«Ելք»-ն ու «Երկիր Ծիրանին» սխալ իմիջով են ներկայանում

Armworld.am-ը գրում է.

Փորձելով պարզել, թե Երեւանի ավագանու ընտրություններում ինչ արդյունքներ կարող են գրանցվել, «Սոցիոմետր» անկախ սոցիոլոգիական կենտրոնը ապրիլի 30-31-ը հարցումներ է անցկացրել 1500 երեւանցիների շրջանում: 

Ավագանու ընտրություններին մասնակցելու հետաքրքրություն է ցուցաբերել հարցվածների միայն 43 տոկոսը, եւս 43 տոկոսը նշել է, որ ընդհանրապես չի հետաքրքրվում ընտրություններով եւ չի մասնակցի դրանց: Հարցվածների 14 տոկոսն էլ թեպետ չի հետեւում քարոզարշավին, սակայն չի բացառում, որ կարող է իր քվեն տալ այս կամ այն քաղաքական ուժին:

Այս մասին երեկ տեղեկացրեց կենտրոնի ղեկավար ԱՀԱՐՈՆ ԱԴԻԲԵԿՅԱՆԸ. «Ակտիվ ընտրազանգվածի մեկ քառորդն է, որ հատուկ չի հետեւում քարոզարշավին, իսկ երեք քառորդը բավական հետաքրքրված է ընտրություններով, հետեւում է անցուդարձին: Ըստ այդմ՝ կարելի է ասել, որ ընտրողների 41 տոկոսը հստակ գիտի, որ մասնակցելու է ընտրություններին եւ իր քվեն տալու է նախընտրած քաղաքական ուժին: 

Հարցվածների 6,3 տոկոսը դեռեւս տատանվում է՝ գնա՞լ ընտրություններին, թե՞ ոչ: Եվս 6,3 տոկոսը հստակ որոշել է, որ իր քվեն որեւէ կուսակցության չի տալու: 3,4 տոկոսը այդպես էլ մեզ չասաց իր դիրքորոշումը, իսկ 43 տոկոսը հայտարարեց, որ ամենեւին հետաքրքրված չէ ո՛չ քարոզարշավով, ո՛չ էլ ավագանու ընտրություններով: 

Այս բոլոր թվերը համադրելով եւ վերլուծելով՝ կարելի է ակնկալել, որ ընտրություններին առավելագույնը 57 տոկոս ակտիվություն կարող ենք ունենալ, նվազագույնը՝ 47 տոկոս: Այս երկուսի միջին թիվը կազմում է 49 տոկոս: Այսինքն՝ գոնե ընտրողների այդքան մասնակցությունն ապահովված է: Չեմ կարծում, թե մինչեւ քարոզարշավի ավարտն այս թվերի մեջ էական տեղաշարժեր լինեն»:

Ահարոն Ադիբեկյանի կենտրոնում իրականացրած հաշվարկների արդյունքներով՝ ընտրություններին ընտրողների նվազագույն մասնակցության դեպքում, որը 43,4 տոկոս է կազմում, Հանրապետական կուսակցությունը կարող է 70 տոկոս ձայն հավաքել, այն դեպքում, երբ «Ելքը» միայն 20 տոկոս, իսկ «Երկիր ծիրանին» 10 տոկոս ձայն կհավաքի: 

Առավելագույն՝ 55 տոկոս մասնակցության դեպքում Հանրապետական կուսակցությունը կարող է ակնկալել ստանալու ձայների 64 տոկոսը, «Ելքը»՝ 22,5, «Երկիր ծիրանին»՝ 13,5 տոկոսը: Իսկ միջին՝ 49 տոկոս մասնակցության դեպքում ՀՀԿ-ին բաժին կհասնի ձայների 67 տոկոսը, «Ելքին»՝ 21, «Երկիր ծիրանիին»՝ 12 տոկոսը:

Մասնակցության առավելագույն տոկոսի դեպքում Հանրապետական կուսակցության ձայների քանակի նվազումն, ըստ սոցիոլոգի, պայմանավորված է նրանով, որ ընտրություններին մասնակցելու հարցում դեռեւս տատանվողները «Ելքի» եւ «Երկիր ծիրանիի» համակիրներն են, ովքեր չգիտեն, թե այդ երկու ընդդիմադիր կուսակցություններից որ մեկին տան իրենց ձայնը, եթե այդուհանդերձ ընտրություններին մասնակցելու վճռականություն ցուցաբերեն: 

Մինչդեռ Հանրապետական կուսակցության էլեկտորատը վաղուց է ձեւավորվել եւ կայուն է: Նրանք հստակ գիտեն, որ իրենց ձայնը Տարոն Մարգարյանի թիմին են տալու: Ինչպես նաեւ վճռական են ընտրություններին մասնակցելու հարցում:

Անդրադառնալով Տարոն Մարգարյանի՝ երեւանցիների շրջանում ունեցած հեղինակությանը՝ Ահարոն Ադիբեկյանն ասաց, որ բավական շատ երեւանցիներ համակրում եւ հարգում են նրան՝ համարելով բավական փորձառու, բանիմաց եւ սրտացավ քաղաքապետ. «Այն հարցին, թե վերջին մի քանի տարիներին Երեւանում տեղի ունեցած փոփոխություններն ինչպե՞ս եք գնահատում, հարցվածների միայն 14 տոկոսն է վատ գնահատական տվել, 19 տոկոսն էլ նշել է, որ մայրաքաղաքում խնդիրներն ավելի են շատացել: Այսինքն՝ 33 տոկոսն է դժգոհ Տարոն Մարգարյանի կառավարումից:

Մնացած 67 տոկոսը նրա գործունեությունը դրական է գնահատում՝ ասելով, որ Երեւանի խնդիրների մեծ մասը լուծվել է հենց Տարոն Մարգարյանի շնորհիվ: Իսկ դա նրանց համար բավական մեծ ձեռքբերում է»:

Ի դեպ, հարցվածները Երեւանի ամենահրատապ խնդիրները համարում են տրանսպորտի աշխատանքը, աղբահանումը եւ կանաչապատումը, բակերի բարեկարգումն ու խաղահրապարակների ստեղծումը, ասֆալտապատումը, վթարային շենքերի, տանիքների, շենքերի մուտքերի, նկուղների նորոգումը, վերելակների վիճակը: Եվ գործող քաղաքապետի աշխատանքը գնահատելիս հարցվածները հիմնականում այս խնդիրների շրջանակներում են նրա գործունեությունը դիտարկել՝ համարելով, որ, օրինակ, աղբահանության, խաղահրապարակների ստեղծման ու բակերի բարեկարգման, ասֆալտապատման խնդիրները մեծ մասամբ լուծվել են, տրանսպորտի, վթարային շենքերի, վերելակների հարցն օրակարգում է եւ այլն: 

Խոսելով ավագանու ընտրությունների քարոզարշավի ժամանակ կիրառվող տեխնոլոգիաների եւ դրանց ազդեցիկության մասին՝ Ահարոն Ադիբեկյանը նկատեց, որ ինչպես «Ելքի», այնպես էլ «Երկիր ծիրանիի» թիմերը բավականաչափ սխալներ են թույլ տալիս իրենց իմիջը ձեւավորելիս: Դրա հետեւանքով նրանք մեծ թվով ընտրողներ են կորցնում, որոնց ճիշտ իմիջով ներկայանալու դեպքում կարող էին ուղղորդել դեպի իրենց կողմը, շահել նրանց վստահությունն ու քվեն։ 

«Այն, որ Նիկոլ Փաշինյանը բարձրախոսը ձեռքին ջինսե տաբատով եւ հասարակ քաղաքացուց ոչնչով չտարբերվող կերպարով երեւանցիների շրջանում քարոզչություն է իրականացնում, սխալ քայլ եմ համարում: Պատկերացրեք՝ դուք Երեւանի բնակիչ եք, եւ մեկը բարձրախոսով գալիս է ձեր թաղամաս եւ հայտարարում, որ եթե դուք ձեր ձայնը տաք նրան, բոլոր հարցերը կլուծի: Ընդ որում, այդ թեկնածուն ոչնչով չի տարբերվում ձեզնից՝ ո՛չ հագուկապով, ո՛չ խոսելաձեւով: Կվստահե՞ք նրան: Իհարկե՝ ոչ:

Կամ խոսում է մի կին, որը կիսակուսական, ոչ մտերմիկ եւ անգամ վանող ձայն ունի: Նման ձայնով հնարավոր չէ հրապուրել մարդկանց, ընտրողներին: Նա իր ձայնով բացականչում է՝ «եկել ենք հաղթելու»: Մինչդեռ նրա ձայնն ամենեւին հաղթական չէ:

Այս թեկնածուները քարոզարշավին մասնակցելուց առաջ պետք է ծանրութեթեւ անեին իրենց հնարավորությունները եւ փորձեին հասկանալ՝ կկարողանա՞ն մարդկանց իրենց կողմը գրավել, վստահեցնել, որ խոստումներդ կկատարես: Գոնե աշխատեին սեփական իմիջի ձեւավորման վրա, խորհրդակցեին մասնագետների հետ: Ակնհայտ է, որ նրանք անգամ ընտրապայքարի ճիշտ մեխանիզմներին չեն տիրապետում: Ուրեմն ինչպե՞ս են պատրաստվում մեծ թվով քվեներ հավաքել:

Ինչ վերաբերում է Տարոն Մարգարյանին, ապա երեւում է, որ նրա իմիջի ձեւավորման հարցում լուրջ աշխատանք է տարվել: Նա, նախ, փորձառու է իր ոլորտում, ինքնավստահ է, խոսում է հանգիստ եւ վստահ, ձայնը հայրական երանգ ունի, հագնվում է թեպետ պաշտոնական, բայց ոչ ցայտուն՝ տարբերվելով շարքային քաղաքացուց: Սովորաբար շարքային ընտրողի եւ թեկնածուի միջեւ պետք է անպայման սոցիալ-հոգեբանական փոքր անջրպետ լինի, որ հարգանք ներշնչի ընտրողի մեջ: Տարոն Մարգարյանի պարագայում դա առկա է»,- գտնում է սոցիոլոգը: 

Ահարոն Ադիբեկյանը մեկ անգամ եւս հիշեցնում է, որ մեզանում ընտրողների համար ոչ այնքան կուսակցությունների գաղափարներն ու ծրագրերն են կարեւոր, որքան անձերը, դեմքերը: Հենց այդպիսի սկզբունքով էլ մեր քաղաքացիներն ընտրեցին խորհրդարանական ընտրությունների ժամանակ: Եվ հիմա էլ նրանք ընտրելու են ոչ թե իրենց ներկայացվող գաղափարներն ու խոստումները, այլ մարդկանց՝ փորձելով հասկանալ, թե նրանք որքանով կկարողանան քաղաքային տնտեսությունը ղեկավարել:

Թագուհի Ասլանյան