Գյումրիում դրամական փոխհատուցում ստացան հրդեհից տուժած ընտանիքները

Գյումրու քաղաքապետի որոշմամբ դրամական փոխհատուցում ստացան անցած տարի օգոստոսին հրդեհից տուժած ընտանիքները:

Ինչպես տեղեկացնում է «Արմենպրես»-ը, 2016 թվականի  օգոստոսի 9-ին, ժամը 13.10-ին   ԱԻ ՇՄ փրկարարական վարչությունն ահազանգ էր ստացվել, որ հրդեհ է բռնկվել Գյումրի քաղաքի Հակոբյան փողոցի տներից մեկի տանիքում: Դեպքի վայր էր մեկնել երկու մարտական հաշվարկ: Սակայն, տեղում պարզելով, որ կրակը տարածվում է, ժամը 13.25-ին հայտարարվել էր հրդեհի բարդության 2-րդ աստիճան: Դեպքի վայր էին մեկնել ևս երկու մարտական հաշվարկ: Հրդեհը մարել հնարավոր եղավ միայն 4 մարտական հաշվարկ ներգրավելով, սակայն մինչ այդ հրդեհն արդեն տարածվել իր: Իրար մոտ գտնվելու պատճառով հրդեհվել էր 7 տուն: 

«Ավելի շատ օգնելու ցանկությունը մեծ է, բայց մեր հնարավորությունների սահմաններում կփորձենք աջակցել, թեև գիտենք, որ կան տներ, որոնց սենյակներն ամբողջությամբ այրվել են»,-նշեց Գյումրու քաղաքապետ Սամվել Բալասանյանը՝  հույս հայտնելով, որ այդ տների բնակիչները կկարողանան վերականգնել տները:  

Ստեղծված հատուկ մասնագիտական հանձնաժողովը, ուսումնասիրություն կատարելով տվյալ 7 տներում, արձանագրել է յուրաքանչյուրի տուժելու աստիճանը: Գյումրու ավագանին որոշել էր այդ նպատակով համայնքի բյուջեից հատկացնել ընդհանուր 2 մլն դրամ, որը տվյալ ընտանիքներին կհատկացվի համապատասխան վնասվածության՝  փորձաքննական եզրակացության հիման վրա: