Life.panorama.am-ը գրում է.
Մինչ շատերը ենթադրություններ էին անում, թե դերասան, հումորիստ եւ սցենարիստ Արտյոմ Մարկոսյանը դադար է վերցրել, վերջինս զբաղված էր կարեւոր աշխատանքով՝ նա կյանքի էր կոչում նմանը չունեցող հումորային մոնոներկայացման իր գաղափարը:
«Արդեն երկու-երեք տարի է, ինչ այս մոնոներկայացման գաղափարն ունեի, սակայն այն անընդհատ ձգձվում էր: Դե իսկ ամիսներ առաջ որոշեցի՝ պետք է կոնկրետ բոլոր ջանքերս ու մտքերս այս ուղղությամբ կենտրոնացնեմ, ինչն էլ, հուսամ, ստացվեց: Մայիսի 29-ին, 30-ին եւ 31-ին Երեւանի կամերային թատրոնում կկայանան առաջին ներկայացումները: Չեմ սիրում օգտագործել աննախադեպ, բացառիկ ամպագորգոռ բառերը, բայց սա, իսկապես, լինելու է նմանը չունեցող նախագիծ: Գոնե վստահաբար կարող եմ ասել, որ այս ֆիլմ-մոնոներկայացումը տարածաշրջանում միակն է լինելու»,- Life.panorama.am-ի հետ զրույցում պատմեց Արտյոմ Մարկոսյանն ու հավելեց.
«Մոնոներկայացումը, բացի իմ՝ կենդանի մասնակցությունից, բաղկացած է լինելու փոքրիկ ֆիլմերից: Ի դեպ՝ ասեմ, որ իրականացվել է եզակի եւ մինչ օրս Հայաստանում ու ողջ ԱՊՀ տարածքում իր ձեւաչափի մեջ նախադեպը չունեցող "MOCAP" անիմացիա»:
«Մեկը վերեւից» ֆիլմ-մոնոներկայացման իրադարձությունները տեղի են ունենալու մեր ժամանակներում. անհայտ մոլորակի բնակիչները որոշում են նվաճել եւ կործանել Երկիր մոլորակը, ու իրենց նպատակին ուզում են հասնել՝ սկսելով աշխարհի ամենահին ու խելացի ազգերից մեկից՝ հայերից: Նրանց նպատակն է՝ ժողովրդին կործանելուց հետո գողանալ հայի գենոֆոնդն ու հասկանալ այս ազգի ֆենոմենը, սակայն այս ամենը կուղեկցվի հետաքրքիր զարգացումներով, իսկ թե ի վերջո այլմոլորակայիննե՞րը կհաղթեն, թե՞ հայերը, ցույց կտա ներկայացումը: Արտյոմ Մարկոսյանի խոսքով, անիմացիոն կադրերը կլինեն ֆիլմի տեսքով, դե իսկ հայ ժողովրդի «պայքարն» ու ընդվզումը կարտահայտվի դերասանի կերտած վեց կերպարներով:
Հայագետ, քաղաքագետ, ամենագետ Լեռնիկ Հայունցը, հոգում մեծ փիլիսոփա եւ անբուժելի ռոմանտիկ Գեորգի Սամսոնիչը, գրող, ասմունքող, հայ արվեստի կենդանի լեգենդ, ժամանակակից գրականության նախամայր տիկին Թուրաբյանը, բնիկ երեւանցի, քաղաքապետի թեկնածու, ապագա վարչապետ Անուշավանը, մեզ արդեն հայտնի բակի հեղինակություն Դաժանիկը եւ մեր սոցիումի մի շարք ներկայացուցիչներ կպայքարեն իրենց երկրի համար:
Սա կլինի նաեւ երաժշտական կատակերգության, քանի որ Արտյոմը կցուցադրի իր երաժշտական ունակությունները: Ընդ որում՝ մոնոներկայացումը ինտերակտիվ բնույթ է կրելու՝ ներգրավելով հանդիսատեսին.
«Կամերային թատրոնը շատ մտերմիկ ու ջերմ է, ինչն էլ հնարավորություն կտա հանդիսատեսի հետ կապի դուրս գալու: Այնպես եմ անելու, որ հանդիսատեսն իրեն համարի գործողության կոնկրետ մի մասնիկ, ի վերջո՝ յուրաքանչյուր դերասան պետք է հիշի, որ ներկայացման ամենակարեւոր մասը հանդիսատեսին է պատկանում: Կարծում եմ՝ ներկաներն այդ օրը տպավորված են տուն գնալու»,- նշեց նա:
Խոսելով «Մեկը վերեւից» ներկայացման նպատակների մասին, հումորիստը նկատեց.
«Նպատակները մի քանիսն են: Նախ ուզում եմ հետաքրքիր լիցքեր հաղորդել հանդիսատեսին, ուզում եմ նրանք տեսնեն մի բան, որը ներկայացոման ավարտից հետո երկար կհիշեն: Ինձ համար ամենակարեւորը կերպարների ճիշտ մատուցումն է: Ես ուզում էի ստեղծել գործ, որը նման չի լինի արդեն եղած արտադրանքներին ու լիաթոք ծիծաղ կպարգեւի մարդկանց, հուսամ՝ դա ինձ մոտ ստացվել է»:
Ի դեպ՝ «Մեկը վերեւից» ներկայացման համասցենարիստ է Արմեն Վարդանյանը, ում հետ Արտյոմն արդեն երկար տարիներ է, ինչ ոչ միայն ընկերություն է անում, այլեւ համագործակցում է.
«Մենք իրար շատ լավ ենք հասկանում, ինչ խոսք, նորմալ աշխատանքային գործընթացով մենք կարող ենք վիճել ինչ-որ հարցերի շուրջ, անհամաձայնություններ ունենալ, բայց, միեւնույն է, գալիս ենք ընդհանուր հայտարարի, ինչպես միշտ է եղել: Առողջ բանակցությունները լավ աշխատանքներ են ծնում»,- հավելեց մեր զրուցակիցը:
Արտյոմ Մարկոսյանը միայնակ հանդիսատեսի ուշադրությունը կգրավի գրեթե երկու ժամ.
«Իհարկե, հիմա սցենարական վերջին աշխատանքներն են ընթանում, բայց ըստ նախանական հաշվարկների՝ մոնոներկայացումը 1 ժամ 45 րոպեից մինեւ 2 ժամ կտեւի: Հիմա երկու խնդիր կա՝ կազմակերպել այնպես, որ արածդ գործը թերի չլինի, բայց նաեւ պահել սահմանը, որպեսզի հանկարծ չափը չանցնի: Հուսամ՝ հանդիսատեսը, ում ինքս չափազանց շատ եմ կարոտել, այդ օրը գոհ է հեռանալու»,- ավարտեց դերասանը:
Հավելենք, որ Արտյոմ Մարկոսյանն արդեն իսկ բանակացություններ է վարում՝ «Մեկը վերեւից» ֆիլմ-մոնոներկայացումը ԱՄՆ-ում, Եվրոպայում եւ ՌԴ-ում ներկայացնելու ուղղությամբ:
