Սեյրան Օհանյանի հանգուցալուծումը մոտենում է

Զինված խմբի գործով դատական նիստի ժամանակ ուշագրավ ձայնագրություն հրապարակվեց, որը, ըստ էության, թույլ է տալիս մտածելու, որ պաշտպանության նախկին նախարար Սեյրան Օհանյանը որոշակի կապ է ունեցել խմբի հետ կամ թերևս ցանկացել է կապ ունենալ։ Դատարանում մասնավորապես հրապարակվեց Լիլիթ Ք.-ի կողմից Վահան Շիրխանյանի տանը կատարված ձայնագրությունը: Զրուցում են Վահան Շիրխանյանը և Արթուր Վարդանյանը: Խոսք է գնում նախապատրաստվող գործողությունների և Սեյրան Օհանյանի մասին: 

Ձայնագրության մեջ խոսվում էր այն մասին, որ Օհանյանը դժգոհ է Սերժ Սարգսյանից ու մի շարք մականունավոր պաշտոնյաներից ու, ըստ էության պատրաստ է ըմբոստության: Օհանյանի և զինված խմբի միջև եղած կապի մասին շատ է խոսվել: Հիմա կարծես հասել է պահը, երբ խոսակցությունները փաստական հիմք են ստանում: Մնում է ապացուցել Օհանյանի անմիջական կապը:

Նման ցանկացած անուղղակի կապ Սարգսյանի համար բավարար կլիներ որևէ մեկին բանտարկելու համար: Սակայն, Օհանյանին կարծես նման բան չի սպառնում: Ամեն դեպքում նա ՕՐՕ դաշինքով մասնակցեց խորհրդարանական ընտրություններին ու ձախողեց: Մեծ հաշվով, նրան այժմ կալանավորել կամ կալանավորել ընտրություններից առաջ կնշանակեր նրանից ստեղծել քաղհալածյալի լիարժեք կերպար, արդարության մարտիկի օրինակ, ով լքել է պաշտոնը հանուն հեղափոխության: 

Երևի թե սա է պատճառը, որ ամեն դեպքում Օհանյանը շարունակում է մնալ անձեռնամխելի: Սա իրականում ներում չէ, այլ պատիժ, որովվհետև փաստացի մի իրավիճակում, երբ Սարգսյանը զրկում է Օհանյանին ֆորս մաժորի շանսից, նա Օհանյանին զրկում է նաև հանդարտ պայմաններում խաղարկելու հնարավորությունից:

Ու քանի դեռ չկա ֆորս մաժոր Օհանյանի ու նրա նման ՝ համակարգը լքողների պլանները չեն իրականանալու: 

Արտակ Ասլանյան