«Չի կարելի ամեն ինչ կապել հեղափոխության հետ». Արքմենիկ Նիկողոսյանը՝ գրքերի ռեկորդային վաճառքի ու ֆլեշմոբերի մասին

Գրքերին առնչվող ֆլեշմոբերը նոր չեն մեզ մոտ, մի քանի տարի է, ինչ ֆեյսբուքյան հայկական տիրույթում դրանք մեծ տարածում են գտել: Եվ յուրաքանչյուր նման ֆլեշմոբի ժամանակ օգտատերերը բաժանվում են երկու մասի՝ ֆլեշմոբերին ակտիվ մասնակցողներ և մասնակցողներին հեգնողներ:  

«Առաջին 5 մարդիկ, ովքեր մեկնաբանություն կգրեն այս գրառմանը, կստանան իմ կողմից մեկ գիրք 2019-ի ընթացքում։ Գիրքը կընտրվի անձի համար հատուկ կերպով։ Ես կորոշեմ` ինչպես և որտեղ այն Ձեզ հանձնել։ Գուցե ինչ-որ սրճարանում կամ առաքման միջոցով։ Ինչ տարբերակով էլ լինի, գիրքը կլինի հատուկ Ձեզ համար ընտրված։ Եկեք խրախուսենք ընթերցանությունը 2019-ում»: Արդեն մի քանի օր է, վերոնշյալ բաժանումը ակտուալ է նաև նշված ֆլեշմոբի համար: Նկատենք, որ այս ֆոնին քննարկման թեմա է դարձել նաև վարչապետի պաշտոնակատար Նիկոլ Փաշինյանի երեկ կատարած գրառումը, որում նշել էր. «Քիչ առաջ լուրերի թողարկումից իմացա, որ 2018-ին Երևանի գրախանութներում Երրորդ հանրապետության պատմության համար ռեկորդային թվով գիրք է վաճառվել։ Սա է Նոր Հայաստանը»:

Ֆլեշմոբերի դերի, ինչպես նաև ռեկորդային քանակով վաճառված գրքերի մասին զրուցել ենք «Անտարես» հրատարակչության գլխավոր խմբագիր, գրականագետ, Արքմենիկ Նիկողոսյանի հետ: Անդրադառնալով նախ ֆլեշմոբերին՝ նա ևս շեշտեց, որ նման ֆլեմոբեր շատ են արվել:

«Եվ եթե վարչապետի մակարդակով հայտարարվում է, որ Երրորդ հանրապետության պատմության մեջ ամենաաննախադեպ քանակով գրքերն են վաճառվել, դա ոչ միայն հրատարակչական, հեղինակային, գրողական, գրական, ինչպես նաև տարբեր կազմակերպությունների հետևողական աշխատանքի, այլև ֆլեշմոբերի արդյունքն է: Ինչու եմ սա շեշտում, որովհետև վերջին տարիներին սոցիալական ցանցերի հարթակները մեզ օգնեցին լրացնելու հեռուստատեսությամբ, ռադիոյով և թերթերով գրքի գովազդի չգոյության բացը: TV-ները չէին խոսում գրքի մասին, ռադիոն՝ շատ քիչ, թերթերն էլ՝ հազարից մեկ»,-Past.am-ի հետ զրույցում ասաց Ա. Նիկողոսյանը՝ ընդգծելով, որ սոցիալական ցանցերը եկան լրացնելու լրատվական դաշտում առկա քարոզչական ու գովազդային սովը:  

«Մարդիկ ավելի շատ սկսեցին լսել գրքերի մասին, տեսնել գրքերը: Գրքերի շուրջ ամենատարբեր արշավները ծառայեցին նրան, որ մեր պետությունը, մեր գրահրատարակչական դաշտն այսօր ունենա այդ առաջընթացը: Այսինքն՝ ասել, որ այդ ֆլեշմոբերը օգտակար չեն, սխալ է: Իհարկե, կարելի է հասկանալ, որ այդ ֆլեշմոբը կարող է ձանձրացնել, որովհետև դու օգտվում ես սոցիալական ցանցերից նաև նորություններ, նոր տեղեկատվություն իմանալու համար: Բայց, այդուհանդերձ,  եթե ֆլեշմոբին մասնակցող մարդկանց թեկուզև 15-20 տոկոսը միմյանց գրքեր նվիրի, ապա դա արդեն մեծ նվաճում է»,-նշեց մեր զրուցակիցը:

Ինչ վերաբերում է վարչապետի պաշտոնակատարի վերոնշյալ արձագանքին,  Ա. Նիկողոսյանն ընդգծեց.

«Կոնկրետ ես բազմիցս եմ ասել, որ այն մեծ աշխատանքը, որը տարվեց գրքի, գրահրատարակչության, գրականության տարածման առումով, նպաստեց նրան, որ  Հայաստանի Հանրապետության քաղաքացին ունենա քաղաքացիական ավելի բարձր գիտակցություն: Իսկ այդ բարձր գիտակցությամբ քաղաքացու հետ հեղափոխություն անելը շատ ավելի հեշտ է: Ես կասեմ հետևյալը. 2017 թվականին ևս ունեցել ենք Երրորդ հանրապետության պատմության մեջ գրքերի ամենաշատ վաճառքը, բայց դրա մասին ոչ ոք չի խոսել, բարձր ամբիոններից այդ մասին չի հայտարարվել, որովհետև գործ ենք ունեցել այլ տիպի իշխանությունների հետ: Բայց ասել, որ՝ գիտեք՝ Հայաստանում գրքերի վաճառքը բարձրացավ, որովհետև հեղափոխություն եղավ, սխալ է: Ես հարցն այլ կողմից եմ դիտարկում. տարիների քրտնաջան աշխատանքն այդ ոլորտում նպաստեց հեղափոխության կայացմանը: Հարցին պետք է այդ կողմից նայել: Այդ վիճակը բնական է, չի կարելի ամեն ինչ կապել հեղափոխության հետ: Մի հատ էլ պետք է փորձել հեղափոխության հիմքերը նայել: Հեղափոխականները միայն նրանք չեն, ովքեր ապրիլյան օրերին փողոցներ են փակել կամ սելֆիներ ունեն Փաշինյանի հետ: Մենք ունենք լուռ, համեստ հեղափոխականներ, ովքեր տարիներ շարունակ ամենակարևոր գործն են արել՝ գիտակցություն են փոխել: Իսկ առանց փոխված գիտակցությամբ հասարակության՝ այդ հեղափոխությունը չէր լինի: Գնահատենք յուրաքանչյուրին՝ ըստ արժանվույն»:

Աննա Բադալյան