ՀԷՑ-ն Արմավիրի մարզպետարանից պահանջում է 8 մլն դրամ՝ չկատարած պարտավորությունների դիմաց

«Հայաստանի էլեկտրական ցանցերը» հայցադիմում է ներկայացրել Արմավիրի մարզպետարանի դեմ՝ պահանջելով 8 մլն դրամ, որը գոյացել է չկատարած պարտավորությունների դիմաց:

Դատական տեղեկատվական համակարգի տեղեկացմամբ գործն ուղարկվել է Արմավիրի մարզի  ընդհանուր իրավասության առաջին ատյանի դատարան և մակագրվել դատավոր Էդգար Հովհաննիսյանին:

«Հայաստանի էլեկտրական ցանցեր»  փակ բաժնետիրական ընկերության ընդդեմ «Հայաստանի Հանրապետության Արմավիրի մարզպետարանի աշխատակազմ»  պետական կառավարչական հիմնարկի` գումարի բռնագանձման պահանջի մասին  հայցադիմումը վարույթ է ընդունվել մարտի 17-ին: Գործը նախնական քննության փուլում է:

Պարզելու համար, թե ի՞նչ գումար է այն և արդյոք մարզպետարանը դիմել է ՀՀ կառավարությանը 8 մլն դրամը հատկացնելու  համար,Tert.am-ը փորձեց կապ հաստատել մարզպետարանի ներկայացուցչի հետ:

Արմավիրի մարզպետարանի աշխատակազմի իրավաբանական բաժնի պետ Յուրի Մանվելյանը  հրաժարվեց պատասխանել հարցին, թե արդյոք դիմե՞լ են Կառավարությանը, որպեսզի 8 մլն դրամ հատկացվի ՀԷՑ-ի պարտքը մարելու համար.«Այցելեք մարզպետարան, ունենամ իմ վերադասի թույլտվությունը, կպատասխանեմ»:

Հարցին,թե արդյոք մարզպետարանում է, հաշվի առնելով, որ աշխատանքային հեռախոսահամարի զանգերին չի պատասխանում, վերջինս ասաց.« Ոչ թե չեմ պատասխանում, այլ հեռախոսս չի աշխատում»:

Մարզպետարանի լրատվական բաժինը ևս հրաժարվեց պատասխանել հարցերին, նշելով, որ դրանք վերաբերում են իրավաբանական բաժնին: