Հայաստանի ռուսական ռազմակայանի զինծառայողները ձմեռային շրջանի ուսուցման ստուգարք են հանձնում

Հայաստանում տեղակայված ռուսական ռազմակայանում Հարավային ռազմական օկրուգի զորքերի հրամանատար գեներալ-գնդապետ Ալեքսանդր Դվորնիկովի ընդհանուր ղեկավարությամբ սկսվել Է ձմեռային շրջանի ուսուցման ստուգարքների հանձնումը: Ինչպես «Արմենպրես»-ին տեղեկացրել են օկրուգի մամուլի ծառայությունից, ընդամենը պատրաստության մակարդակի գնահատման ընթացքում ներգրավված են 2 հազարից ավելի զինծառայողներ եւ շուրջ 500 միավոր զենք ու ռազմական տեխնիկա: 

Զորամիավորման զինծառայողների կողմից ստուգարքների հանձնումը կտեւի երեք շաբաթ եւ կանցկացվի երեք փուլով: Առաջին փուլում գնահատվելու Է ռազմակայանի ամբողջ անձնակազմի մարտական պատրաստության մակարդակը, մարտական հերթապահության, օպերատիվ պատրաստության, զենքի ու ռազմական տեխնիկայի վիճակը, զինծառայողների բարոյահոգեբանական վիճակը, իրավակարգի եւ զինվորական կարգապահության պահպանումը:

Երկրորդ փուլում Գյումրիի եւ Երեւանի զինվորական կայազորների մշտական տեղաբաշխման վայրերում զինծառայողներն ստուգարքներ են հանձնելու ղեկավար փաստաթղթերի, կանոնադրությունների, անվտանգության պահանջների իմացության գծով եւ լուծելու են սիտուացիոն ու մարտավարական խնդիրներ:

Երրորդ փուլի ընթացքում գնահատվելու են ստորաբաժանումների պրակտիկ գործողությունները ծովի մակերեւույթից 1,5 հազարից մինչեւ 2,2 հազար մետր բարձրության վրա գտնվող «Կամխուտ» եւ «Ալագյազ» բարձրլեռնային զորափորձարաններում ցերեկային ու գիշերային ժամերին: 

Պարապմունքների ընթացքում զորամիավորման զինծառայողները կատարելու են թրթուրավոր եւ զրահատանկային տեխնիկայի վարման վարժանքներ, հրաձգություն: Նաեւ ռազմական օկրուգի հանձնաժողովը անձնակազմից նորմատիվներ Է ընդունելու հատուկ, տեխնիկական, մարտավարական, շարային եւ ֆիզիկական պատրաստությունից, ռազմական տեղագրությունից եւ ռադիացիոն, քիմիական ու կենսաբանական պաշտպանությունից: