Աբու–Մազենը Բիբիի ու Սիսիի ձեռքերով է խեղդում ՀԱՄԱՍ–ին

ՄԻՋԱԶԳԱՅԻՆ 15 Հունիս, 2017 20:03

Պաղեստինի կառավարության մամլո խոսնակ Յուսուֆ Մահմուդը խիստ քննադատության է ենթարկել ՑԱԽԱԼ–ի ղեկավար Ավիդգոր Լիբերմանի՝ իսրայելական 2–րդ ալիքով արած այն հայտարարությունը, ըստ որի՝ Պաղեստինի հարցն այլևս անջատ է ներկայանում տարածաշրջանային համընդգրկուն համաձայնություն կայացնելու պատկերացումներից: «Այժմ շատ բան է փոխվել. Դոնալդ Թրամփը ԱՄՆ նախագահն է, իսկ արաբական չափավոր ռեժիմները ավելի ու ավելի հստակ են ընկալում այն, որ Իսրայելը ոչ թե տարածաշրջանային խնդիր է, այլ դրանք լուծելու միջոց»,–հայտարարել էր նախարարը՝ զայրացնելով ՊԻ ղեկավարությանը:

«Լիբերմանը լկտի փորձ է արել՝ պաղեստինյան հարցը տարածշրջանային խաղաղության կոնտեքստից դուրս բերելու համար: Դա վկայում է այն մասին, որ այս մարդիկ պատկերացում անգամ չունեն Մերձավոր Արևելքի վերաբերյալ»,– հայտարարեց Յուսուֆ Մահմուդը՝ մոռանալով, որ Աբու Մազենի, կամ՝ Մահմուդ Աբբասի, վերջին գործողությունները ճիշտ հակառակի մասին են վկայում: Անշուշտ, ոչ ոք ՖԱԹՀ–ի հետ հակառակություններ ունեցող և Գազան փաստացի սեփական բոստանի վերածած ՀԱՄԱՍ–ի «երեսը չի լվանում»:

Բայց տեսնվա՞ծ բան է՝ խնդրել Իսրայելին, որպեսզի վերջինս միջնորդի Եգիպտոսին, իսկ սա էլ դադարեցնի Գազայի էլեկտրականության մատակարարումը: Եվ այդ ամենը միայն այն պատճառով, որ տեսեք–տեսեք՝ Քաթարն օժանդակել է ՀԱՄԱՍ–ին, իսկ «չափավոր սունիները», որ իրենց հերթին են բոյկոտել Քաթարին, որոշել են այժմ նաև երբեմնի սիրելի և իրենց իսկ ջանքերով Իրանի պոկված ՀԱՄԱՍ–ին բոյկոտել՝ վերջինիս խաղաղությունն արգելակող ահաբեկչական խմբավորում ճանաչելով...

Սա, իհարկե, խայտառակություն է, և արդեն երկու օր է՝ իսրայելական մամուլն այս մասին է գրում՝ փաստելով, թե բոլոր այն կանխատեսումները, որ «չափավորներն» այժմ իրենք Իսրայելի փոխարեն բոլոր կեղտոտ գործերը կանեն Պաղեստինում, իրականություն են դառնում:

Իհարկե, սա չի նշանակում, թե Իսրայելում բոլորն են խելքները թռցրել: Հաարեց թերթն, օրինակ, բացառիկ դիպուկ էր նկատել այն, որ Պաղեստինի կառավարության խնդրանքով Իսրայելի միջնորդությունն ու Գազայի էլեկտրականության մատակարարման դադարեցումը միայն Նեթանյահուի մարդկային կասկածելի որակների մասին են խոսում: «Տխուր է գիտակցել, որ Բիբին Աբու–Մազենին պարտնյոր է դիտարկում միայն այն դեպքում, երբ պայմանավորվածության արդյունքում միայն սովորական ժողովուրդն է տուժում... դժվար է հավատալ, թե մենք կխուսափենք պատասխանատվությունից, որովհետև Իսրայելն առաջվա պես այս կողմերում օկուպանտ է, իսկ մոտ երկու միլիոն հասարակ ժողովուրդը տառապում է՝ այժմ արդեն հուսահատության հասնելով...հումանիտար ճգնաժամը ոչ թե կհանդարտեցնի, այլ սոսկ ավելի կռադիկալացնի ողջ սեկտորը... այս ամենը կբերի բռնության նոր ալիքի, և կեցցե՛ Բիբին, որ օգնեց Աբու–Մազենին՝ իշխանության համար վարվող իր քաղաքական պայքարում՝ վտանգելով բոլորիս»,– գրեց Հաարեցը, ինչը, փաստորեն, խնդրի դիտարկման ամենաճշգրիտ քվինտ–էսենցիան է:

Գոհար Սիմոնյան