Փետր­վա­րին սննդամ­թեր­քի շու­կա­յում գնան­կում է գրանց­վել, իսկ ալ­կո­հո­լա­յին խմիչք­նե­րը թան­կա­ցել են

Փետրվարին սպառողական շուկայում նախորդ տարվա նույն ժամանակահատվածի համեմատ 0,5 տոկոս գնանկում է գրանցվել։ Այս մասին տեղեկանում ենք վիճակագրական կոմիտեի հրապարակած տվյալներից, որոնք վերաբերում են 2020թ. հունվար և փետրվար ամիսներին սպառողական շուկայում գրանցված գներին ու դրանց փոփոխությանը՝ 2019թ. նույն ամիսների համեմատ։ Մինչ առանձին ապրանքախմբերին անդրադառնալը, նկատենք, որ ի տարբերություն 2020թ. փետրվարի, 2020 թ. հունվարին նախորդ տարվա հունվարի համեմատ 0,3 տոկոս գնաճ էր արձանագրվել։

Նախ՝ դիտարկենք հատկապես առաջին անհրաժեշտության ապրանքատեսակները՝ առաջինն անդրադառնալով սննդամթերքին, որտեղ այս տարվա փետրվարին նախորդ տարվա նույն ժամանակահատվածի համեմատ գրանցվել է 4,2 տոկոս գնանկում, ավելի շատ, քան 2020թ. հունվարին 2019թ. հունվարի նկատմամբ, երբ արձանագրվել էր 1,8 տոկոս գնանկում։

Ինչպես հունվարին, մսի շուկայում գնանկման միտումը շարունակվել է նաև փետրվարին։ Ընդհանուր առմամբ, 4 տոկոսի գնանկման մասին է խոսքը, մինչդեռ 2020թ. հունվարին նախորդ տարվա հունվարի համեմատ 2,7 տոկոս գնանկում էր արձանագրվել։ Տավարի մսի գինը 2020թ. փետրվարին նախորդ տարվա փետրվարի համեմատ նվազել է 3,4, խոզի մսինը՝ 12,2, գառան մսինը ՝ 0,9, թռչնամսինը՝ 8,2 տոկոսով։ 

Գնանկումը շարունակվել է նաև ձկան և ծովամթերքի շուկայում, որտեղ 2020թ. փետրվարին նախորդ տարվա նույն ժամանակահատվածի համեմատ, ընդհանուր առմամբ, 4,5 տոկոս գնանկում կա։ Մասնավորապես՝ թարմ կամ պաղեցրած ձկան շուկայում 5,6 տոկոս գնանկում է գրանցվել, բայց սառեցված ձկան շուկայում 4,7 տոկոս գնաճ կա։ 

Այլ իրավիճակ է ապխտած մսամթերքի շուկայում, որտեղ գները 1,2 տոկոսով բարձրացել են։ Կիսաֆաբրիկատների շուկայում ևս գնաճ կա, որը կազմել է 0,7 տոկոս։

Կաթնամթերքի, պանրի և ձվի շուկայում, ընդհանուր առմամբ, 7,6 տոկոս գնանկում է գրանցվել։ Այդուհանդերձ, անարատ կաթի շուկայում 0,2 գնաճ կա, պահածոյացված կաթը թանկացել է 0,4 տոկոսով, յոգուրտն ու մածունը՝ 1 տոկոսով։

Ձվի շուկայի գնանկումը, որը բազմաթիվ քննարկումների առիթ դարձավ, և այս առումով ուսումնասիրությունները դեռ շարունակվում են, փետրվարին նախորդ տարվա նույն ժամանակահատվածի համեմատ կազմել է 25,9 տոկոս։ Նկատենք, որ 2020թ. հունվարին նախորդ տարվա հունվարի համեմատ ձվի շուկայի գնանկումը կազմել էր 10,4 տոկոս։ 

2020 թվականի փետրվարին նախորդ տարվա համեմատ 5,8 տոկոս գնանկում է արձանագրվել նաև կարագի շուկայում։ Հետաքրքրական պատկեր է նաև մրգի ու բանջարեղենի շուկայում, որտեղ նշյալ ամիսներին մշտապես գնաճ էր արձանագրվում։ Այս շուկաներում գնանկման միտում կա, որը շարունակվում է։

Մրգերի գները փետրվարին 2,1 տոկոսով նվազել են, իսկ բանջարեղենի շուկայում 12,9 տոկոսով գնանկում է արձանագրվել։

Կարտոֆիլի գինը նվազել է 12 տոկոսով։ Վերոնշյալ ապրանքատեսակների համեմատ հրուշակեղենի շուկայում արձանագրված գնանկումը ավելի քիչ է ՝ 0,7 տոկոս։

Թեպետ սննդամթերքի շուկայում հիմնականում գնանկում է արձանագրվել, բայց գնաճ կա առանձին ապրանքատեսակների առումով, որոնք առաջին անհրաժեշտության սպառման ապրանքներ են դիտարկվում։ Մասնավորապես՝ հացաբուլկեղենի և ձավարեղենի շուկայում 2020թ. փետրվարին 2019թ. փետրվարի համեմատ 3,2 տոկոս գնաճ է գրանցվել, բրինձը թանկացել է 2,5, ալ յուրն ու ձավարեղենը՝ 2,9, հացը՝ 2,5 տոկոսով։ Մակարոնեղենի շուկայում էլ 4,1 տոկոս գնաճ է գրանցվել, թեպետ 2020թ. հունվարին նախորդ տարվա հունվարի համեմատ այս ապրանքախմբում գրանցված գնաճն ավելի մեծ էր՝ 7,4 տոկոս։

Ի տարբերություն սննդամթերքի նշված տեսակների, այլ է իրավիճակը ալկոհոլային խմիչքների շուկայում, ուր 9, 1 տոկոս գնաճ կա։ Մասնավորապես, օղու գինը բարձրացել է 13 տոկոսով, գինին թանկացել է 2,1, թնդեցված գինին՝ 1,8, գարեջուրը՝ 4,4 տոկոսով։ Նկատենք, որ 2020թ. հունվարին նախորդ տարվա հունվարի համեմատ ալկոհոլային խմիչքների շուկայում գրանցված գնաճը 3,3 տոկոս էր։ Ստացվում է, որ այս շուկայում գները շուրջ երկու անգամ բարձրացել են։

ԱՆՆԱ ԲԱԴԱԼՅԱՆ