Լավրովը Պուտինի ճանապարհն է կարգի բերում

ՄԻՋԱԶԳԱՅԻՆ 12 Մայիս, 2017 21:14

Չնայած Մոսկվա–Վաշինգտոն լարված հարաբերություններին՝ Ռուսաստանում համոզված են, որ ԱՄՆ նոր վարչակազմը շատ ավելի պրագմատիկ է, քան նախորդը, և, որ՝ ներկայի նախագահ Դոնալդ Թրամփի հետ միջազգային օրակարգի շատ հարցերում է հնարավոր համաձայնության հանգել: Այս կարծիքն է հայտնել ՌԴ արտգործնախարար Սերգեյ Լավրովը, որը եռօրյա այցով ժամանել էր ԱՄՆ՝ բանակցությունների շրջանակում հանդիպելով պետքարտուղար Ռեքս Թիլերսոնին և նախագահ Դոնալդ Թրամփին:

Ի դեպ, հունվարի 20–ից հետո, երբ Թրամփը ոտք դրեց Սպիտակ տուն, սա նրա առաջին հանդիպումն էր ռուսական կողմի հետ, որը ԱՄՆ նախագահն արտակարգ որակեց՝ հավաստելով, թե նախկինի պես հակված է ԱՄՆ–Ռուսաստան հարաբերությունների կարգավորմանը: Ինչ վերաբերում է Լավրովին՝ նա ավելի պերճախոս էր: ՌԴ ԱԳ նախարարը բանակցություններից անմիջապես հետո ԱՄՆ–ում Ռուսաստանի դեսպանատանը մամլո ասուլիս հրավիրեց և նշեց, թե նախագահի ու պետքարտուղարի հետ ինքը ո՛չ պատժամիջոցների խնդիրն է քննարկել, ո՛չ՝ Ուկրաինայի: Փոխարենը քննարկվել են ՌԴ–Արևմուտք լարված փոխհարաբերություններին, արաբա–իսրայելական հակամարտությանը, Աֆղանստանին, Հյուսիսային Կորեային, Սիրիական խնդրին առնչվող հարցեր:

«Այսօր ես մի անգամ ևս համոզվեցի, որ Թրամփի վարչակազմը, ինքը՝ նախագահը, պետքարտուղար Թիլերսոնը գործի մարդիկ են և կամենում են համաձայնության գալ ոչ թե իրենց գաղափարախոսկան նախասիրություններից ելնելով՝ ինչ–որ մեկին ինչ–որ բանում համոզելու համար, այլ որպեսզի լուծում տան կոնկրետ խնդիրներին… Մենք, օրինակ, մանրամասն խոսեցինք Սիրիայի մասին այն գաղափարների կոնտեքստում, որ ձևավորվել են այս ընթացքում՝ այնտեղ անվտանգության գոտիներ ստեղծելու առումով: Մենք ընդհանուր ըմբռնում ունենք այն հարցում, որ դրանք պիտի ողջ Սիրիայում բռնության վերացմանն ուղղված քայլ հանդիսանան, օգնեն հումանիտար խնդիրների լուծմանն ու ամուր հող դառնան՝ խնդրի քաղաքական կարգավորման ուղղությամբ առաջ շարժվելու համար»,– հայտարարեց Լավրովը՝ համոզում հայտնելով, թե ամռանը, Համբուրգում կայանալիք Մեծ քսանյակի երկրների հանդիպման ընթացքում, կկայանա նաև Թրամփ–Պուտին հանդիպումը:

Համեմատելով Լավրովի խոսքը Սպիտակ տնից հնչած ուղերձին, հարկ է նշել, որ Թրամփի վարչակազմն ավելի մեծ շեշտադրում է արել ահաբեկչության դեմ պայքարի, Սիրիայում բռնության դադարեցման և Իրանին սանձելու խնդիրների վրա՝ նշելով, թե ԱՄՆ–ն Ռուսաստանին խնդրել է զսպել Ասադի ռեժիմին, Իրանին և նրա դուդուկի տակ պարող ուժերին: Այլ կերպ ասած, չնայած Թրամփի՝ արտակարգ որակմանը, Սպիտակ տունն, այնուամենայնիվ, տարածություն է պահպանել Մոսկվայից, ինչը ոմանք բացատրում են ներկայում Կոնգրեսում նոր թափով սկսված՝ Թրամփ–Ռուսաստան կապերը դիտարկող հետաքննությամբ ու Դաշնային բյուրոյի ղեկավար Կոմիի պաշտոնազրկմամբ և Թրամփի զգուշավորությամբ: Մի բան, որի հետ բացարձակ համաձայն չենք: Ի վերջո, ուշադիր աչքը կնկատի, որ իրականում այս գործելակերպը Թրամփի դեպքում շատ սովորական երևույթ է:

Այս մարդը չի դադարում գործարար լինել. բուն հանդիպման և համագործակցության հնարավորության առնչությամբ նա կարող է և մշտապես է սիրալիրություններ շռայլում պարտնյորների հասցեին, իսկապես հակված է փոխշահավետ համաձայնությունների կնքմանը, սակայն, ոչ միանգամից բոլոր խաղաթղթերը բացելուն է հակված, ոչ էլ սեփական շահի հետապնդման մեջ մի կետ անգամ կզիջի: Ահա սա է պատճառը, որ մի կողմից՝ Լավրովն իսկապես պոզիտիվ է տրամադրված ԱՄՆ–ՌԴ հետագա համագործակցության, մյուս կողմից էլ հասկանում է, որ, ինչ–որ առումով, Կրեմլը խիստ կամային պարտնյորի հետ գործ ունի: Միակ ելքն, ուրեմն, դիվանագիտությանը, կամ գուցե՝ ռացիոնալությանը փարվելն ու հայտարարելն է, թե՝ Ոչ մեկի համար էլ գաղտնիք չէ, որ մի հանդիպմամբ միանգամից բոլոր հարցերը չես լուծի, բայց նաև ակնհայտ է, որ Թրամփը ժամանակակից է, գործնական, նրա հետ կարելի է ու պետք է պայմանավորվել:

Գոհար Սիմոնյան