Եվ բոլորը հանկարծ հիշեցին Վանո Սիրադեղյանին

Օրը ցերեկով, Երևանի կենտրոնում ՝ Վերնիսաժի հարևանությամբ գտնվող հյուրանոցներից մեկի մուտքի մոտ, Կառավարությունից, ՀՀԿ և ՀՅԴ գրասենյակներից ընդամենը մետրեր հեռու հնչել են կրակոցներ, այնուհետ կրակահերթեր. կա զոհ և վիրավոր: Դատելով դեպքի վայրից հասնող լուսանկարներից, ինչպես նաև այն լուրերից, որ կրակահերթի մասնակիցները Ալավերդում քրեական ռազբորկաների վաղեմի մասնակիցներ են, ինչպես նաև ելնելով նրանից, որ շոշափվում է հեղինակություն Արտյոմ Կանևսկոյի անունը, կարող ենք վստահաբար ասել, որ գործ ունենք կազմակերպած հանցավորության հետ:

Սա կենցաղային դեպք չէ, խուլիգանություն չէ, ոչ էլ առանձին վերցրած մեկ անմեղսունակի գործողություն: Սա կազմակերպված հանցավորություն է: Իսկ ինչու է կարևոր հասկանալ, կազմակերպված է հանցավորությունը, թե ոչ: Որովհետև եթե Հայաստանի պես փոքր երկրում կազմակերպված հանցավորությունը կարող է մայրաքաղաքի կենտրոնում նման բան թույլ տալ, ուրեմն ուժային կառույցները ինչ-որ տեղ թուլացել են ու թերացել: 

Պատահական չէ, որ ֆեյսբուքում առաջին արձագանքը եղավ Վանո Սիրադեղյանի և նրա կողմից ընդամենը 10 րոպեում Երևանի քրեական միջավայրի էվակուացման մասին: Անկախ իշխանության և ուժային կառույցների որակներից, կա մի գիծ, որը պետք է թունդ կարմիրով նշված լինի ՝ կազմակերպված հանցավորությունը չպետք է կարողանա մայրաքաղքում օրը ցերեկով կրակել: Երկրորդական է ՝ իշխանությունը պայքարում է օրենքով գողերի դեմ, թե հովանավորում նրանց, օգտագործում է նրանց ռեսուրսն ընտրություններին, թե ոչ: Ուժային կառույցները պետք է ապահովեն մարդկանց անվտանգությունը ոչ միայն երկրից դուրս ՝ սահմանին, այլև երկրի ներսում: 

Դեպքն ինքնին արդեն կասկածի տակ է դրել Հայաստանի ուժային կառույցների ադեկվատությունը: Դեմքը փրկելու համար ուժայիններին մնում է միայն արագ ժամկետներում բացահայտել տեղի ունեցածը, համալիր միջոցառումներով գծել այն կարմիր գիծը, որ կազմակերպված հանցավորությունն այսօր խախտել է: 

 

Արտակ Ասլանյան