ՀՀ ԶՈւ գլխավոր շտաբի պետն այցելեց կենտրոնական հավաքակայան. Կան նորամուծություններ

Ամառային զորակոչի ընթացքին և իրականացվող աշխատանքներին տեղում ծանոթանալու նպատակով՝ ՀՀ զինված ուժերի գլխավոր շտաբի պետ Մովսես Հակոբյանը հուլիսի 1-ին  այցելեց ՀՀ ՊՆ Կենտրոնական հավաքակայան:

Ինչպես տեղեկացնում է «Արմենպրես»-ը, հավաքակայանում Հակոբյանը  շրջայց կատարեց, զրուցեց  զորակոչիկների հետ, հետաքրքրվեց նրանց առողջական վիճակով, ֆիզիկական կոփվածությամբ, կրթությամբ և մաղթեց բարի ծառայություն:  

Հայաստանի գլխավոր շտաբի պետը նշեց, որ այս տարի զորակոչի կազմակերպման գործում մտցվել է որոշակի նորամուծություն: «Մեր նպատակն է, որպեսզի զորակոչը լինի բացարձակ արդար, բոլորի համար տեսանելի և որևէ մեկի մոտ կասկած չառաջանա: Որոշակի փոփոխություն է կատարվել զինվորական համազգեստում՝ կոշիկների որակը բարձրացվել է, այն ամբողջապես պատրաստված է կաշվից: Բացի այդ, ներկայումս արգելվում է, որպեսզի նորակոչիկն իր հետ սնունդ բերի հավաքակայան, քանզի ներս մտնելուց հետո կերակուրը և բոլոր  իրերը, բացի անձնական հիգիենայի պարագաներից, հետ են հանձնվում ծնողներին»,- ասաց Հակոբյանը և հավելեց, որ նորակոչիկները գոհ են հավաքակայանում տրամադրած սննդակարգից:

Նա նաև զրուցեց նորակոչիկների հետ և խորհուրդ տվեց լինել համարձակ, ուժեղ և պատրաստակամ հայրենիքին ծառայելու: «Ցանկանում եմ, որ այն ինչ ստեղծել է ավագ սերունդը՝ կարողանաք պահել, պահպանել և բազմապատկել»,- ընդգծեց Հակոբյանը:

Այն հարցին, թե ի՞նչն է առաջնային փոփոխությունը համարում, ԳՇ պետը նշեց. «Ցանկանում եմ, որ բոլորը ծառայեն բանակում և տարեկետումը ընդհանրապես վերանար: Կցանկանայի նախազորակոչային տարիքում առավել ուշադրություն դարձվեր բուժզննմանը: Իհարկե, դա համապետական միջոցառում է և մոտ ապագայում դուք ականատես կլինեք»:

ԳՇ պետը շնորհակալություն հայտնեց զորակոչիկների ծնողներին` հայրենիքի պաշտպաններ դաստիարակելու համար: