Դեմ ենք լինելու արվեստը կենցաղային մակարդակի իջեցնելու ցանկացած նախաձեռնության. «Փաստ»

«Փաստ» օրաթերթը գրում է.

«Ծառուկյան» դաշինքից ԱԺ պատգամավոր ընտրված Վարդան Բոստանջյանը, ով նույն դաշինքի առաջարկով ձայների 85 կողմ, 7 դեմ հարաբերակցությամբ ընտրվեց ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահի պաշտոնում, համարում է, որ իր նախասիրություններին շատ մոտ և համահունչ հանձնաժողովի ղեկավար է ընտրվել:

«Ինքս գիտությունների մարդ եմ և առանց դադարի 35 տարուց ավելի դասախոսում եմ, այսինքն` կրթական համակարգում եմ եղել և այժմ էլ շարունակում եմ լինել: Այսինքն, այդ տիրույթը՝ լինի հանրակրթական, բուհական կամ հետբուհական, հարազատ ոլորտ է ինձ համար և ինձ շատ հոգեհարազատ հանձնաժողով եմ ղեկավարելու: Աշխատանքի առումով նաև աշխատում ու շփվում եմ երիտասարդության հետ: Քաղաքական գործունեության ընթացքում թե՛ ուղղակի և թե՛ անուղղակի շփվել եմ նաև մամուլի ներկայացուցիչների հետ: Այսինքն, այդ ոլորտը նույնպես մշտապես գտնվել է իմ ուշադրության ներքո: Այնպես որ, այդ առումով ևս, այն նույնպես ինձ համար անծանոթ տիրույթ չէ»,– ասաց Վ. Բոստանջյանը:

Խոսելով հանձնաժողովի ենթակայության տիրույթում գտնվող մնացած՝ մշակույթ, սպորտ ուղղությունների մասին հանձնաժողովի նախագահն ասաց, որ որոշ հարցերում կարող է նաև նրբություններին ու ոլորտային առանձնահատկություններին մի փոքր ավելի քիչ ծանոթ լինի, սակայն օրենսդրական դաշտերին տիրապետելու առումով որևէ խնդիր չի կարող լինել:

«Այս հարցում նույնպես որևէ պրոբլեմ չկա, առավել ևս, որ ես օրենսդրական գործունեության փորձ ունեմ և կարճ ժամանակում կյուրացնեմ նաև այն մանրամասները, որն անհրաժեշտ է»,– ասաց Վ. Բոստանջյանը: Նա նաև հավելեց, որ ի սկզբանե նախատեսված է եղել, թե որ հանձնաժողովները որ քաղաքական ուժին են բաժին ընկնելու: Իսկ «Ծառուկյան» դաշինքին բաժին ընկած երեք հանձնաժողովներից նշված հանձնաժողովի նախագահի պաշտոնում առաջադրվելն ու ընտրվելն իր մոտ ամենևին էլ չէր կարող դիսկոմֆորտի զգացում առաջացնել:

«Այս նշանակումից չգիտեմ ուրիշները՝ ոնց, բայց ես դիսկոմֆորտի զգացում չունեմ: Եթե որոշները արհեստականորեն ուզում են նման զգացում ունենալ, դա ուրիշ բան: Իսկ այն գործառույթները, որոնք գտնվում են հանձնաժողովի գործառույթների շրջանակներում նորմալ է և պետք է օպտիմալ աշխատենք այդ ուղղություններով, որպեսզի հարաբերությունների կարգավորումը լինի այնպիսին, որ այն առանձնանա իր արդյունավետությամբ, իր առարկայականությամբ և հարցերի լուծարմամբ: Եվ ես համոզված եմ, որ մենք շատ լավ կաշխատենք»,– ասաց Վ. Բոստանջյանը:

Հանձնաժողովի նախագահը խոսելով Ազգային օպերայի և բալետի ակադեմիական թատրոնում ռեստորան և սաունա կառուցելու նախագծի մասին, նշեց, որ իրենք կմիանան այն խմբերին, ովքեր դեմ են արտահայտվում նման նախագծի իրականացմանը:

«Մշակույթի օջախները, որոնք նաև հոգևոր տիրույթ են, որևէ մեկը չի կարող դարձնել պարապ զբաղմունքի վայրեր: Եթե ընդդիմություն լինելու հանգամանքը մի պահ մի կողմ դնենք, ապա ինձ համար մեր մշակույթը, և առավել ևս հոգևոր հարստությունը այլ բարձրագույն արժեք է, և մենք պետք է այնպես աշխատենք, որ մեր երկրի համար կարևոր, առաջնային խնդիրների լուծման համար արժանավայել լուծումներ գտնենք: Եվ շատ բնական է ու տրամաբանական, որ մենք դեմ ենք լինելու արվեստը կենցաղային մակարդակի իջեցնելու ցանկացած նախաձեռնության»,– ասաց Վ. Բոստանջյանը:

 

Շարունակությունը` «Փաստ» օրաթերթի այսօրվա համարում