Երկու տղամարդ, ներկայանալով որպես թաղապետարանի աշխատակից, փորձեցին խոչընդոտել իմ քարոզարշավը. Տիգրան Սարգսյան

Փաստաբան, «Հայկական վերածնունդ» կուսակցության կողմից առաջադրված վարկանիշային թեկնածու Տիգրան Սարգսյանի քարոզարշավը փորձել են խանգարել: Այս մասին նա հայտնեց Past.am-ի հետ զրույցում:

 

Սկզբում, ըստ Սարգսյանի, հարձակման է ենթարկվել նրա ֆեյսբուքյան էջը, սակայն այդ խնդիրը հաջողվել է կարգավորել: Կոմիտաս-Գյուլբենկյան փողոցների մերձակայքում էլ պատռել են Տիգրան Սարգսյանի նախընտրական պաստառները։ «Երկու տղամարդ, ներկայանալով որպես թաղապետարանի աշխատակից, փորձեցին խոչընդոտել իմ քարոզարշավը և ստացան արժանի հակահարված: Ոստիկանությունում նյութեր են պատրաստվում՝ քրեական գործ հարուցելու համար: Այդ մարդկանց լուսանկարներն ունենք: Ընտրարշավին խոչընդոտելը Քրեական օրենսգրքով հետապնդվում է: Բացի այդ, նրանք կարող են պատժվել իշխանության յուրացման հատկանիշներով, եթե պարզվի, որ թաղապետարանի աշխատակիցներ չեն»,- նշեց թեկնածուն:

 

Տիգրան Սարգսյանն ասաց, որ անձամբ շրջում է Արաբկիր, Դավիթաշեն, Աջափնյակ համայնքներում, մոտենում քաղաքացիներին, բարևում, ներկայանում և ներկայացնում իր առաջարկները: «Ես քաղաքացուն պայմանագիր կնքելու առաջարկ եմ անում: Պայմանագրի պայմաններն են՝

 

 

1. Պաշտանավարման ողջ ընթացքում չեմ փոխելու բնակության հասցես՝ ք. Երևան, Բակունցի 1, բն. 5 և հեռախոսահամարս՝ 094 17-16-70:

 

2. Օրենսդրական փոփոխությունների ճանապարհով հասնելու եմ նրան, որ արգելվի պարտավորությունների դիմաց քաղաքացու բնակարանի բռնագանձումը: Անհրաժեշտ է դադարեցնել բանկերի կողմից քաղաքացիների համատարած ունեզրկման գործընթացը:

 

3. Օրենսդրական փոփոխությունների ճանապարհով հասնելու եմ նրան, որ երևանցին տրանսպորտում կռացած ու ծռված չերթևեկի, սա մեզ վայել չէ:

 

4. Պաշտոնավարման ողջ ընթացքում ունենալու եմ քաղաքացիներին իրավական, սոցիալական աջակցություն ցույց տվող մշտական գործող գրասենյակներ: Կենտրոնները կգործեն Արաբկիր, Դավիթաշեն, Աջափնյակ համայնքներում:

 

5. Պաշտոնավարման ողջ ընթացքում պարտավորվում եմ ընտրողներիս խնդիրների վերաբերյալ պատգամավորական հարցումներով ու միջնորդություններով դիմել պետական մարմիններին:

 

6. Ազգային ժողովում պարտավորվում եմ ներկայացնել հայ մարդու կյանքը բարելավող օրինագծեր և ընդդիմանալ ցանկացած անարդար ու կամայական որոշման դեմ»,-հայտարարեց թիվ 2 ընտրատարածքում ՀՎԿ-ի կողմից առաջադրված թեկնածուն:

 

Լևոն Փանոսյան

Կիսվել