Չեմպիոնների լիգա. երեկոն հաղթական էր մադրիդյան և ֆրանսիական թիմերի համար

ՈՒԵՖԱ-ի Չեմպիոնների լիգայի խաղարկության ¼ եզրափակիչ փուլի շրջանակներում կայացան հերթական հանդիպումները: Ինչպես հաղորդում է «Արմենպրես»-ը, խաղային օրը մեկնարկեց «Բորուսիա Դորտմունդ»-«Մոնակո» խաղով, որը մեկ օրով հետաձգվել էր խաղից առաջ գերմանական ակումբի ֆուտբոլիստներին տեղափոխ ող ավտոբուսի մոտ հնչած պայթյունի հետևանքով:

Այս խաղում ֆավորիտ էր համարվում գերմանական ակումբը, սակայն «Մոնակո»-ն հերթական անգամ ապացուցեց իր բարձր կարգն ու կարողացավ մրցակցի հարկի տակ հաղթանակի հասնել: Հանդիպման 17-րդ րոպեին մրցավարը 11 մետրանոց հարված նշանակեց «Բորուսիա»-ի դարպասին, սակայն Ֆաբինյոն շեղ հարվածեց: Սակայն երկու րոպե անց «Մոնակո»-ի երիտասարդ հարձակվող Կիլիան Մբապե Լոտինը կարողացավ առաջ մղել իր թիմին: Առաջին խաղակեսում ֆրանսիական ակումբի ֆուտբոլիստները ևս մեկ գնդակ ուղարկեցին մրցակցի դարպասը:. ինքնագոլի հեղինակ դարձավ Սվեն Բենդերը:

Երկրորդ խաղակեսը ևս գոլառատ ստացվեց: հանդիպման 57-րդ րոպեին Օսման Դեմբելեն կարողացավ կրճատել հաշվի տարբերությունը` հույս պարգևելով «Բորուսիա»-ի երկրպագուներին: Սակայն 79-րդ րոպեին Կիլիան Մբապե Լոտինը ևս մեկ անգամ տխրեցրեց գերմանական թիմի երկրպագուներին` երրորդ գնդակն ուղարկելով մրցակցի դարպասը: Խաղավարտին «Բորուսիա»-ի ճապոնացի կիսապաշտպան Շինջի Կագավան կարողացավ մեկ գնդակ հետ բերել, սակայն ավելին անել «մեղուները» չկարողացան: Խաղն ավարտվեց 2:3 հաշվով, ինչը ֆրանսիական ակումբին կիսաեզրափակիչ փուլի ուղեգիր նվաճելու լորջ հնարավորություն է տալու:

¼ եզրափակչի հաջորդ խաղում Մյունխենի «Բավարիա»-ն սեփական հարկի տակ ընդունել էր Մադրիդի «Ռեալ»-ին: Այս խաղում ևս բուքմեյքերների կանխատեսումները չիրականացան: Թեև խաղի ֆավորիտ էր համարվում «Բավարիա»-ն, «Ռեալ»-ի ֆուտբոլիստները փայլուն հանդիպում անցկացրեցին և կարողացան պարտության մատնել մրցակցին: Հանդիպումը հաջող մեկնարկ ունեցավ գերմանական թիմի ֆուտբոլիստների համար: 25-րդ րոպեին անկյունայինի խաղարկումից հետո Արտուրո Վիդալը գլխի հարվածով գրավեց մադրիդյան թիմի դարպասը: Առաջին խաղակեսի վերջնամասում «Բավարիա&r aquo;-ն կարող էր կրկնապատկել առավելությունը, սակայն Արտուրո Վիդալը 11 մետրանոց նշակետից վրիպեց: Երկրորդ խաղակեսում «Ռեալ»-ի ֆուտբոլիստները շատ արագ կարողացան վերականգնել հաշվի հավասարությունը: 47-րդ րոպեին աջ եզրից Դանիել Կարվախալի գեղեցիկ փոխանցումից հետո Քրիշտիանու Ռոնալդուն գնդակն ուղարկեց մրցակցի դարպասը: Ռոնալդուի գոլից հետո խաղն անցնում էր «Ռեալ»-ի բացահայտ առավելությամբ: Խաղի 58-րդ և 61-րդ րոպեներին Քրիշտիանու Ռոնալդուն մրցակցի կենտրոնական պաշտպան Խավի Մարտինեսին ստիպեց երկու անգամ իր նկատմամբ կոպիտ խախտման գնալ, ինչի հետևանքով մրցավարը կարմիր քարտ ցույց տվեց Մարտինեսին: Թվային առավելություն ստանալուց հետո «Ռեալ»-ի ֆուտբոլիստները ավելի մեծ տեմպ հաղորդեցին խաղին, ինչի շնորհիվ կարողացան հաղթանակ կորզել: 77-րդ րոպեին Քրիշտիանու Ռոնալդուն հրաշալի օգտագործեց Մարկո Ասենսիոյի փոխանցումը և կարողացավ երկրորդ գնդակն ուղարկել Մանուել Նոյերի դարպասը: «Ռեալ»-ն այս խաղում կարող էր ավելի խոշոր հաշվով հաղթանակ տոնել, եթե չլիներ «Բավարիա»-ի դարպասապահ Մանուել Նոյերի հրաշալի խաղը:

Խաղային երեկոն հաղթական էր նաև Մադրիդի մյուս ակումբի` «Ատլետիկո»-ի համար: Մադրիդցիները սեփական հարկի տակ ընդունել էին Անգլիայի չեմպիոն «Լեսթեր Սիթի»-ին: Այս խաղն արդյունավետությամբ էապես զիջեց մյուս երկու խաղերին: Հանդիպման միակ գնդակը 28-րդ րոպեին 11 մետրանոց հարվածից հեղինակեց «Ատլետիկո»-ի ֆրանսիացի  հարձակվող Անտուան Գրիզմանը: Խաղն ավարտվեց 1:0 հաշվով:

Չեմպիոնների լիգայի ¼ եզրափակիչ փուլի պատասխան հանդիպումները կկայանան ապրիլի 18-ին և 19-ին: