Հայաստանի մանևրելու հնարավորություններն արտաքին քաղաքական դաշտում սահմանափակ են. Նարեկ Գալստյան

Զարմանալու ոչինչ չկա, որ Նիկոլ Փաշինյանը հայտարարում է, թե Հայաստանը հետամուտ է լինելու ազգային շահերի պաշտպանությանը: Բայց ժամանակը ցույց կտա, թե որքանով կհաջողվի մեզ պահել ինքնիշխանությունը: 

Այս մասին Tert.am-ի հետ զրույցում ասաց քաղաքագետ Նարեկ Գալստյանը՝ խոսելով վարչապետի պաշտոնակատար Նիկոլ Փաշինյանի այն պարբերական հայտարարությունների մասին, թե մենք ինքնիշխան ենք, և մեր գործընկեր պետությունները պետք է հարգեն ՀՀ սուվերենությունը:

«Մինչև իշխանափոխությունը ընդդիմությունն ու որոշ փորձագիտական շրջանակներ հայտարարում էին, որ Հայաստանի ինքնիշխանությունը սահմանափակված է: Նման մտքեր էին հնչում՝ հաշվի առնելով Ռուսաստանից ունեցած մեր կախվածությունը: Երբեմն գույները խտացվում էին. ասվում էր, թե ՌԴ թելադրանքով է Հայաստանը վարում իր արտաքին քաղաքականությունը: Դրանում կա որոշակի ճշմարտություն»,- ասաց քաղաքագետը: 

Ըստ նրա՝ գերկախվածությունը ցանկացած ուժային կենտրոնից սահմանափակում է արտաքին քաղաքականության մեջ մանևրելու հնարավորությունները:

«Իշխանության գալուց ի վեր Նիկոլ Փաշինյանը հայտարարեց, որ արտաքին քաղաքականության մեջ կտրուկ փոփոխություններ չեն լինելու, փոխվելու են շեշտադրումները, Հայաստանն առավելագույնս հետամուտ է լինելու ինքնիշխանության պահպանմանը»,- ասաց նա:

Նարեկ Գալստյանը նշեց, որ ազգային շահերի պաշտպանությունը կախված է երկրի ներքին կարողությունից, արտաքին միջավայրում ուժերի բալանսից և մի շարք այլ գործոններից:

«Հայաստանը յուրահատուկ տարածաշրջանային համալիր է, այստեղ կան յուրահատուկ ուժային դասավորվածություններ:

Հայաստանի ինքնիշխան գործողությունները սահմանափակ են: Նորմալ է, որ հայտարարում են, որ ինքնիշխան ենք, նորմալ է, որ կա նման միտում, նորմալ է, որ հետամուտ ենք լինելու մեր սեփական շահերին, տուրք չենք տալու ուժային կենտրոններին, բայց ժամանակը ցույց կտա՝ կհաջողվի՞ դա անել, թե ոչ»,- մանրամասնեց քաղաքագետը:

Ըստ նրա՝ Հայաստանն արդեն ԵԱՏՄ անդամ է, սա իրողություն է և որպես այդ կառույցի անդամ պարտավորություններ ու պարտականություններ ունի:

«Հայաստանն ունի որոշակի կախվածություն: Պետք է ռեալիստ լինենք, հասկանանք առկա իրողությունները: Իհարկե, մեր մանևրի հնարավորությունները սահմանափակ են: Ցանկացած պետություն, որն անդամակցում է ինտեգրացիոն կազմակերպության, սահմանափակում է իր ինքնիշխանությունը: Սա բոլորի դեպքում է՝ մեկի մոտ՝ շատ, մեկի մոտ՝ քիչ: Հիմա մենք արդեն ԵԱՏՄ անդամ ենք: Այո, Նիկոլ Փաշինյանն ընդդիմություն եղած ժամանակ շատ էր քննադատում ասիմետրիկ արտաքին քաղաքականությունը: Հիմա նա ասում է՝ եկեք հստակեցնենք մեր պարտավորությունները: Քիչ չեն եղել դեպքերը, որ մեր ԵԱՏՄ գործընկերներն իրենց չեն պահել հարիր, օրինակ՝ Ապրիլյան պատերազմի ժամանակ: Ավելին, նրանց քայլերը հակասել են գործընկերային հարաբերություններից»,- մանրամասնեց նա:

Իսկ Նիկոլ Փաշինյանի հայտարարությունները, Գալստյանի տպավորությամբ, արտահայտում են ընդդիմանալու ցանկություն, եթե ապագայում լինեն գործընկերային հարաբերություններին հակասող քայլեր ԵԱՏՄ անդամ-պետությունների կողմից:

Բայց ամբողջապես ընդդիմանալու համար, Նարեկ Գալստյանի խոսքով, Հայաստանը պետք է բարձրացնի իր քաշը միջազգային դաշտում: