Հայ արիները նշեցին Հայոց Վանատուր աստծո տոնը

Հայ արիները մայիսի 13-ի արեւածագին՝ Շիրակի մարզում՝ Հայաստանի Արեւմտյան եւ Արեւելյան արհեստական ու ժամանակավոր սահմանագծային հատվածներից մեկում նշեցին Հայոց Վանատուր աստծո տոնը:

Տարիներ առաջ հայ արիների վերականգնած ու վերաիմաստավորած տոներից մեկն է Հայոց հյուրընկալության Աստված Վանատուրի տոնը: Եվ արդեն պարբերաբար տոնվում են Հայ Աստվածների բոլոր տոները՝ համապատասխան ծիսակարգով ու տոնականությամբ: Սա հայ արիներին հաղորդում է հազարամյակների հայոց շունչն ու հավատի ոգին, զորացնում հային ու հայի Աստվածներին: Երբ գարնան եռուզեռն իր ընթացքի մեջ է մտնում, հայ արիական օջախներում նոր թափ է ստանում հյուրընկալությունն ու հյուրասիրությունը: Հայոց հյուրընկալության երաշխավորն ու հովանավորը Վանատուր Աստվածն է՝ հայ օջախ ների պահապանը: Գարնանային տոնական հաջորդականությունն իր բնական սահմանագլխին է հասնում հենց Վանատուրյան տոներին: Հայ արիները հյուրընկալ դռները բաց փառաբանում են Վանատուր Աստծուն, որ հայ օջախները միշտ հյուրընկալ պահի եւ հայոց երկիրն էլ լի ու առատ դարձնի...

Ինչպես «Արմենպրես»-ին տեղեկացրին Հայ արիական միաբանության լրատվական կենտրոնից, Վանատուր աստծո տոնը սկսվեց ծիսական արարողությամբ, որ կազմակերպել էին Հայ Արիական Միաբանության հոգեւոր հանձնախմբի քրմական դասի ներկայացուցիչները: Մինչ արարողությունը սկսելը նրանք ներկաներին բանջարով բրդուճներ բաժանեցին: Թե բանջարը տարատեսակ է, ուրեմն՝ հողը բերրի է: Ուրեմն՝ հողը դեռ չի խռովել, դեռ սնում է մեզ, որ ուժ ստանանք ու տեր լինենք մեր Հայոց տան մյուս հատվածին: Թե տան մի մասը մերը չէ, ուրեմն՝ տունը օջախ  չի դառնա, բնակար ան է լինելու պարզապես: Ծեսը քրմերից ավագի ձեռամբ եղավ, ում չորս թոռները այս պահին Հայոց բանակում են ծառայում՝ հօգուտ մեր Մեծ տան վերականգնման, մեր Հայրենիքի:  Նա ձոն հղեց Հայոց մեծ տան, օջախի հովանավոր Վանատուր աստծուն՝ ի զորակցություն հայորդիների: Հայկական Լեռնաշխարհը Հայոց Մեծ Օջախն է, եւ հայորդիները խոստում ունեն օջախի կրակը վառելու:

Ծիսական արարողությունը շարունակվեց հայ նորաստեղծ ընտանիքի օծումով: Հարսնացուն ի նշան տան կրակն անմար պահելու կամքի, կրակ վառեց, եւ գինի լցրեց բոլորի գավերը: Հետո բոլորին երկուական ճյուղեր բաժանեց: Ամեն ոք իր մի ճյուղը հյուսեց մյուսին՝ ի նշան մեր Մեծ տան արեւելյան եւ արեւմտյան հատվածները մի տանիքով ամրակցելու:

Տոնական արարողությունը շարունակվեց ավանդական ուտեստների ու ըմպելիքների համտեսմամբ, երգ ու պարով, ծիսական փառաբանումներով եւ գինեձոներով: