Ես մեղավոր չեմ, որ ես եմ վայելում հայտնի լինելու բերկրանքը և ոչ թե դուք. Էլեն Ասատրյան

Life.panorama.am-ի զրուցակիցն է դերասանուհի Էլլեն Ասատրյանն, ով այս շրջանում նկարահանվում է «Առաջնորդները» հեռուստասերիալում:

-Էլեն, նախ կխնդրեմ պատմեք, թե ինչպե՞ս հայտվեցիք հեռուստադաշտում:

- Մասնագիտությամբ դերասանուհի չեմ, սովորում եմ Սլավոնական համալսարանի վերջին կուրսում՝ ապագա գիտաշխատող եմ: Իսկ հեռուստատեսություն հայտնվեցի շատ պատահական: Նախորդ տարի ընկերներիցս մեկը լուսանկարս ցույց է տվել «Աբելի քույրը» սերիլաի անձնակզմին, որոնք հավանել էին ինձ ու հրավիրել քասթինգի: Շատ արդարացիորեն փորձարկում իրականցվեց, որի արդյունքում ես ընտրվեցի: «Առաջնորդներում» եւս շատ պատահական սկսեցի նկարահանվել: Նրանք նոր դերասանուհի են փնտրելիս եղել, որի ժամանակ էլ մտերիմ ընկերուհիս՝ Ժաննա Բուտուլյանը, ցույց է տվել իմ լուսանկարն ու անմիջապես ինձ հավանել են:

-Չունենալով դերասանական փորձ ու գիտելիքներ՝ ինչպե՞ս կարողացաք հաղթահարել մասնագիտական խնդիրները:

-   Իհարկե,  սկզբում դժվարություններ եղան, ավելին՝ իմ խաղընկերներից եղան մարդիկ, ովքեր փորձեցին ինձ կոտրել, բայց փոխարենը, ես ունեցա շատ ընկերներ, որոնցից շատ բաներ սովորեցի: Նրանց թվում հատկապես ուզում եմ առանձնացնել Գուրգեն Սարգսյանին, ով «Աբելի քույրը» սերիալի ռեժիսորն էր, նա ինձ իսկապես շատ-շատ է օգնել ու սատարել, նա այն մարդկանցից է, ումից բացասական կարծիք լսելով՝ ուրախացել եմ, քանի որ իմ մեջ պոտենցիալ տեսնելով՝ փորձեց զարգացնել: Այսօր, հետ նայելով անցածս աշխատանքներին, մտածում եմ, որ հիմա այլ կերպ կանեի դրանք, իսկ սա նշանակում է, որ այս ընթացքում փորձել եմ հղկվել: Իհարկե, մեծ բացթողում է համապատասխան կրթություն չունենալը, բայց, ըստ իս, տաղանդը ի վերուստ է տրվում: Ի դեպ՝ մայրս՝ Աիդա Ասատրյանը, երկար տարիներ թատրոնի դերասանուհի է եղել, աշխատել է Հ. Պարոնյանի անվան թատրոնում՝ Կարպ Խանչվանքյանի խմբում, բայց հետագայում ինձ մեծացնելու պատճառով թողել է աշխատանքը: Կարծում եմ՝ Աստծո գործերն անքննելի են, ես էլ մայրիկիցս ժառանգել եմ սերը այս ոլորտի նկատմամբ: Ի դեպ՝ հավելեմ նաեւ, որ ապագայում մտադրություն ունեմ ընդունվել նաեւ ԵԹԿՊԻ, որպեսզի ավելի վստահ քայլեմ այս ոլորտում:

-Էլեն, բացի հեռուստասերիալից, ի՞նչ այլ առաջարկներ ու ծրագրեր ունեք:

- Այս ընացքում շատ առաջարկներ ունեցա, բայց, ինչպես հայտնի է, մի փոքր դժվար է մի քանի նախագծերում համատեղ աշխատելը: Հիմա նոր ծրագրի մտքեր կան, կարծում եմ՝ հետաքրքիր աշխատանքներ են սպասվում: Մանրամասներ չեմ ուզում հայտնել այդ առաջարկներից, միայն նշեմ, որ հավանական է, որ հաջորդ նախագիծը, որտեղ կներկայանամ, սիթքոմ կլինի:

-Հայտնի մարդիկ հաճախ են քննադատությունների կենտրոնում հայտնվում: Դուք եւս, կարծես թե,  բացառություն չեղաք: Վերջերս Ձեր լուսանկարը մեծ տարածում գտավ, որն ուղեկցվեց ընդհուպ մինչեւ վիրավորական մեկնաբանություններով: Կրկին մեզ հետ զրույցում դուք հայտնեցիք, որ կգտնեք այդ նյութը տարածողին: Ի վերջո, դա ստացվե՞ց Ձեզ մոտ:

-  Այս հարցի շուրջ երկար մտածելուց հետո հասկացա, որ այդ թեման ուղղակի պետք է շրջանցել: Ինձ պետք չէ իմանալ, թե ով էր դրա հետեւում կանգնած, միայն մի բան կասեմ՝ մեր երկրում կարծրատիպ կա, եթե աղջիկը գեղեցիկ է ու հաջողակ, ապա նա իր հաջողություններին չի հասել մաքուր ճանապարհով: Ես բոլոր վատ մեկնաբանություն գրողներին ուզում եմ ասել՝ հարգելի տղամարդիկ, կանայք, մայրեր, Ձեզ սազական չէ նման անպարկեշտ մեկնաբանություններ գրելը, բացի այդ, փորձեք ընդունել, որ ինչ-որ մեկը կարող է հաջողակ լինել եւ դրան հասնել մաքուր ճանապարհով: Ես մեղավոր չեմ, որ ես եմ վայելում հայտնի լինելու բերկրանքը եւ ոչ թե դուք: Ես շատ հպարտ եմ, որ 21 տարեկանում կարողանում եմ նկարահանվել արդեն երկրորդ սերիալում, եւ Փառք Աստծո, առաջարկներս դեռեւս շարունակվում են, սա նշանակում է, որ ես տեղ ունեմ:

-Ի՞նչն եք համարում Ձեր հաջողության գրավականը:

- Իմ հաջողության գրավականն իմ անկեղծությունն է: Հեռուստադիտողի հետ պետք է միշտ անկեղծ լինել՝ մի կողմ թողնելով ձեւականությունները:

-Էլեն, ընտրյալ ունե՞ք:

- Ներկա պահին իմ սիրտն ազատ է եւ մոտակա ժամանակներում չեմ էլ պլանավորում սիրելի ունենալ, քանի որ ուզում եմ հիմա կենտրոնանալ աշխատանքիս վրա:

Հեղինակ՝ Անուշիկ Մելքոնյան