Դայակը կարող է լինել ընտանիքի անդամը, կարևորը՝ նույն հասցեում հաշվառված չլինի. «Փաստ»

«Փաստ» օրաթերթը գրում է.

Նախորդ շաբաթ կառավարության նիստում հաստատվեց մինչև երեք տարեկան երեխայի խնամքի արձակուրդում գտնվող աշխատանք փնտրող անձանց՝ մինչև երեխայի երկու տարին լրանալը աշխատանքի վերադառնալու դեպքում երեխայի խնամքն աշխատանքին զուգահեռ կազմակերպելու համար աջակցության տրամադրման ծրագրի իրականացման կարգը։ 

Ծրագրի շահառու դառնալ ցանկացողները պետք է նախապես գրանցվեն իրենց բնակության վայրի զբաղվածության տարածքային կենտրոններում: Ծրագրի մասնակիցների թիվը սահմանվել է 200: Ծրագրում ընդգրկվել ցանկացող անձանց թիվը գերազանցելու դեպքում առաջնահերթությունը կտրվի նպաստ ստացող, զույգ, երեք և ավելի, ինչպես նաև՝ հաշմանդամություն ունեցող երեխա ունեցող ընտանիքներին:

«Փաստը» թեմայի շուրջ զրուցել է աշխատանքի և սոցիալական հարցերի նախարարության աշխատանքի և զբաղվածության վարչության պետ Ժորա Սարգսյանի հետ: 

-Պետությունը այս ծրագրի միջոցով որքա՞ն ընտանիքի կարող է կամ պատրաստ է օգնել: Ծրագրին միանալու ցանկություն ունեցող մայրիկները, հաստատապես 200, 500 կամ 1000 չեն, այլ՝ շատ ավելի շատ:

-Այս պահին ծրագիրը նախատեսված է 200 շահառուի համար: Նախատեսված գումարն այդքան է: Սա պիլոտային ծրագիր է, որը դեռ չի ներդրվել, ծրագրի արդյունավետությունը կարոդ է գնահատվել միայն ներդրվելուց հետո: Այս պահին կանխատեսումներ դեռևս հնարավոր չէ անել մեկ պարզ պատճառով՝ ծրագիրը դեռ չենք իրականացրել: Մեկնարկը տալուց հետո կտեսնենք՝ որքան է պահանջարկը և ինչպիսին է ծրագրի արդյունավետությունը: Արդեն սկսել ենք դիմումներ ստանալ: Որոշակի ընթացակարգից հետո օրենքը ուժի մեջ կմտնի և կսկսվի հասցեականորեն կիրառվել: 

-Նախագծում ասված է, որ դայակը կարող է լինել մայրիկի բնակության հասցեում չհաշվառված ազգականը: Դա կարո՞ղ է լինել երեխայի տատիկը, ով ապրում է ընտանիքի հետ միասին, բայց հաշվառված չէ: Թե՞ ընտանիքի հետ ապրող տատիկ լինելու դեպքում ծրագրի շահառու հնարավոր չէ դառնալ:

-Նման բացառություն նախատեսված չէ: Միակ սահմանափակումը նույն հասցեում հաշվառված լինելն է:

-Դա որոշակի դժգոհությունների պատճառ չի՞ դառնա: 

-Չեմ կարծում: Եթե, օրինակ, ծրագրին արդեն դիմած լինի 195 քաղաքացի, մենք ունենք հնարավորություն ևս 5 շահառուի ընդգրկելու հնարավորություն: Եթե այդ 5 տեղի համար դիմողների թիվը լինի 10, ապա այդպիսի դեպքերի համար նախատեսված են որոշակի առաջնահերթություններ: Մենք այս դեպքերում առաջնահերթությունը տալու ենք ավելի խոցելի խմբերին: Պետք է պարզապես հնարավորինս շուտ հաշվառվել:

-Շահառու դառնալու համար պետք է նախապես հաշվառված լինել իրենց բնակության վայրի զբաղվածության տարածքային կենտրոններում: Նախապես ասվածը որքա՞ն ժամանակահատված է նշանակում: 

-Ոչ մի խնդիր ու ժամկետի սահմանափակում չկա: Մարդիկ կարող են այսօր էլ հաշվառվել, ներկայացնել իրենց փաստաթղթերը, և եթե բավարարեն պահանջներին, հաջորդ օրն էլ դառնան ծրագրի շահառու:

-Պետության կողմից փոխհատուցվող գումարը ո՞ւմ է տրվելու՝ ծնողի՞ն, դայակի՞ն, թե՞ մանկական խնամք իրականացնող կազմակերպությանը:

-Գումարը հատկացնելու ենք շահառուին, փոխանցելու ենք իր բանկային հաշվեհամարին: Նա այդ գումարին ավելացնելու է իր կողմից վճարվող գումարը և վճարի դա դայակին կամ կազմակերպությանը: 

-Նախկինում երբեք չաշխատած կանայք կարո՞ղ են դառնալ շահառու:

-Այդ մասով որևէ խնդիր չկա: Կարգավորումը աշխատանքային ստաժ չի պահանջում, ընդամենը մեկ կարգավորում է նախատեսում՝ հաշվառվելու՝ փաստաթղթերը ներկայացնելու պահին պետք է ունենան աշխատանք և գտնվեն երեխայի խնամքի արձակուրդում:

-Արդեն ֆիզարձակուրդից վերադարձած ու իր աշխատավայրում վերականգնված մայրը նույնպես կարո՞ղ է դիմել և դառնալ ծրագրի շահառու:

-Այդ կարգավիճակով չի կարող: Աշխատանքի մեջ գտնվող վիճակում չի կարող դառնալ ծրագրի շահառու: Անպայման պետք է գտնվի խնամքի արձակուրդում:

-Ձեր կողմից վերահսկողության ինչպիսի՞ մեխանիզմներ են գործելու:

-Պայմանագիրը լուծվում է շահառուի աշխատանքից ազատվելու դեպքում: Ինչպե՞ս է դա իրականացվում: Մենք ամեն ամիս տեսնում ենք փոխանցումները և միևնույն ժամանակ օգտվում ենք միասնական տեղեկատվական բազայից: Եթե աշխատողի հետ աշխատանքային հարաբերությունները դադարեցվում են, մենք դա տեսնում ենք: Եթե պարզվի, որ շահառուն խախտել է որոշման կետերը, մենք հետգանձնման իրավունք ձեռք կբերենք: Եթե շահառուն աշխատել է մինչև երեխայի 1,5 տարեկան լրանալը, դրանից հետո չենք վճարի, ու այդքանով մեր հարաբերությունները կավարտվեն: Բայց եթե շահառուն չի աշխատում և թաքցնում է այդ փաստը, մենք շատ կարճ ժամանակահատվածում կիմանանք, որովհետև համադրման արդյունքում տեսնելու ենք ծրագրի շահառուն աշխատո՞ւմ է, թե՞ ոչ: Մեխանիզմը շատ պարզ է, սրա հետ կապված բացահայտելու ոչ մի խնդիր չունենք, որովհետև էլեկտրոնային տարբերակով այդ ամբողջ տեղեկատվությունը տեսնում ենք: