Վարդենյաց լեռնանցքում ճանապարհաշինարարներն աշխատում են դուրս բերել ձյան մեջ խցանված մեքենաները

 Մարտի 27-ի լույս 28-ի գիշերվա ընթացքում գրանցված տեղումների եւ բքի հետեւանքով Վարդենյաց լեռնանցքում փակվել է Մարտունի-Գետափ միջպետական նշանակության ճանապարհը, եւ ձյան մեջ խցանվել են մի քանի ավտոմեքենաներ:

 Ինչպես «Արմենպրես»-ին տեղեկացրեց Մարտունի-Գետափ ճանապարհի սպասարկումն իրականացնող «Շանթ-Սեյրան» ՍՊԸ պատասխանատու Աղասի Ղուկասյանը, ճանապաարհը ձյան շերտով լցվել-փակվել է Յանըղ-Քարվանսարա հատվածում, մոտ 3 կիլոմետր երկարությամբ, որի մաքրման աշխատանքներն առայժմ չեն իրականացվում շարունակվող բքի պատճառով: Փոխարենը ճանապարհաշինարարներն աշխատում են խցանված մեքենաներն ազատել ձյան կապանքներից:

 «Մարտունու կողմից գիշերը փակվել է ճանապարհը եւ դադարեցվել երթեւեկությունը դեպի Վայոց Ձորի մարզ: Բայց Վայոց Ձորի կողմից այն ժամանակին չի դադարեցվել, ինչի արդյունքում էլ մի քանի մեքենա Վարդենյաց լեռնանցքում խցանվել մնացել են, որոնք դուրս բերելու համար այժմ աշխատում են ճանապարհաշինարարները: Իսկ մաքրման աշխատանքները կձեռնարկենք բքի հանդարտվելուն պես»,-հավաստեց Աղասի Ղուկասյանը: Գեղարքունիքի մարզպետարանի աշխատակազմի քաղաքաշինության վարչության տրանսպորտի եւ ճանապարհաշինության բաժնի պետ Գեւորգ Խաչատրյանի հավաստմամբ՝ մարզ ի բոլոր բնակավայրերում ու երթուղիներում ճանապարհները բաց են եւ երթեւեկելի:

 

 

Խոսրով Խլղաթյան