Օպերային երգիչ դառնալու երազանքս չիրականացավ. դերասան Վիգեն Թադևոսյանի խոստովանությունը

Past.am-ն այսօր զրուցել է Երևանի Պատանի հանդիսատեսի թատրոնի դերասան Վիգեն Թադևոսյանի հետ, ում հեռուստադիտողն առավել ծանոթ է «Քաղաքում», «Երեք կյանք», «Լիալուսին» սերիալներից: Երիտասարդ դերասանն օրերս է նշանադրվել դերասանուհի Անի Վարդանյանի հետ:

Ինչպիսի՞ն կլինի առաջիկա հարսանիքը, ի՞նչ միջոցներով է ապրելու արվեստասեր նորաստեղծ ընտանիքը, որո՞նք են այսօր էկրաններին չերևալու հիմնական պատճառները. այս և այլ հարցերի շուրջ անկեղծացավ մեր զրուցակիցը:

-Վիգեն, այժմ ինչ զբաղվածություն ունեք, բացի թատրոնից այլ տեղ աշխատո՞ւմ եք:

-Թատրոնից բացի զբաղվում եմ գեղարվեստական ֆիլմերի և գովազդների կրկնօրինակմամբ: Նաև զբաղված եմ ոչ խաղացանկային ներկայացումներում:

-Ինչպե՞ս է, Ձեզ այլևս սերիալներում չենք հանդիպում:

-Թեև մի քանի սերիալներից առաջարկներ եմ ստացել, բայց հարմար առաջարկ չունեմ: Բացի այդ, թատրոնում զբաղվածությունս շատ է, ֆիզիկապես չեմ հասցնում: Սերիալը շատ ժամանակ է գողանում, քիչ վարձատրում:

Պատանի հանդիսատեսի թատրոնում աշխատող, սերունդ դաստիարակող դերասանների համար համատեղելը դժվար է: Նաև իմ սիրելի թատրոնում շատ գործ կա, ինչի համար անչափ ուրախ եմ ու շնորհակալ մեր ղեկավար Հակոբ Ղազանչյանին:

-Գիտեք, բայց շատ դերասաններ հակառակն են պնդում՝ թատրոնն է ժամանակատար ու քիչ վարձատրող:

-Որքան էլ թատրոնը շատ ժամանակ «խլի», այն բավականությունն ու հոգևոր արժեքը, որը ստանում եմ թատրոնից, ոչ-մի սերիալի հետ փոխել չեմ կարող …

Ինչ վերաբերում է գումարին, սերիալներում աշխատող ոչ պրոֆեսիոնալ ծանոթներ ունեմ, որ այնտեղ 10-14 ժամ զբաղվածություն ունենալով՝ չնչին գումարով են համաձայնում վարձատրվել՝ միայն թե էկրաններին երևան: Նման դեպքում նախ տուժում է սերիալների որակը, և հետո, նրանց հետ նկարահանվող պրոֆեսիոնալների աշխատանքը հայտնվում է նույն հարթության վրա:

-Եթե չեմ սխալվում, նաև երաժշտական կրթություն ունեք: Այդ ուղղությամբ հմտանալու մասին երբեք չե՞ք մտածել:

-Այո, երաժշտական վոկալ կրթություն ունեմ. Թատերական ինստիտուտն ավարտելուց հետո ընդունվեցի Կոնսերվատորիայի դասական վոկալի բաժին՝ միանգամից երկրորդ կուրս: Սակայն թատրոնի զբաղվածության և նկարահանումների պատճառով երկրորդ մասնագիտական կրթությունս կիսատ թողեցի, օպերային երգիչ դառնալու երազանքս չիրականացավ: Բայց ամեն ինչ դեռ առջևում է:

-Ինչպե՞ս եք գնահատում այսօր երիտասարդ դերասանի կարգավիճակը Հայաստանում: Գո՞հ եք Ձեր զբաղվածությունից:

-Կարծում եմ, կրթություն ունեցող յուրաքանչյուր երիտասարդ դերասան ինչ-որ չափով գտնում է իր տեղը: Չնայած, խոչընդոտող ու խանգարող հանգամանքներ շատ կան: Օրինակ, ներկայիս հեռուստաեթերներում հաճախակի առաջին տեղերում զբաղված են ոչ պրոֆեսիոնալները, անընդհատ նույն հոգնեցնող դեմքերն են: Ամեն դեպքում, ես գոհ եմ իմ զբաղվածությունից:

-Շուտով ընտանիք եք կազմելու, արդյոք կկարողանաք հոգալ ընտանիքի հոգսերը միայն թատրոնի եկամուտով, թե՞ նախաձեռնում եք որևէ բիզնես:

-Ուղղակի ծիծաղելի է թատրոնի եկամտով ընտանիքի կարիք հոգալը. կատարված աշխատանքի դիմաց համարժեք վարձատրություն չկա: Այնպես որ, բիզնեսս նախապատրաստական փուլում է գտնվում, ընտանեկան բիզնես է լինելու:

-Այն չի՞ խանգարի մասնագիտությանը, արվեստին:

-Ոչ, ոչ մի կերպ չի կարող խանգարել, հատկապես արվեստին:

-«Քաղաքում» սերիալում Ձեզ հանդիպեցինք երազկոտ տղայի կերպարում: Իրականում երազկո՞տ եք:

-Ոչ, երազկոտ չեմ, ճիշտ հակառակն եմ: Ասեմ ավելին, սերիալային կերպարս ինձ հետ ոչ մի ընդհանրություններ չունի, հաճախ շրջապատիս թյուրիմացության մեջ է գցում:

-Վիգեն, ծնունդով Եղվարդից եք, ո՞ւմ հետ եք ապրում Երևանում:

-Երևանում չեմ ապրում, ծնվել մեծացել եմ Եղվարդում և շարունակում եմ ապրել ծնողներիս հետ:

- Ամեն օր գնում-գալի՞ս եք: Հոգնեցնող ու ծախսատար չէ՞:

-Հաճախ են հարցնում այդ մասին. նշեմ, որ Եղվարդն այնքան էլ հեռու չէ Երևանից: Պատկերացրեք, որ Երևանի ծայրամասերում ապրող ընկերներիցս շուտ եմ երբեմն հասնում աշխատանքի: Ինչ վերաբերվում է ծախսատարին, այո, ծախսատար է, բայց սիրած գործի համար ոչինչ խնայել պետք չէ՝ ո՛չ ժամանակ, ո՛չ էլ Ձեր ակնարկած գումարը:

- Ընտանիքի միա՞կ զավակն եք: Կպատմե՞ք Ձեր ընտանիքի մասին:

-Ծնողներս շատ արվեստասեր են, նրանց կարծիքը շատ կարևոր է ինձ համար: Ինձանից մեծ, ամուսնացած քույր և եղբայր ունեմ, հրաշալի զարմիկներ, որոնցից շա՜տ բաներ եմ սովորում: Ինձ համար մեծ տոն է լինում, երբ բոլորս հավաքվում ենք մեր հայրական տանը և անփոխարինելի, անմոռանալի ժամանակ անցկացնում:

-Օրեր առաջ եք նշանադրվել, Ձեր ընտրյալն էլ դերասանուհի է: Դժվար չի՞ լինի ընտանիքում երկու արվեստագետի առկայությունը:

-Դժվարություն բացարձակ չեմ տեսնում: Ասեմ ավելին՝ անչափ ուրախ եմ, որ նույն մասնագիտությունն ունենք և աշխատում ենք միասին:

-Ամեն դեպքում, Ձեզ չի՞ վախեցնում դերասանուհի կին ունենալու հանգամանքը:

-Դե, կարծում եմ՝ նմանը նմանին է գտնում, և երբ կա սեր, փոխադարձ վստահություն՝ վախենալու առիթ չեմ տեսնում:

-Հիշո՞ւմ եք Ձեր առաջին սիրո խոստովանությունը:

-Այո, հիշում եմ, երբեք չեմ մոռանա՝ անձրևոտ օր էր ...

- Կարծեք թե ռոմանտիկ եք, այո՞:

-Դե, կարծում եմ ռոմանտիկ լինելու համար չպետք է նստել և մտածել, ուղղակի պետք է գործել (ժպտում է):

-Բնավորությամբ խանդո՞տ եք:

-Չափի մեջ … Խանդը լավ բան չէ:

-Ի՞նչ եք կարծում, երբևէ Ձեր կնոջ առջև մասնագիտական արգելքներ կդնե՞ք:

-Այդ մասին երբևէ չեմ մտածել:

-Ե՞րբ սպասենք Ձեր հարսանյաց հանդիսությանը:

-Ամռանը՝ հուլիսի երկրորդ կեսին:

-Ի դեպ, ավանդական հարսանիքի կողմնակի՞ց եք, թե՞ արվեստագետին բնորոշ` կտարբերվեք:

-Ե՛վ մեկը, և՛ մյուսը: Արդեն մի քանի հարսանեկան սցենարներ ենք մտածել, բայց մանրամասները Ձեզ կվստահեմ հարսանիքից հետո:

-Ի՞նչ երազանքներ ունեք:

-Ավելի շատ նպատակներ ունեմ, երազելու ժամանակ չեմ ունենում: Միայն ասեմ, որ շատ եմ ցանկանում խաղաղ լինի պետության սահմանը, ոչ մի զոհ չունենանք:

Նելլի Մարգարյան