Ադրբեջանական հենակետի ոչնչացումն ու հայկական զինուժի պատասխան գործողությունները լռեցրել են հակառակորդին

Հայաստանի սահմանամերձ Տավուշի մարզի բնակավայրերում իրավիճակն այս պահին համեմատաբար հանգիստ է, հայ-ադրբեջանական սահմանին հակառակորդի կողմից հրադադարի ռեժիմի խախտման դեպքերը նվազել են: Սեպտեմբերի 24-ի երեկոյան հայկական զինված ուժերի պատասխան գործողությունների արդյունքում հնարավոր է եղել զսպել հակառակորդի ակտիվությունը հայ-ադրբեջանական սահմանին, որի ընթացքում հայկական կողմից քաղաքացիա կան բնակչության շրջանում զոհեր և վիրավորներ կան: ՀՀ ՊՆ տեղեկատվության և հասարականության հետ կապերի վարչությունից «Արմենպրես»-ի հետ զրույցում հայտնեցին, որ հայկական կողմը զինվորականների շրջանում զոհեր և վիրավորներ չունի:

Որոշ տեղեկությունների համաձայն` հայկական զինված ուժերին հաջողվել է նաև ոչնչացնել հայկական Պառավաքար համայնքի դիմաց գտնվող ադրբեջանական հենակետերից մեկը, որտեղից հակառակորդը կրակ էր բացել հայկական գյուղի ուղղությամբ: Հայկական զինուժի պատասխան գործողությունների արդյունքում 5 ադրբեջանցի զինծառայող է սպանվել:

Հակառակորդի կրակոցներից Տավուշի մարզի Բերդավան համայնքում սեպտեմբերի 24-ին զոհվել է 2 քաղաքացիական անձ, 2-ը` վիրավորվել: Զոված քաղաքացիներն են`1974 թվականին ծնված Սոնա Ռևազյանը և 1921-ին ծնված Շուշան Ասատրյանը: Ավելի վաղ հայտնի էր դարձել, որ Տավուշի մեկ այլ սահմանամերձ` Պառավաքար համայնքում հակառակորդի կրակոցից զոհվել է 83-ամյա Պայծառ Աղաջանյանը: