Գյումրիում մեկնարկեց քանդակագործության միջազգային 3-րդ սիմպոզիումը

 Գյումրիում մեկնարկեց քանդակագործության միջազգային 3-րդ սիմպոզիումը, որին մասնակցում են ԱՊՀ  երկրների արվեստագետներ և արվեստաբաններ։ Սիմպոզիումը զուգորդվում է «Քաղաքաշինական գծի փոփոխությունները հետխորհրդային տարածքում և ժամանակահատվածում» խորագրով գիտաժողովով։

Ինչպես նախկինում, այս տարի ևս այն անցկացվում է «Գյումրու մշակութային էքսպերիմենտալ կենտրոն»  կազմակերպության նախաձեռնությամբ՝ ԱՊՀ  երկրների Մոսկովյան  համագործակցության հումանիտար  հիմնադրամի  ֆինանսական աջակցությամբ: Նախաձեռնության աջակցում են ՀՀ մշակույթի նախարարությունը և Գյումրու  քաղաքապետարանը: Այս տարի նախաձեռնությանը միացել է նաև Գեղարվեստի ակադեմիայի Գյումրու  մասնաճյուղը:

Սիմպոզիումին մասնակցում է 7 երկրի 30 արվեստագետ: Ի տարբերություն նախորդ տարիների, այս տարի սիմպոզիումի մասնակիցերը կփորձեն նաև  միմյանց ներկայացնել իրենց երկրների քանդակագործության միտումները: «Այս տարի նաև  գիտաժողովի ընթացքում կփորձենք  հասկանալ թե ինչ  տենդենցներ կան մասնակից երկներում, ինչպես է զարգանում արվեստը, ի  տարբերություն նախորդ տարիների, այս տարի չեն կատարվի բացօթյա  քանդակներ՝  այս անգամ մասնակիցները կստեղծեն հաստոցային քանդակներ, որոնք հետագայում կտեղադրվեն քաղաքի տարբեր կրթօջախներում կամ այլ հաստատություններում: Դրանց տեղը կորոշվի համապատասխան հանձնաժողովի կողմից»,-  «Արմենպրես»-ին տեղակացրեց սիմպոզիումի հեղինակ,  «Քանդակագործության ազգային պարկ» թանգարանի տնօրեն, «Գյումրու մշակութային էքսպերիմենտալկենտրոն» ՀԿ նախագահ Արթուր Գևորգյանը ՝ փաստելով, որ  սիմպոզիումի ընթացքում ստեղծված քանդակները «Քանդակագործության ազգային պարկ» թանգարանի  սեփականությունն են:

Հաշվի առնելով սիմպոզիումի խորագիրը՝ «Վերելք», քանդակագործները աշխատանքներն էլ իրականացնելու  են  այս թեմատիկայով:

Արմենուհի Մխոյան