Մինչ վերջերս տարածաշրջանի սպառնալիք էին չլուծված կոնֆլիկտները, այժմ՝ անվտանգության համակարգի տարբեր մոտեցումներն են. Ս. Օհանյան

«Անվտանգությունն ու կայունությունը Հարավային Կովկասում. Տևական խաղաղության խթանումը տարածաշրջանում» խորագրով Երևանում անցկացվող Ռոուզ-Ռոթ 89-րդ սեմինարին ելույթի խոսքով հանդես եկավ ՀՀ պաշտպանության նախարար Սեյրան Օհանյանը, ով շեշտեց, թե համագործակցությունը ՆԱՏՕ-ի հետ կարևորում է և կարծում է, որ այս սեմինարի ընթացքում ի հայտ կգան տարածաշրջանային խնդիրների կարգավորման համար նոր գաղափարներ ու մտքեր:

Նախարարը ներկայացրեց Հարավային Կովկասում և նրա շուրջ տիրող անվտանգության իրավիճակը՝ պաշտպանության դիտանկյունից և նշեց, թե անվտանգությունը չի կարելի դիտարկել միջազգային զարգացումներից մեկուսացված կերպով։ Ընդհակառակը, ըստ նրա, մեր տարածաշրջանը միջազգային շահերի ներգործության անմիջական կրողն է:

Նախարարը ներկայացրեց վտանգները:

«Այս փոքր տարածաշրջանը Արևմուտքից սահմանակցում է ՆԱՏՕ-ին, որի անդամ Թուրքիան ծայրահեղ տարբեր հարաբերություններ ունի Հարավային Կովկասը ներկայացնող երկրների հետ»,-ասաց նա և նշեց, թե վերջին ընտրությունները Թուրքիայում ցույց տվեցին, որ Թուրքիայում տիրում է նոր իրողություն, որը ցանկացած փոփոխություն կարող է առաջացնել իրավիճակի անկայունության։
 

Ըստ նախարարի՝ արևելքում Կասպից ծովի ավազանն է՝ դեռևս չկարգավորված նավթավիճակով և հյուսիսում Ռուսաստանն է, որ Հարավային Կովկասի սահմանի հետ ունի իր պետական խնդիրները:

Նախարարը փաստեց, որ եթե մինչև վերջերս Հարավային Կովկասի համար սպառնալիք էին համարվում ժառանգություն մնացած չլուծված կոնֆլիկտները, ապա հիմա արդեն տարածաշրջանում անվտանգության համակարգի շուրջ տարակարծիք մոտեցումներ կան:

 «Տարածաշրջանի երկրները տարբեր մոտեցումներ ունեն հավաքական անվտանգության, էներգետիկ անվտանգության և այլ հարցերում և հաճախ մոտեցումները փոխլրացնելու փոխարեն՝ միմյանց դեմ են լինում»,-ասաց նա:

Նախարարը նկատեց, թե բացի ավանդական կամ համաչափ սպառնալիքներից կայծակնային արագությամբ անդրազգային ահաբեկչության գործողություններ են զարգանում։ Նա նկատի ուներ Իսլամական պետության ստեղծումը, որը կարճ ժամանակում իր թիրախում վերցրեց առնվազն տարածաշրջանի երկու երկիր։

«Կան հաստատված տվյալներ, որ իսլամական պետության շարքերում կռվում են նաև ադրբեջանցի և կովկասյան երկրներից այլ գրոհայիններ: Այս մարտիկների վերադարձը առաջինը սպառնալու է հենց իրենց երկրներին, հետո արդեն Հայաստանին»,-ասաց նա:
 

Այս համատեքստում էլ, ըստ նրա, ՀՀ-ն իր անվտանգությունը կառուցում է բազմավեկտոր՝ ՀԱՊԿ-ի անդամ լինելուն զուգահեռ, նաև ակտիվորեն համագործակցում ՆԱՏՕ-ի հետ, դիտելով իր անվտանգության համակարգի անբաժանելի մասը:

Իսկ այդ համագործակցությունը, ըստ նրա, մի քանի հիմնական նպատակներ է հետապնդում, որոնցից է միջազգային անվտանգության համակարգի լիարժեք անդամ լինելը, ՀՀ-ի պաշտպանության համակարգի թափանցիկության հաստատումը, արտերկրների դեմ հարձակման մտադրությունների բացառումը, ՀՀ- ՊՆ համակարգի բարեփոխման ընթացք և այլն:

Ի դեպ, նախարարը հատկանշական համարեց, որ ՀՀ-ն ՀԱՊԿ-ի միակ անդամն է, որ նաև լինելով ՌԴ-ի ռազմական դաշնակից, ՆԱՏՕ-ի կողմից իրականացվող խաղաղարար բոլոր միջոցառումների մասնակից է, այն դեպքում, երբ ՆԱՏՕ-ի անդամ երկրներն են դուրս բերում իրենց զորքերը: Նախարարը նշեց, թե ՀՀ-ն պահպանում է իր որդեգրած սկզբունքը՝ «բոլորով ներս և բոլորով դուրս»:

Սեյրան Օհանյանը շեշտեց, թե ՆԱՏՕ-ից ակնկալվում է հավասարակշռված մոտեցում, չնայած որ նկատելի է ՆԱՏՕ-ի անդամներից մեկի կողմնակալ մոտեցումը: