«ԱՄՆ-ի նամակը վերջնագիր չէ՝ ըստ էության, «զոնդաժ» են անում». քաղաքագետ

ԱՄՆ դեսպանատունը նաև ՀՀ կառավարությանն է ծանուցել հնարավոր պատժամիջոցների թիրախում հայտնվելու մասին: Ըստ ծանուցման՝ պատժամիջոցներ կարող են կիրառվել մասնավորապես  Ռուսաստանի ռազմա-արդյունաբերական համալիրի ընկերությունների հետ նշանակալի գործարքների կնքման պարագայում:

Քաղաքագետ Երվանդ Բոզոյանը Past.am-ի հետ զրույցում կարծիք հայտնեց, որ այս ամենը կապված է ռուս-ամերիկյան հարաբերությունների վատթարացման հետ:

«Մենք տեսանք, որ ԱՄՆ-ի ֆինանսների նախարարությունն ավելի վաղ հանդես եկավ ցուցակով, որտեղ ներառել էր Ռուսաստանի ողջ տնտեսական ու քաղաքական վերնախավին («Կրեմլյան ցուցակ»): Բացի այդ՝  հայտարարեց նաև, որ պատրաստվում է հանդես գալ նոր ցուցակով, որի համաձայն արդեն պատժամիջոցների կենթարկվեն կոնկրետ կորպորացիաներ: Իմ կարծիքով վերոնշյալը նախապատրաստական քայլ է, որով փորձում են ճնշում գործադրել այն երկրների վրա, որոնք զենք և զինամթերք են գնում Ռուսաստանից: Սա գլոբալ նպատակ է հետապնդում.  ցանկանում են փոքրացնել Ռուսաստանի կողմից զենք վաճառելու «քարտեզը»,  և զուգահեռ ուժեղացնեն իրենց  դիրքը զենքի շուկայի առևտրում:  Ընդհանրապես ցանկանում են թուլացնել Ռուսաստանի տնտեսական պոտենցիալը»,-ասաց քաղաքագետը:

Ինչ վերաբերում է հայկական կողմի անելիքներին, նա նշեց, որ բավականին բարդ իրավիճակի մեջ ենք հայտնվում. «Ի տարբերություն Ադրբեջանի՝ մենք բավականին լուրջ կախվածություն ունենք հենց Ռուսաստանի ռազմա-արդյունաբերական համալիրից: Ադրբեջանն, ի տարբերություն մեզ, զենք է գնում նաև Թուրքիայից, Պակիստանից ու մասնավորապես Իսրայելից: Եվ այս համատեքստում կարծում եմ, որ Հայաստանը պետք է փորձի բավականին դժվարին բանակցություններ վարել ամերիկյան կողմի հետ, որպեսզի  կարողանա չեզոքացնել այս վտանգը:

Մենք նման փորձ ունենք Իրանի հետ հարաբերություններում: Երբ Իրանը միջազգային պատժամիջոցների տակ էր գտնվում, Հայաստանը Իրանի հետ հատուկ ռեժիմով առևտուր անելու հնարավորություններ ուներ: Հայաստանը վերոնշյալ պարագայում ևս պետք է բավականին դժվար և ճիշտ լուծումներ գտնի, որպեսզի թե՛ ԱՄՆ-ի և թե՛ ՌԴ-ի հետ չվտանգի փոխհարաբերությունները»:

Անդրադառնալով հայկական կողմի՝ զենք ձեռք բերելու կարևորության փաստին, Երվանդ Բոզոյանը նշեց, որ ԱՄՆ-ի համար տարածաշրջանային խնդիրներն այնքան էլ կարևոր չեն:

«Իրենք ավելի շատ գլոբալ խնդիր են լուծում՝ փորձում են ճնշել Ռուսաստանին, խոչընդոտել ՌԴ-ի ռազմա-արդյունաբերական ոլորտի գործունեությանը, որպեսզի ՌԴ-ն չկարողանա ընդլայնել իր ազդեցության ոլորտները: Սա, ըստ էության, ընդգրկում է  և՛ քաղաքականությունը, և՛ բիզնեսը, և՛ տնտեսությունը: Իսկ օրինակ այն, որ մենք կարող ենք խնդիրներ ունենալ, իրենց համար երկրորդական է: Այլ խնդիր է, որ մենք պետք է կարողանանք միաժամանակ ապահովել մեր անվտանգության համակարգը,  բարիդրացիական հարաբերություններ պահպանենք բոլորի հետ ու նաև  սանկցիաների տակ չընկնենք»,-նշեց քաղաքագետը՝ հավելելով, որ ամեն ինչ կախված է հայկական կողմից տարվող բանակցություններից:

«Երբ ԱՄՆ-ն նամակ է ուղարկում, չի նշանակում, որ վերջնագիր են ուղարկում: Նրանք, ըստ էության, «զոնդաժ» են անում:  Պարզ է, որ Ռուսաստանը ռազմա-արդյունաբերական ոլորտում շատ երկրների հետ է համագործակցում: Եթե ԱՄՆ-ն բոլորին միանգամից սանկցիաների տակ  դնի, ապա աշխարհի կեսի հետ պետք է փչացնի իր հարաբերությունները: Այս պարագայում ԱՄՆ-ը ճնշման քաղաքականություն է տանում, փորձում է հասկանալ՝ որտեղ կա թույլ, և որտեղ կա ուժեղ կողմ: Այստեղ աստվածաշնչյան ճշմարտություններ պետք չէ փնտրել:
Հայաստանն Իրանի հետ ունեցած փորձն օգտագործելով՝ կարող է խնդիրներ լուծել նաև այս հարցում: Եթե ճիշտ որոշումներ չկայացնենք, կարող ենք պատժամիջոցների տակ հայտնվել, կամ խնդիրներ ունենալ անվտանգության ոլորտում»,-եզրափակեց մեր զրուցակիցը:

Աննա Բադալյան

Այս թեմայով Քաղաքական փաթեթի չորս կարևոր հարցերը. Ի՞նչ խնդիր է դրված նոր կառավարության առաջ «Հայաստանի վարկանիշը պետք է կապիտալիզացնել ի շահ Հայաստանի». Երվանդ Բոզոյան Անհրաժեշտ քաղաքական բանաձևերն ու այլ իրականության մեջ գտնվող իշխանությունը Արմեն Սարգսյանը չի հակադրվի իշխանությանը «Փաշինյանն ավելի ակտիվ գործընկերներ կփնտրի, քանի որ «Լուսավոր Հայաստանն» ու «Հանրապետությունը» անհեռանկարային կառույցներ են». Երվանդ Բոզոյան