Այն գիտելիքը, որը տալիս է ՀՀ Փաստաբանական դպրոցը բավական բարձր մակարդակի վրա է. Արա Զոհրաբյան

ՀԱՍԱՐԱԿՈՒԹՅՈՒՆ 25 Նոյեմբեր, 2017 19:46

ՀՀ Փաստաբանական դպրոցի շրջանավարտների երդման և արտոնագրերի հանձնման արարողությունը սկսվեց Փաստաբանների պալատի խորհրդի հանդիսավոր նիստով, որի ընթացքում խորհրդի անդամները միաձայն որոշեցին բավարարել հավակնորդների արտոնագրեր ստանալու մասին դիմումները:

Բացման խոսքով հանդես եկավ ՀՀ ՓՊ նախագահ Արա Զոհրաբյանը, ով կարևորելով արդարադատության իրականացման գործընթացում փաստաբանի դերը նշեց.«Այսօր բոլոր ոլորտներում պրոֆեսիոնալ մասնագետների կարիք է զգացվում: Հարկավոր են մարդիկ, ովքեր իրենց հայրենասիրությամբ, ջանասիրությամբ ու մասնագիտական բարեխղճությամբ պատրաստ կլինեն դեպի լավը փոխել կարգավիճակը ու իրենց ձեռքը վերցնել որոշակի խնդիրների լուծման գործընթացները: Շնորհակալություն եմ հայտնում Փաստաբանական դպրոցի դասախոսական կազմին, պրակտիկ փաստաբաններին, իրենց մասնագիտական փորձն ու գիտելիքները ձեզ փոխանցելու համար:

Ցանկանում եմ նաև շնորհակալություն հայտնել Փաստաբանական դպրոցի աշխատակազմին, որն առօրյա ռեժիմով մասնակցել է ձեր խնդիրների լուծմանը, ինչպես նաև որակավորման հանձնաժողովի անդամներին ու փաստաբանների պալատի աշխատակազմին, որոնց քրտնաջան աշխատանքի արդյունքում կարողացաք այս առիթով մասնակից լինել » ,-ասաց Ա. Զոհրաբյանը՝ հավելելով, որ դահլիճում հավաքված ապագա փաստաբանները հաղթողի կարգավիճակում են:

ՓՊ նախագահի խոսքից ու խորհրդի մի քանի անդամների բարեմաղթանքներից հետո, շրջանավարտները երդվեցին ազնիվ և բարեխիղճ կատարել փաստաբանի պարտականությունները, պահպանել փաստաբանական գաղտնիքը, պաշտպանել վստահորդների իրավունքները, ազատությունները և շահերը՝ ղեկավարվելով Հայաստանի Հանրապետության Սահմանադրությամբ, օրենքներով և փաստաբանի վարքագծի կանոնագրքով:

Past.am-ի հետ զրույցում ՀՀ Փաստաբանների դպրոցի տնօրեն Սիմոն Բաբայանը ասաց, որ այսօր փաստաբանների համայանքը համալրվեց 61 փաստաբաններով: Խոսելով դպրոցի ուսուցման պրոցեսից նա նշեց. «Ուսուցումն ընթանում է բավական բարդ երկու փուլերով՝ առաջինը տեսական, իսկ երկրորդն արդեն գործնական ուսուցումն է: Պետք է նշեմ, որ այս շրջանավարտներն ակտիվ մասնակցություն են ունեցել մեր իրավաբանական կլինիկայի աշխատանքներին՝ մասնավորապես պարբերաբար անվճար իրավաբանական խորհրդատվություններ ու օգնություն են տրամադրել նաև հանրային պաշտպանի գրասենյակում:

Մենք ցանկացել ենք շեշտադրում անել ոչ թե տեսական գիտելիքների վրա, որն անշուշտ շատ կարևոր է, այլ ցանկացել ու կազմակերպել ենք այնպես, որ ունկնդիրները տիրապետեն նաև գործնական հմտություններին »,- ասաց Ս. Բաբայանը:

ՓՊ նախագահն էլ անդրադարձ կատարելով մասնագիտական ոլորտում փաստաբանների հմտությունների իրացմանը, ընդգծեց.« Այսօր փաստաբանների համայանքը համալրվեց 61 փաստաբաններով: Կիսամյակային քննությանը մասնակցել էր 87 շրջանավարտ, որոնցից 21 չեն կարողացել հաղթահարել քննության անցողիկ շեմը: Այն գիտելիքները, որը տալիս է ՀՀ Փաստաբանկան դպրոցը բավական բարձր մակարդակի վրա են: Մենք դասացուցակներում մշտապես ընդգրկում ենք նոր թեմաներ:

Ինչ վերաբերում է քննությունների ոչ հաջող հանձնելուն, ապա դինամիկան նորմալ է ու վերահսկելի: Ունկնդիրներից շատերը, օրինակ վերաքննիչ բողոք կազմելուց,պահպանել են կառուցվածքը, սակայն սխալվել են գործի ելքի լուծման մեջ: Որակավորման քննությունները երեքն են, այն ունկնդիրներին, ովքեր որևէ առարկայից ոչ բավարար միավորներ են հավաքում, տրվում է ամեն առարկայից վերահանձնման մեկ հնարավորութուն:

Ի դեպ, դպրոցը կազմակերպում է վերապատրաստման անվճար դասընթացներ, որոնք անշուշտ օգնում են հետագայում բավարար բալեր հավաքել ու համայնք մտնել արդեն ամրացված գիտելիքներով », - ասաց Արա Զոհրաբյանը ՝շեշտելով, որ փաստաբանական դպրոց ընդունված յուրաքանչուր ունկնդրի հետ իրենք մեծ հույսեր են կապում: