻՆԵ ԱՌԱՔԵԼՅԱՆ