Life.panorama.am-ը գրում է.
Դիզայներ Մանուկ Ալեքսանյանը՝ Մանչը, Life.panorama.am-ի հետ զրույցում խոսել է ամառային նորաձեւության մասին, տվել իր մասնագիտական խորհուրդներն ու նշել թրենդային հագուստ կրելուց զատ անհատականությունը պահպանելու կարեւոր հատկանիշները:
«Այս ամռանը նորաձեւությունը խիստ անկանխատեսելի է: Նորաձեւության աշխարհ են գալիս փանկ եւ փողոցային ոճերը: Աշխարհահռչակ նորաձեւության տները եւս շեշտը դրել են այս ոճերի վրա: Սրանց շարքում են շորտերը, պատռոտված շապիկները, մաշված ու քրքրված հագուստները: Նորաձեւ է նաեւ վինտաժ ոճը, որոնք դեռ 1960-ականների ռոք խմբերի հագուստներում կարելի էր հանդիպել: Պրինտներով շապիկները շատ հետաքրքիր են այս սեզոնին, դրանց շարքում կարող են լինել տարբեր բրենդների անունները, օրինակ՝ իմ նոր հավաքածույի թեման ԱՄՆ է եւ ամենամեծ լոգոների համար ընտրել եմ «Coca-Cola»-ն: Այսինքն հայտնի բրենդների անունները շապիկների վրա այս սեզոնին իրենց հաղթարշավն են սկսել»,- նշեց դիզայները:
Մանչի խոսքով՝ տաբատներ ընտրելիս պետք է խուսաՓել նեղ մոդելներից.
«Եթե նախորդ տարիներին առավել նորաձեւ էին նեղ ջինսե տաբատները, ապա այս տարի դրանք հակաթրենդ են համարվում: Փոխարենը շատ նորաձեւ են այսպես կոչված «boyfriend» ջինսերը, որոնք լայն են, բարձր գոտկատեղով ու անունից ելնելով՝ հիշեցնում են ընկերոջդ տաբատները: Ի դեպ՝ դրանք վինտաժ ոճում եւս ակտուալ են»,- հավելեց նա:
Կոշիկների հարցում նույնպես կան հակաթրենդներ.
«Այս տարի նորաձեւ չեն բարձրակրունկ կոշիկները: Շատ ակտուալ են հողաթափեր հիշեցնող կոշիկները, թրենդային են գունավոր սպորտային կոշիկները՝ բոթասները: Սրանք կարելի է կրել անգամ երեկոյան զգեստներով»,- ընդգծեց Մանչը:
Ի դեպ՝ դիզայների խոսքով, եթե տարիներ առաջ համաշխարհային նորաձեւությունը ստեղծվում էր հիմնականում 25 տարեկանից բարձր կանանց համար, ապա վերջին շրջանում նորաձեւությունը ավելի երիտասարդացել է: Հավաքածուները հիմնականում ստեղծվում են մինչեւ 25 տարեկանների համար, ովքեր կազմում են սոցիալական ցանցերի հետեւորդների մեծ մասը:
Աքսեսուրաները միջոցներ են, որոնք կերպարը լրացուցիչ եւ էլ ավելի տպավորիչ են դարձնում: Այս առումով դիզայները եւս իր խորհուրդները տվեց.
«Աքսեսուարների համար թրենդային է փանկ ոճը: Կերպարներին հետաքրքիր երանգ կարող են հաղորդել խոշոր զարդերը, որոնք նորաձեւ էին դեռեւս 70-ականներին: Շատ ակտուալ են ոսկեգույն զարդերը, պլասմասե ականջողերը: Մատանիների հարցում եւս խոշորության վրա պետք է շեշտը դնել: Ինչ վերաբերվում է պայուսակներին, այս պարագայում նորաձեւ են ձեռքով նկարված պրինտները՝ կարգախոսների տեսքով, որոնց դիմում են աշխարհահռչակ բրենդները՝ «Christian dior»-ը, «Gucci»-ին եւ այլն»:
Զրույցի վերջում Մանուկ Ալեքսանյանը շեշտեց՝
«Անկախ նորաձեւության թելադրանքներից՝ պետք է հիշել, որ նորաձեւությունը հուշում է 3-4 ճանապարհ, իսկ թե որոնցով ենք ուզում ընթանալ, ընտրում ենք ինքներս: Այս ընթացքում ոչ մի դեպքում չպետք է մոռանալ ձեր անհատականության մասին, որովհետեւ հաճախորդն է ստեղծում նորաձեւությունը, իսկ դիզայները զարգացնում ու ներկայանալի է դարձնում այցելուի գաղափարները: Այսինքն՝ ամեն մեկն ինքն է ստեղծում տվյալ շրջանի նորաձեւությունը»:
