Հնարավոր է ևս 10-15 տարով ավելացնել հայկական ատոմակայանի կյանքի տևողությունը

 ՀՀ նախագահին կից Ատոմային էնեգետիկայի անվտանգության խորհրդի անդամները հերթական նիստի ժամանակ քննարկել են Մեծամորի ատոմակայանի երկրորդ էներգաբլոկի շահագործման ժամկետի երկարացման հնարավորությունների հարցը: Այս մասին լրագրողների հետ զրույցում հայտնեց Ատոմային էնեգետիկայի անվտանգության խորհրդի գործադիր քարտուղար Վահրամ Պետրոսյանը: Նրա խոսքով` Ատոմակայանի երկրորդ էնեգաբլոկի, որը շահագործվում է Հայաստանում, շահագործման տևողությունը հնարավոր է երկարացնել 10, ապա նաև 5-10 տարով. դրա միջազգային փորձը կա: «Եթե նման էներգաբլոկների նախագծային շահագործման ժամկետը 30 տարի է, ապա արդեն գոյություն ունի միջազգային փորձ` հանձին Ռուսաստանի, Ուկրաինայի, Ֆինլանդիայի, Արևելյան Եվրոպայի երկրների, որ հնարավոր է ևս 30 տարով երկարացնել կյանքի տևողÕ �ւթյունը: Այս ընթացքում մենք երկարացնում ենք մինչև 10 տարի: Հետագայում, կարծում եմ, ևս 5 տարով հնարավոր կլինի ավելացնել»,-ասաց Վահրամ Պետրոսյանը`հավելելով, որ այդպիսով ապահովված կլինի Հայաստանի էներգետիկ անվտանգությունը:

Նա նշեց, որ նիստի ժամանակ քննարկվել է նաև վերջին երկու տարում Ատոմակայանի անվտանգության մակարդակի բարձրացմանն ուղղված աշխատանքների մասին հարցեր: «Վերջին տարիներին ռեակտորի վթարային պաշտպանության նոր համակարգ է մտցվել. եթե առաջ աշխատում էր մեկ ուղեգծով, ապա ներկայում երկակի պաշտպանություն է գործում: Դա, կարծում եմ, որ շատ լուրջ միջոցառում է: Բացի այդ` թարմացվել են շոգեգեներատորները, որոնք արդեն 30 տարի աշխատում էին: Մշակվում են վթարային ռեժիմների դեպքում ուղեցույցներ օպերատորների համար»,-նշեց Վահրամ ՊÕ �տրոսյանը` հիշեցնելով, որ Խորհուրդը ղեկավարում է Ադոլֆ Բիրկհոֆերը Գերմանիայից, և այն բաղկացած է 8 երկրների ճանաչված մասնագետներից:

Ինչ վերաբերում է Ատոմակայանում ներկայում ընթացող վերականգնողական աշխատանքների ընթացին, ապա Վահրամ Պետրոսյանի խոսքով` սարքավորումների դիագնոստիկայի փուլը մոտենում է ավարտին, 2016-ին պատրաստ կլինի հաշվետվությունը, դրանից հետո կմեկնարկեն նոր տեխնիկայի գնման ու տեղադրման աշխատանքները, իսկ 2018-ի վերջին արդեն կավարտվեն Ատոմակայանի վերականգնման աշխատանքները: 

Հոկտեմբերի 27-ին կայացել է ՀՀ նախագահին կից ատոմային էներգետիկայի անվտանգության խորհրդի 14-րդ նիստը, որը ստեղծվել է 1996 թվականին` ՀՀ նախագահի հրամանագրով: Անկախ խորհրդակցական այդ մարմինն ստեղծվել է` ելնելով Հայկական ատոմային էլեկտրակայանի հետագա անվտանգ շահագործումն ապահովելու անհրաժեշտությունից: 

Խորհուրդը ձևավորվում է միջազգային ճանաչում և հեղինակություն ունեցող գիտնականներից ու ոլորտի մասնագետներից: Խորհրդի գործունեությունն իրականացվում է Խորհրդի նիստերի միջոցով, որոնք հրավիրվում են տարին մեկ անգամ: 

Կանոնադրության համաձայն` Խորհրդի հիմնական խնդիրներն են` Ատոմային էնեգետիկայի անվտանգության և դրա զարգացման առաջնային ուղղությունների ձևավորումը, հիմնախնդիրների վերաբերյալ հանձնարարականների մշակումը և առաջարկությունների նախապատրաստումը: Ատոմային էներգիայի խաղաղ և անվտանգ օգտագործման վերաբերյալ Հայաստանի Հանրապետության նախագահին ներկայացված նորմատիվ իրավական ակտերի նախագծերի վերլուծությունը և փորձաքննությունը: